ನಾನು ಮತ್ತು ಚಂದ್ರ ಟೈಟಾದಾಗ

ಮೂಗು ಮುರಿದ ಚಂದ್ರನ ಕುರಿತು
ತಮಾಷೆ ಮಾಡುತ್ತಿದ್ದೆ;
ತನ್ನ ಮುಖದ ಮೊಡವೆಗಳ
ಎಣಿಸೆಣಿಸಿ
ನನ್ನ ಮುಖವ ತೋರಿಸಿ
ಅಣುಕಿಸುತ್ತಿದ್ದೆ!!
ಕೆಂಡವಾದವನು ಸುಡಲಿಲ್ಲ
ಮತ್ತದೇ ತಂಪು ಬೆಳದಿಂಗಳ
ನನ್ನ ಮೈಮೇಲೆ ಹೊದಿಸಿಬಿಟ್ಟ;
ನಾನೂ ತಣ್ಣಗಾದೆ!!
ಇಬ್ಬರೂ ಕೂತು
ತಲಾ ಒಂದೊಂದು
ಬಾಟಲಿ ಬೀರು ಸೇವಿಸಿ
ವಿರಹಿಗಳಂತೆ ಕಣ್ಣೀರಿಡುತ್ತ
ನಮ್ನಮ್ಮ ಕಥೆಗಳ ಹಂಚಿಕೊಂಡೆವು;
ಹಂಚಿಕೊಂಡೆವು ಅನ್ನುವುದಕ್ಕಿಂತ
ಕಕ್ಕಿಕೊಂಡೆವು ಅಂದರೆ ವಾಸಿ;
ಯಾಕಂದರೆ
ನನ್ನ ಕಥೆ ನನಗೆ
ತನ್ನ ಕಥೆ ತನಗೆ
ಅಸಡ್ಡೆ ಮೂಡಿಸುವಷ್ಟು ಕಹಿಯಾಗಿದ್ದವು;
ಮನ ಭಾರ ಹಗುರಾಗಿಸಲು
ಮತ್ತೊಂದು ಬಾಟಲಿ ಕೈಗೆತ್ತಿಕೊಂಡೆವು!!
ಅವನೇನೋ ಆಕಾಶದ ಉದ್ದಗಲಕ್ಕೂ
ಅಮಲಿನಲಿ ತೇಲಾಡುತ್ತಿದ್ದನಂದುಕೊಂಡೆ
ಆದರೆ
ನಾ ಆಯ ತಪ್ಪಿ ಬಿದ್ದ
ಮೋರಿಯೊಳಗೂ ತಾನು ಬಿದ್ದು
ಎದ್ದು ಹೋಗಿರುವ ಬಗ್ಗೆ
ಸಾಕ್ಷಿ ಸಿಕ್ಕಿತು!!
ಈಗ ನಾನು ರಾಡಿಯಾಗಿದ್ದೆ
ಚಂದ್ರ ಲೇವಡಿ ಮಾಡುತ್ತ ನಗಲಾರಂಭಿಸಿದ;
ಇನ್ನೂ ಅರ್ಧ ಉಳಿದ ಬೀರು ಬಾಟಲಿಯನ್ನ
ತನ್ನತ್ತ ತೂರಿದೆ,
ಅದು ಸೀದ ನನ್ನ ತಲೆಗೇ ಬಡಿಯಿತು;
ತಲೆಗೆ ಸುತ್ತಿಕೊಂಡ ಬ್ಯಾಂಡೇಜು
ಥೇಟು ಚಂದ್ರನ ತಲೆ ಮೇಲೆ ಹೊತ್ತಂತೆ ಕಂಡು
ಊರೆಲ್ಲ ನಕ್ಕಿತು;
ನಕ್ಕದ್ದು ನನ್ನ ನೋಡಿಯೋ
ಇಲ್ಲ
ಚಂದ್ರನನ್ನ ನೋಡಿಯೋ
ಇನ್ನೂ ಅರ್ಥವಾಗುತ್ತಿಲ್ಲ!!
                                        -- ರತ್ನಸುತ

Comments

  1. ಇಬ್ಬರೂ ಕೂತು
    ತಲಾ ಒಂದೊಂದು
    ಬಾಟಲಿ ಬೀರು ಸೇವಿಸಿ
    ವಿರಹಿಗಳಂತೆ ಕಣ್ಣೀರಿಡುತ್ತ

    ನಮ್ಮ ಕಥೆಗಳನ್ನು ಯಾವಾಗ ಹಂಚಿಕೊಳ್ಳೋಣ ಭರತ ಮುನಿಗಳೇ?

    ReplyDelete

Post a Comment

Popular posts from this blog

ಜೋಡಿ ಪದ

ಗರುಡ ಪ್ರಯತ್ನ ೩

ಗರುಡ ಗೀತ ಸಾಹಿತ್ಯ ೧