ದಿಕ್ಕಿಲ್ಲದ ಗಾಳಿ ಯಾರ ಪರವಾಗಿದೆ?

ದಿಕ್ಕಿಲ್ಲದ ಗಾಳಿ ಯಾರ ಪರವಾಗಿದೆ?
ಈ ಪರಿ ನನ್ನ ಮುಂದಕ್ಕೆ ನೂಕಿ
ತಾನೇ ಅಡ್ಡಿಪಡಿಸುತ್ತಿದೆ
ವಿಚಿತ್ರವಾದ ನಡುವಳಿಕೆಯಲ್ಲೇ
ಎಲ್ಲರ ಮುಟ್ಟುತ್ತ-ತಟ್ಟುತ್ತ-ಹಾಯುತ್ತ
ಎಲ್ಲರೊಳಗೊಳಗೊಂಡೂ ಬೇರಾದಂತೆ..

ಅದೆಷ್ಟೋ ತುಟಿಯ ವಿಳಾಸರಹಿತ ಚುಂಬನಗಳ
ತನ್ನೊಳಗೆ ಬೆಚ್ಚಗೆ ಬಚ್ಚಿಟ್ಟುಕೊಂಡು
ಯರದ್ದನ್ನೋ ಮತ್ತಾರಿಗೋ ಸಿಕ್ಕಿಸಿ
ಇನ್ನೊಮ್ಮೆ ಸರಿಯಾದವರಿಗೇ ಸೇರಿಸಿ
ತನ್ನಿಷ್ಟಕ್ಕೆ ದಿಕ್ಕು, ವೇಗ, ಆಕಾರ ಪಡೆದು
ಈಗಷ್ಟೇ ನನ್ನನ್ನೂ ದಿಕ್ಕರಿಸಿಯಾಗಿತ್ತು


ಮಾತನಾಡಿದರೆ ಗಾಳಿಮಾತು
ಸುಮ್ಮನಿದ್ದರೆ ಹಾಳು ಸಂಜೆ
ಬಿಗಿದಿಟ್ಟರೆ ಎದೆಗಪ್ಪಿ
ಕದ ತೆರೆದರೆ ಬರಲೊಪ್ಪಿ
ಕೆಡವಿಬಿಟ್ಟು ನುಸುಳುವುದು ಮತ್ತೆ
ಎಡವಿದಂತೆ ಸಣ್ಣಗೆ..


ಪಿಸು ನುಡಿಗಳ ಪಸರಿಸದೆ
ಹೊಳ್ಳೆಯಿಂದ ಹೊಳ್ಳೆಗೆ ಹರಿದು
ತಿರು-ತಿರುವಿನಲ್ಲೂ ಒಂದೊಂದು ನಾದ
ತಿರುಳಿಲ್ಲದಿದ್ದರೂ ಮರುಳಾಗಿ ಬೀಸಿ
ಮಳೆಗೆ ಸಿಕ್ಕಂತೆ ನೀರ್ಗುಳ್ಳೆಗೂ ಸಿಕ್ಕಿ
ಎಲ್ಲಿ ಕೊನೆಗೊಳ್ಳುವುದೋ, ಏತಕಾಗಿ?


ಊರಿಂದ ಊರಿಗೆ, ಜಾಗದ ಹಂಗಿರದೆ
ಗಡಿ ದಾಟಿ ಬಂದರೂ ಬಂಧನವೆಲ್ಲಿ?
ಸ್ಪೋಟಕ ಸಿಡಿದಲ್ಲಿ ಸಾರಿದೆ ನಭಕೆಲ್ಲ
ಗಾಳಿಯ ಪಟಕೂ ಆಸರೆಯಾಗಿ
ಕಂಡವರು ಯಾರಿಲ್ಲ ಇದು ದೇವರಾ?
ಆಗಿರಲೂಬಹುದು
ಅದಕಾಗೇ ಇಷ್ಟೆಲ್ಲ ರೂಪಾಂತರ...