Monday 27 April 2020

ಬಣ್ಣ

ಇದ್ದ ಬಣ್ಣವ 
ತನ್ನ ಅಸಲಿಯತ್ತಿಗಿಂತ 
ಬೇರೆ ಸ್ವರೂಪದಲ್ಲಿ 
ಕಾಣುವುದೂ ಕುರುಡು;
ನನಗೀಗ ಅದು ಕವಿದಿದೆ 

ಕೆಸರಲ್ಲಿಯ ನೀರು 
ನೀಲಿ ಸಮುದ್ರವ ಹೋಲದೆ!
ಮೋಡ, ಹಾಲಿಕಲ್ಲು, ಮಳೆ
ಇವೆಲ್ಲದರ ಬಣ್ಣ 
ಏಕಿಷ್ಟು ಭಿನ್ನ?

ನೆತ್ತರು ಕೆಂಪು ಎಂದು 
ಹರಿಸಿದವರು ಹೇಳಿದರೂ 
ಒಪ್ಪಲು ತಯಾರಾಗಿರಲಿಲ್ಲ;
ಪ್ರತ್ಯಕ್ಷವಾಗಿ ಕಂಡೂ 
ಸಂದೇಹ ಪಡುವಂತಾಗಿದೆ 
ಅದು ಹೆಪ್ಪುಗಟ್ಟಿ ಕಪ್ಪಾಗಿತ್ತೆ?

ಗಿಡಮರದೆಲೆಗಳದ್ದೋ 
ದಿನಕ್ಕೊಂದು ನಿಲುವು 
ಹಸಿರು, ಕಂದು, ಹಳದಿ ಇತ್ಯಾದಿ,
ಹೂಗಳದ್ದೂ ಅದೇ ಕತೆ;
ಆಕೆಯನ್ನೊಮ್ಮೆ ಗುಲಾಬಿಗೆ ಹೋಲಿಸಿ 
ಪ್ರತಿಕ್ರಿಯೆಗೆ ಕಾದಿದ್ದೆ,
ಮೊಗದಲ್ಲಿ ನನ್ನಷ್ಟೇ ಗೊಂದಲ
ನಗುವಲ್ಲಿ ಸಾವಿರ ಒಗಟು  

ಅಸ್ಥಿರ, ನಮ್ಮ ಮನಸಿನಂತೆ 
ಸಿದ್ಧ ಆಕಾರದಲ್ಲುಳಿಯದೆ 
ಬದಲಾಗುತ್ತಲೇ 
ಬದಲಾವಣೆಗಳ ಪ್ರಶ್ನಿಸುವುದು,
ವಿರೋಧಿಸುತ್ತಲೇ ವಿನೋದಿಸುವುದು 

ಬಣ್ಣಗಳು 
ನಮ್ಮ ಜೊತೆ ಆಟವಾಡಿದಷ್ಟು 
ನಾವು  
ಬಣ್ಣಗಳ ಜೊತೆ ಆಟವಾಡಿಲ್ಲವೇನೋ!

ಮಲಗೇ ಕೂಸೇ ಮಲಗೇ

ಮಲಗೇ ಕೂಸೇ ಮಲಗೇ
ತೊಲಗೇ ಪೀಡೆ ಕನಸೇ
ಮಲಗೇ ಕೂಸೇ ಮಲಗೇ
ತೊಲಗೇ ಪೀಡೆ ಕನಸೇ
ಮಲಗೇ ಕೂಸೇ ಮಲಗೇ..

ನಿನ್ನ ಕಾವಲಿಗೆ ಕಣ್ಣ ಇಟ್ಟೇನು
ನಿನ್ನ ನೆರಳಾಗಿ ನನ್ನೇ ಕೊಡುವೇನು
ನಿನ್ನ ಕಾವಲಿಗೆ ಕಣ್ಣ ಇಟ್ಟೇನು
ನಿನ್ನ ನೆರಳಾಗಿ ನನ್ನೇ ಕೊಡುವೇನು
ಸಣ್ಣ ನಿದ್ದೆಯಲೂ, ಗಾಢ ನಿದ್ದೆಯಲೂ (2)
ಸದ್ದು ಮೂಡದ ಹಾಗೆ ಹೊದ್ದು ಕೊಂಡಿರುವೆನು..
ಮಲಗೇ ಕೂಸೇ ಮಲಗೇ (2)

ಬೇಸಿಗೆಯಲ್ಲಿ ಬೀಸಣಿಕೆ ನಾನು
ಚಳಿಗಾಲದಲ್ಲಿ ಕಾವ ಕೊಟ್ಟೇನು
ಬೇಸಿಗೆಯಲ್ಲಿ ಬೀಸಣಿಕೆ ನಾನು
ಚಳಿಗಾಲದಲ್ಲಿ ಕಾವ ಕೊಟ್ಟೇನು
ನೀ ಅತ್ತು ಕರೆವ ಆ ಒಂದು ಕರೆಗೆ (2)
ಧರೆಗಿಳಿದ ಮಳೆಯಂತೆ ಎರಗುವೆನು ನಿನ್ನ ಬಳಿಗೆ..
ಮಲಗೇ ಕೂಸೇ ಮಲಗೇ...(2)

ಬೆಳ್ಳಿ ಬಂಗಾರ ಮಿತವಾಗಿ ತೊಡಿಸಿ
ಹಿತವಾದ ನುಡಿಯ ಸಿರಿಯ ಉಣಬಡಿಸಿ
ಬೆಳ್ಳಿ ಬಂಗಾರ ಮಿತವಾಗಿ ತೊಡಿಸಿ
ಹಿತವಾದ ನುಡಿಯ ಸಿರಿಯ ಉಣಬಡಿಸಿ
ಹಾಲ್ನೊರೆಯ ಹಾಸಿ ಹೆಜ್ಜೆ ಇರಿಸುವೆನು (2)
ಜೋಗುಳವ ಹಾಡುವುದ ನಿನ್ನಿಂದ ಕಲಿತೇನು..

ಮಲಗೇ ಕೂಸೇ ಮಲಗೇ
ತೊಲಗೇ ಪೀಡೆ ಕನಸೇ
ಮಲಗೇ ಕೂಸೇ ಮಲಗೇ
ತೊಲಗೇ ಪೀಡೆ ಕನಸೇ
ಮಲಗೇ ಕೂಸೇ ಮಲಗೇ (3)

Saturday 25 April 2020

ಮಾಸ್ಕನು ಧರಿಸಲು ಮೇಕಪ್ ಅಳಿಯಿತು

ಮಾಸ್ಕನು ಧರಿಸಲು ಮೇಕಪ್ ಅಳಿಯಿತು
ಈಗೇನ್ಮಾತಾಳೋ ಇವ್ಳು
ಲಿಪ್ಸ್ಟಿಕ್ ಇಲ್ಲದೆ ಮನಸೇ ಇಲ್ಲ 
ಮನೆಯಿಂದ ಹೊರ ಹೋಗಲು
ಈಗ ಬೀಳ್ತಾವೆ ಸುಮ್ನಿರಿ, ಮುಂದೆ ಆಗೋದ್ನ ನೋಡ್ತಿರಿ
ಅದೆಂತ ಫಾರಿನ್ ಬ್ರಾಂಡೇ ಆದ್ರೂ ರೂಮಲ್ಲೇ ಲಾಕಾಗಿದೆ
ಅದೆಷ್ಟು ಶಾಪ ಬಿತ್ತೋ ಪಾಪ ಪಾರ್ಲರ್ರು ಮುಚ್ಕೊಂಡಿದೆ..

ಕ್ರೀಮು ಪೌಡರ್ ಅಂತ, ಆದ್ದದ್ದಿ ಉಜ್ಕೊಂಡು
ಬ್ಯಾಗಲ್ಲೂ ಇಟ್ಕೊಂಡು, ಟಚ್ಚಪ್ಪು ಕೊಡ್ತಿದ್ರಲ್ಲ..
ಬಾಗಿಲ ಆಚೆಗೆ ಬಂದರೆ
ಸೂರ್ಯನ ಕಣ್ಣಿಗೆ ಬಿದ್ದರೆ
ಜಾರಿ ಬಂತು ನೋಡಿ ಅಲ್ಲಿ ಬೆವ್ರು ಸಾಲು
ಮೂಡಿ ಬಿಟ್ಟು ಕಾಲುವೆ
ಕಣ್ಣೀರಲ್ಲಿ ಕಾಡಿಗೆ ಕರಗದಂತೆ 
ರೀಸರ್ಚು ನಡ್ಸೇ ಇಲ್ಲವೇ?
ಲಕ ಲಕ ಲಕ, ಅದೇ ಹಳೆ ಮುಖ
ಅದ್ಯಾರ ಕಣ್ಣು ಬಿದ್ದು ಡಿಸ್ಕೋ ಪಬ್ಬೆಲ್ಲ ಕ್ಲೋಸಾಗಿದೆ
ಅದೇನೇ ಕಷ್ಟ ಬಂದ್ರೂ ಹೆಂಡ್ತೀರತ್ರಾನೇ ಹೇಳ್ಬೇಕಿದೆ.. ತಥೇರಿಕೆ...

ಚ್ಯಾಲೆಂಜ್ ಅಂತ ಕೊಟ್ರೆ, ಶಿಸ್ತಾಗಿ ಡಿಪಿಗೆ 
ಅಂತಾನೇ ಮೇಕಪ್ಪು ಮಾಡ್ಕೊಂಡು ಕೂರ್ತೀರಲ್ಲ
ಬಾಡಿಗಿ ಕಟ್ಟಲು ಇಲ್ಲದೆ
ನೆಟ್ಟಗೆ ಬೇಳೆಯೂ ಬೇಯದೆ
ಶೋಕಿ ಮಾಡಿಕೊಂಡೇ ಹೊಟ್ಟೆ ತುಂಬಿಕೊಂಡ್ರೆ
ಗ್ಯಾಸ್ಟ್ರಿಕ್ಕು ಆಗೋದಿಲ್ಲವೇ?
ರಾತ್ರಿ ಎಲ್ಲ ಟಿಕ್ಕು-ಟಾಕಿನಲ್ಲೇ ಜೀವ್ನ
ಲೈಕ್ಸು ಬೀಳುತಿಲ್ಲವೇ..
ಪುಕ ಪುಕ ಪುಕ... ಎದೆ ತುಂಬ ದುಃಖ
ಒಂದೊಳ್ಳೆ ಕನ್ಸು ಬೀಳೋದಕ್ಕೂ ಎಷ್ಟೋಂದು ಟೈಮಾಗ್ತದೆ
ಇದೊಂದೇ ಬಾಕಿ ಇತ್ತು ಅಂತ ಬೈಗುಳ ಬೀಳ್ತಾಯಿದೆ...


https://soundcloud.com/bharath-m-venkataswamy/8kk5ip21cent

Wednesday 22 April 2020

ಬಾಯ್ತಪ್ಪಿ ಅಪ್ಪನ ಬೈಯ್ಯದಿರು ಅಮ್ಮ

ಮುದ್ದು ಮಾತುಗಳಾಡಿ ತಿದ್ದು ತಪ್ಪುಗಳನ್ನು
ಅಪ್ಪಿ ತಪ್ಪಿಯೂ ಬೆತ್ತ ಹಿಡಿಯ ಬೇಡಮ್ಮ
ಮಾತು ಬಂದಿರೆ ಚಂದ ನಿನ್ನನನುಕರಿಸುವೆನು
ಬಾಯ್ತಪ್ಪಿ ಅಪ್ಪನ ಬೈಯ್ಯದಿರು ಅಮ್ಮ

ಹೆಚ್ಚು ಕೇಳಲು ಒಂದು ಇಷ್ಟಾದರೂ ಕೊಡುವೆ
ಬೇಕೆಂದುದೆಲ್ಲವನೂ ಕೊಡುವಾಕೆ ಅಮ್ಮ
ಹೀಗೆ ಹಾಡಿ ಹೊಗಳಿ ಗಳಿಸಬಹುದೆಂಬುದ
ಅಪ್ಪನಾಣೆಗೂ ಅಪ್ಪ ಕಲಿಸಿಲ್ಲವಮ್ಮ

ನಡುರಾತ್ರಿ ಹಸಿವಿಗೆ ಕೂಗುವೆ ನಿನ್ನನ್ನೇ
ನೀ ನೀಗಿಸದ ಹೊರತು ನಿದ್ದೆ ಬರದಮ್ಮ
ಗೊರಕೆ ಹೊಡೆಯುತಲಿರಲಿ ಅಪ್ಪ ಅವನಿಷ್ಟಕೆ
ಭಯವಿಲ್ಲ ಅಭ್ಯಾಸವಾಗಿಹುದು ಅಮ್ಮ

ಇಬ್ಬರ ನಡುವೆ ಯಾರು ಪ್ರಿಯ? ಕೇಳಿದರೆ
ಉತ್ತರಿಸುವೆ "ಅಪ್ಪ" ಎನ್ನುತಲಿ ಅಮ್ಮ
ನಿನ್ನ ಮನವೊಲಿಸಿಕೊಳ್ಳುವುದೆಷ್ಟು ಸುಲಭ
ಅಪ್ಪನ ಸಂಬಾಳಿಸಲು ಬಲು ಕಷ್ಟವಮ್ಮ

ನನ್ನಪ್ಪನೂ ಹೀಗೆ ನಿನ್ನಪ್ಪನ ಹಾಗೆ
ಏಕಿಷ್ಟು ಮುಂಗೋಪಿ? ಯೋಚಿಸುವೆನಮ್ಮ
ಮುಂದೊಮ್ಮೆ ನಾ ಬೆಳೆದು ದೊಡ್ಡವನಾದಾಗ
ಅಪ್ಪನೆದುರು ನಿಂತು ಕೇಳುವೆನು ಅಮ್ಮ...

Monday 20 April 2020

ಚಿಟ್ಟೆ ಹಿಡಿವ ಆಟ

ಚಿಟ್ಟೆ ಹಿಡಿವ ಆಟವ
ಆಡುವ ಜೊತೆಗೆ ಬರುವೆಯಾ?
ಮೊಟ್ಟೆ ಇಟ್ಟ ಜೀರಂಗಿಯ
ಕತೆಯನು ಹೇಳುವೆ ಸಿಗುವೆಯಾ?
ಇನ್ನೂ ಮೆತ್ತಿದೆ ಬೆರಳಿಗೆ
ಕಳೆದ ಭೇಟಿಯ ಬಣ್ಣವು
ದೋಣಿಯಾಗಿ ತೇಲಿವೆ ನೋಡು
ನೆನಪಿನ ಹಾಳೆಗಳೆಲ್ಲವೂ..

ಎಲೆ ಮರೆಗೆ ಬಚ್ಚಿಟ್ಟ
ಸೀಬೆಕಾಯಿ ಹಣ್ಣಾಗುತಿದೆ 
ಉಪ್ಪು ಖಾರದ ಪೊಟ್ಟಣ ಕಟ್ಟಿ
ಬಹಳ ದಿನಗಳೇ ಕಳೆದು ಹೋಗಿವೆ
ಮುಂಚೆಯೆಲ್ಲ ನಿಬ್ಬೆರಗಾಗಿಸುತ್ತಿದ್ದ ಬಾನು
ರಂಗು ಮಾಸಿದ ಸಂಜೆಗೆ ಸೋತು
ಹಾರುತಲಿಲ್ಲ ಯಾವುದೇ ಹಕ್ಕಿ
ಗೂಡಲೇ ಕೂತು ಅಳುತಿವೆ ಬಿಕ್ಕಿ

ಬಾ ನೋಡು ರೇಖೆಗಳೆಲ್ಲವೂ
ಅಳಿಸಿಹೋಗಿವೆ ಗೋಡೆಯ ಮೇಲೆ
ತಿದ್ದಲು ಇಟ್ಟಿಗೆ ಚಕ್ಕೆಗಳಿದ್ದೂ
ಇದ್ದಿಲು ಸಿಕ್ಕರೂ ಮನಸೇ ಇಲ್ಲ
ನನ್ನ ಚಿತ್ರಕೆ ಮಾತು ಸತ್ತಿದೆ
ನಿನ್ನವುಗಳಿಗೆ ಕಣ್ಣೇ ಇಲ್ಲ
ರಾತ್ರಿ ಸುರಿದ ಜೋರು ಮಳೆಗೆ
ಗೋಡೆ ಉರುಳಿದ ಸಾಧ್ಯತೆ ಹೆಚ್ಚು

ಅರಳಿ ಮರದ ಕೆಳಗೆ ಕುಳಿತು
ನಾಗರ ಕಲ್ಲಿಗೆ ಸುತ್ತಿದ ಹರಕೆ ದಾರದಲ್ಲಿ
ಮಲ್ಲಿಗೆ ಮಾಲೆ ಕಟ್ಟಲು ಹೋಗಿ
ನಸುಕು ಮೂಡಿ ಮನೆ ತಲುಪಿದಾಗ
ಅಂಟಿದ ಘಮಲು ನಿದ್ದೆ ತರಿಸದೆ
ದಿಂಬು ಸುಕ್ಕಾಗುವಂತೆ ಹೊರಲಾಡಿ
ದಕ್ಕಿಸಿಕೊಂಡ ಕನಸೊಳಗೆ
ಒಮ್ಮೆ ಹೀಗೇ, ನೀ ಬಾರದೆ ಸತಾಯಿಸಿದ್ದೆ

ಚಿಟ್ಟೆ ಹಿಡಿಯುವುದೆಂದರೆ
ಹಿಡಿದೇ ಬಿಡುವುದೆಂದು ಭಾವಿಸಬೇಡ
ಹಿಡಿತಕ್ಕೆ ಸಿಗದೆ ಸೋಲುವುದೂ
ಸೋತು ಮರಳಿ ಯತ್ನಿಸುವುದೂ
ಅಂತೆಯೇ ಜೀರಂಗಿಯ ಹುಡುಕಾಟವೂ
ಅಷ್ಟಕ್ಕೂ, ಅಸಂಖ್ಯ ಬಣ್ಣಗಳ
ಪರಿಚಯಿಸಿಕೊಟ್ಟ ಗುರುಗಳಲ್ಲವೇ ಅವು
ನಂಟಿಗೂ ಹೆಸರು ಕೊಡುತ್ತವೇನೋ ನೋಡೋಣ ಅಂತ...

ಜಾರುತಿಲ್ಲವೇಕೆ ಸಂಜೆ?

ಜಾರುತಿಲ್ಲವೇಕೆ ಸಂಜೆ
ನಿನ್ನ ನೆನಪ ಹೊತ್ತರೆ?
ಕೆನ್ನೆ ಕೆಂಪಗಾಯಿತೇಕೆ
ಹಾಗೇ ಸೋಕಿ ಬಿಟ್ಟರೆ?
ನಿಂತು ಮಾತನಾಡದಂತೆ
ಹೋದೆ ಈಗ ಎಲ್ಲಿಗೆ
ಎಲ್ಲ ಹೇಳಿ ಮುಗಿಸಬೇಕು
ರಾತ್ರಿ ಮುಗಿವ ವೇಳೆಗೆ

ಕೊಟ್ಟ ಸಾಳುಗಳಲಿ ಸಿಲುಕಿ
ನುಲಿವೆ ಏಕೆ ನಾಚುತ?
ಪ್ರಾಸ ಪದಗಳೆಲ್ಲ ನಿನ್ನ
ನಡುವ ಗಿಲ್ಲಿ ಬಿಟ್ಟಿತಾ?
ಬಳುಕುವಾಗ ಎದ್ದು ಕುಣಿದು
ತೂಗೋ ಜಡೆಯ ಕುಚ್ಚಲಿ
ನನ್ನ ಹೃದಯವನ್ನು ಇಟ್ಟು
ಹೇಗೆ ತಾನೆ ತಾಳಲಿ?

ನಿನ್ನ ಕಣ್ಣಿನಲ್ಲಿ ಒಂದು 
ಚಂದ ಹೂವು ಅರಳಿದೆ 
ರೆಪ್ಪೆ ಮುಚ್ಚಿ ತೆರೆಯುವಾಗ
ಭಿನ್ನ ಬಣ್ಣ ತಾಳಿದೆ 
ತೀಡಿಕೊಂಡ ಕಪ್ಪು ಅಲ್ಲಿ 
ಬೇಲಿಯಂತೆ ಕಾವಲು 
ಹಾರಿ ಬರಲೇ ಕನಸಿನಂತೆ 
ಪ್ರೀತಿಯಿಂದ ಬಾಚಲು?

ಒಂದುಗೂಡಿತೆಲ್ಲ ಮೋಡ 
ಏನೋ ಸಂಚು ಹೂಡುತ 
ನಿನ್ನ ತಾಕಲೇನು ಮಾಡಬೇಕು 
ಎಂದುಕೊಳ್ಳುತಾ 
ಬಾಗಿಲನ್ನು ತೆರೆದು ಹೊರಗೆ 
ಬಂದು ನೋಡು ಈಗಲೇ 
ನಿನ್ನ ಅರಸಿ ಬಂದ ನಾನು 
ತಂದೆ ಮಳೆಯ ಜೊತೆಯಲೇ

ಮಿಂದ ಖುಷಿಗೆ ದಣಿದು 
ಮರವ ತಂಗುದಾಣವಾಗಿಸಿ 
ಬುಡದ ತುಂಬ ಪ್ರೇಮ ನಕ್ಷೆ 
ಉಗುರ ಗೀರಿ ಛಾಪಿಸಿ 
ಹಸಿಯ ನೆಲದ ಹಸಿವು ನೀಗಿ 
ಹಳ್ಳ ಕೊಳ್ಳ ತುಂಬಿದೆ 
ಜೊನ್ನ ಹಾದಿ ಹಿಡಿದು ಬಂದ 
ಚಂದ್ರ ಬಿಂಬ ನಾಚಿದೆ.... 

Wednesday 15 April 2020

ನೀರ್ಗುಳ್ಳೆ

ಊದಿ ಬಿಟ್ಟ ನೀರ್ಗುಳ್ಳೆಯೊಳ ಉಸಿರು 
ಡೋಲಾಯಮಾನವಾಗಿ ತೇಲಿ 
ಅಸಾಧ್ಯ ಎತ್ತರವ ತಲುಪಿ
ಆಗಸವ ಮುಟ್ಟುವ ತವಕದಲಿ ಒಡೆದು 
ಗಾಳಿಯಲಿ ಹಂಚಿ ವಿಲೀನವಾದಂತೆ 
ಒಂದು ಆಕಾರಕ್ಕೆ ವಿಮುಕ್ತಿ 

ಎದೆಯ ಆವರಣದಿ ಭಾರವಾಗಿ 
ಬಿಟ್ಟುಗೊಡುತ್ತಲೇ ಹಗುರಾಗುವ 
ಮತ್ತೆ ಒಳ ಸೆಳೆವಾಗ 
ಹೊರ ನಡೆಯಲು ತುದಿಗಾಲಲುಳಿವುದನು 
ಗಂಟು ಕಟ್ಟಿ ಇರಿಸಿ 
ಬೇಕೆಂಬಲ್ಲಿಗೆ ಸಾಗಿಸಲಾಗದು.. 
ಇದ್ದಷ್ಟು ಹೊತ್ತು, ಹೊತ್ತು ತಾಳಿ
ಪಡೆದಲ್ಲಿಗೇ ಮರಳಿ ಕೊಡತಕ್ಕದ್ದು 

ಹನಿ ಬಿದ್ದ ಸದ್ದಿಗೆ 
ನೊರೆ ಹಾಲ ಹಬ್ಬಿಗೆ 
ಕುದಿ ಬಂದ ಕಾಲಕೆ 
ಸಿಂಬಳದ ಸಾಕ್ಷಿಗೆ 
ಬಂದಂತೆ ಬಂದು 
ಮತ್ತೆ ಬರುವೆನು ಎಂದು 
ಸಂದಿಸಿದ ಸುಳುವೊಂದ ಬಿಟ್ಟು 
ಪತ್ತೆ ಇಲ್ಲದೆ ಕಳೆದದು
ಬಿಡಿಸಿಯೂ ಒಳ ಗುಟ್ಟು 

ಮಳೆಬಿಲ್ಲ ಬಣ್ಣಗಳ ತನ್ನಲಿರಿಸಿಕೊಂಡು 
ಏರು-ಏರುತ ಹಾಗೆ 
ತಾರೆಯಾಯಿತೇ ಇಂದು?
ತುಟಿಯಿಂದ ನಡೆದು 
ಪುಟಿದು ಅನಂತಕೆ 
ಯಾವ ತಟ ತಲುಪಿತೋ?
ಯಾರ ಪುಟ ಸೇರಿತೋ?

ಮುಗಿದಲ್ಲಿಗೆ ಎಲ್ಲ ಮುಗಿದಂತಲ್ಲ 
ಉಳಿದ ಖಾಲಿತನವೂ ಅಸ್ತಿತ್ವವೇ 
ಬಿಟ್ಟು ಹೊರಟವುಗಳು ನೆನಪಲ್ಲಿ ಉಳಿವಾಗ 
ಅದು ಕೂಡ ಹಿತವಾದ ಸಾಂಗತ್ಯವೇ!

ಚೂರಾದ ನಿನ್ನ ಗಾಜಿನ ಬಳೆಗಳ

ಚೂರಾದ ನಿನ್ನ ಗಾಜಿನ ಬಳೆಗಳ
ಕೊಟ್ಟು ಹೋಗು ಓ ನಲ್ಲೆ
ಬಣ್ಣ ಬೆರೆಸುವ ಆಟವಾಡುತ
ಕೂರುವೆನು ಕಣ್ಣಲ್ಲೇ

ಕೆಂಪು, ಹಸಿರೆನದೆ ಬೇರೆ ಏನಿದೆ?
ಮುಡಿಸಲು ಬಾನಿಗೀಗ
ಬಂದ ದಾರಿಗೆ ಸುಂಕವಿಲ್ಲದೆ
ತೇಲಿ ಸಾಗಿದೆ ಮೇಘ

ಮಳೆ ಬಿಲ್ಲಿಗೂ ಜಡೆ ಬಿಲ್ಲೆಯ 
ನೀಡು ಬೈತಲೆ ಬೊಟ್ಟು
ಹಗಲೇ ಚಂದಿರ ಮೂಡಿ ಬಂದನು
ನಾಚಿಕೆಯನ್ನು ಬಿಟ್ಟು

ಚಳಿಗಾಲಕೆ ಕಾಯದೆ ಹಣ್ಣಾದವು
ಎಲೆಗಳು ಉದುರಲು ಕೆಳಗೆ
ಮಿಂಚಲು ಹಿಂಜರಿದ ನಕ್ಷತ್ರವ
ಕಾಲೆಳೆಯಿತು ಕಾಲ್ನಡಿಗೆ

ಕೆನ್ನೆಯ ಬಟ್ಟಲು, ಮೂಗಿನ ಮೆಟ್ಟಿಲು
ಪಿಸು ಮಾತಿಗೆ ಕರೆವಾಗ
ತುಟಿಯ ಸಣ್ಣ ಬಿರುಕಲಿ ಸಿಲುಕಿ
ಮುಂಗುರುಳಿಗೂ ತುಸು ಜಾಗ

ಎಲ್ಲವೂ ನಿನ್ನ ನೆಚ್ಚಿವೆ ಆದರೆ
ಕರಗದಿರು ನೀ ಸೋತು
ಹೊರಗಿಡು ಹುದುಗಿಹ ಭಾವಗಳ
ಮನದನ್ನೆ ನನ್ನನು ಬಿಟ್ಟು..

ಎಲ್ಲ ಹೇಳಿ ಮುಗಿಸಬೇಡ

ಎಲ್ಲ ಹೇಳಿ ಮುಗಿಸಬೇಡ
ಚೂರು ಉಳಿಸು ನಾಳೆಗೆ
ಬಿನ್ನವಾದ ಬಣ್ಣ ಹೊಸೆವ
ಉಳಿಸಿಕೊಂಡ ನೂಲಿಗೆ

ಬಾಗಿಲಲ್ಲಿ ನಿಂತು ತಿರುಗಿ
ಹೋಗಿ ಬರುವೆ ಎನ್ನುವೆ
ತಡೆದು ಹಿಡಿವ ಮನಸಿನಲ್ಲೇ
ಬಿಟ್ಟು ಕೊಡತ ಬಳಲುವೆ
ಮತ್ತೆ ಸಿಗುವ ವೇಳೆಗಾಗಿ
ಹೊತ್ತು ಕಳೆದು ನೋಡುತ
ದಾರಿ ತುಂಬ ನೆರಳ ಹಾಸಿ
ಹೂವ ಚೆಲ್ಲಿ ಕಾಯುವೆ

ಗಮನವಿರಲಿ ನನ್ನ ಕಡೆಗೆ
ಊರ ತುಂಬ ಚೆಲುವರೇ
ಒಂಟಿಯಾಗಿ ನಡೆದು ಬರಲು
ಅಂಕೆಯಲ್ಲಿ ಉಳಿವರೇ?
ಕೊಟ್ಟು ಕಳಿಸಲೇನು ನೆರಳ
ಬೆರಳ ಹಿಡಿದು ನಡೆಸಲು?
ಸಿಟ್ಟಿನಲ್ಲೂ ಚಂದ ನೀನು
ಬಿಕ್ಕಿಯಾಳು ಅಪ್ಸರೆ!

ದೂರ ದೂರ ಕ್ಷಣಿಕ ಮಾತ್ರ
ಕೂಡ ಬಲ್ಲೆ ನಿಮಿಷದಿ
ನೆನೆದು ನೋಡು ಅಲ್ಲೇ ಸಿಗುವೆ
ಕುಂಟೋ ಬಿಲ್ಲೆ ಆಟದಿ
ಕಣ್ಣ ತೇವ ಹೊತ್ತ ನೋವ
ಹಗುರಗೊಳಿಸಿ ಮರಳುವೆ
ನರಳುವಿಕೆಯು ಹೊರಳಿದಾಗ
ಸಿಗುವ ಪುಟವೇ ನೆಮ್ಮದಿ!

ಎಲ್ಲ ಹೇಳಿ ಮುಗಿಸಬೇಡ
ಚೂರು ಉಳಿಸು ನಾಳೆಗೆ
ಮೌನದಲ್ಲಿ ನೂರು ಅರ್ಥ
ಕಂಡುಕೊಳುವ ಬಾಳಿಗೆ

ಈ ದಾರಿ, ಈ ತಿರುವು, ಏಕಾಂಗಿ ಪಯಣ

ಈ ದಾರಿ, ಈ ತಿರುವು, ಏಕಾಂಗಿ ಪಯಣ
ನಿನ್ನ ಊರಿಗೆ
ಗುರುತು ಚೀಟಿ ಎಲ್ಲೋ ಬಂದ ದಾರಿಯಲಿ
ಕಳೆದು ಹೋಗಿದೆ
ಹುಸಿ ಕಾರಣಗಳು ಸಲೀಸಾಗಿ ಸಿಗಲು ತಡ ಮಾಡುವೆ
ಇಗೋ ಕಣ್ಣ ಮುಗಿಲು ಹನಿ ಜಾರಿ ಬಿಡಲು ತಯಾರಾಗಿವೆ...

"ಸುಖಾಸುಮ್ಮನೆ ಹೊಮ್ಮುವ ತಂಪು ಗಾಳಿ
ಸಮಾಚಾರ ಕೇಳುತ್ತ ಹೊರೆಯಾಗಿದೆ"
ಹುಸಿ ಅಲ್ಲ ನಲ್ಲೆ, ತಡಿ ಬಂದೆ ಇಲ್ಲೇ
ಇದೇ ಸಂಜೆ ಕೊನೆ ನಿನ್ನ ಏಕಾಂತಕೆ!

"ನಿರಾತಂಕವಾಗಿ ನಗು ಮೂಡದೇಕೋ?
ಬಿಗಿ ತೋಳು ಬೇಕೀಗ ಸಾಂತ್ವನಕೆ"
ಕಿಸೆ ತುಂಬ ಪ್ರೀತಿ, ತುಂಬಿ ತಂದೆ ತಾಳು
ಮೂರೇ ಗೇಣಿನ ಅಂತರ ದೂರಕೆ!

"ಈ ಹಾಳಾದ ಸಂತೆಲಿ ಹುಡುಕಾಡಿ ಸೋತೂ
ನಗೆ ಹೊತ್ತ ಮುಖವಾಡ ಸಿಗಬಾರದೇ?"
ಅದೇ ಪಾಡು ಇಲ್ಲೂ, ನಗು ದೂರವಾಗಿ
ಸಿಗೋ ಕನ್ನಡಿ ಜಾರಿ ಚೂರಾಗಿದೆ!

"ಕಿರು ದೀಪ ಹಚ್ಚಿಟ್ಟ ಬೆನ್ನಲ್ಲೇ ಇರುಳು
ಅತಿ ಸಣ್ಣ ಸುಳುವನ್ನು ಕೊಡಬಾರದೇ?"
ಎದೆ ಗೂಡಿನಲ್ಲಿ, ಬರಿ ನೋವ ಕಂತೆ
ವಿನೋದಕ್ಕೆ ನೀ ಬೇಗ ಬರಬೇಕಿದೆ !

Tuesday 7 April 2020

ಅಂಬರದ ತುಂಬ

ಅಂಬರದ ತುಂಬ ನಿನ್ನ ಹೆಜ್ಜೆ ಗುರುತು ಸಂಜೆ ಮೂಡಿದಂತೆ
ಕಿಟಕಿಯ ಗಾಜಿನಲ್ಲಿ ಹನಿಯು ನಿನ್ನ ಹೆಸರ ಗೀಚಿದಂತೆ (೨)
ನಿಧಾನಿಸದೆ ಆsss, ಕಾಣಿಸು ಬೇಗ 
ಮಿಡಿಯುತಿದೆ ನನ್ನ ಹೃದಯ 
ನೀನೊಮ್ಮೆ ಕೇಳಿ ಮೊರೆಯ 
ನೀ ನಿಜವೆಂದು ಹೇಳಿ ಮರೆಯಾಗು ಓ..
ಅಂಬರದ ತುಂಬ ನಿನ್ನ ಹೆಜ್ಜೆ ಗುರುತು ಸಂಜೆ ಮೂಡಿದಂತೆ
ಕಿಟಕಿಯ ಗಾಜಿನಲ್ಲಿ ಹನಿಯು ನಿನ್ನ ಹೆಸರ ಗೀಚಿದಂತೆ

ಮರಳಿನ ಮೇಲೆ ಪ್ರಣಯದ ಬರಹ, ಅಲೆಗಳು ಕೇಳಿಸಿವೆ 
ಹುದುಗಿದ ಭಾವಗಳ ಚಿಪ್ಪನು ತೆರೆದು ಉಸಿರ ತುಂಬಿರುವೆ 
ಓ..  ಮರಳಿನ ಮೇಲೆ ಪ್ರಣಯದ ಬರಹ, ಅಲೆಗಳು ಕೇಳಿಸಿವೆ 
ಹುದುಗಿದ ಭಾವಗಳ ಚಿಪ್ಪನು ತೆರೆದು ಉಸಿರ ತುಂಬಿರುವೆ 
ಎದುರಾದರೆ ನೀ, ಹಗುರಾಗುವೆನು
ಸ್ವರ ಸಂಚಯಕೆ ಜೊತೆಯಾಗುವೆನು 
ಹೇಗಾದರೂ ಕನಸನು ನನಸು ಮಾಡೆಯಾ? (೨)
ಮಿಡಿಯುತಿದೆ ನನ್ನ ಹೃದಯ 
ನೀನೊಮ್ಮೆ ಕೇಳಿ ಮೊರೆಯ
ನೀ ನಿಜವೆಂದು ಹೇಳಿ ಮರೆಯಾಗು ಓ..
ಅಂಬರದ ತುಂಬ ನಿನ್ನ ಹೆಜ್ಜೆ ಗುರುತು ಸಂಜೆ ಮೂಡಿದಂತೆ
ಕಿಟಕಿಯ ಗಾಜಿನಲ್ಲಿ ಹನಿಯು ನಿನ್ನ ಹೆಸರ ಗೀಚಿದಂತೆ... 

ಮುಗಿಯದ ಮಾತೊಂದು ಕಣ್ಣಲಿ ಜಿನುಗಿ ಖುಷಿಯಲಿ ಜಾರುತಲಿದೆ 
ಮರಳಿ, ಮರಳಿ ಮರುಳಾಗಿಸುತ ಸುಮ್ಮನೆ ಕಾಡುತಿದೆ 
ಓ... ಮುಗಿಯದ ಮಾತೊಂದು ಕಣ್ಣಲಿ ಜಿನುಗಿ ಖುಷಿಯಲಿ ಜಾರುತಲಿದೆ 
ಮರಳಿ, ಮರಳಿ ಮರುಳಾಗಿಸುತ ಸುಮ್ಮನೆ ಕಾಡುತಿದೆ 
ಎದುರಾದರೆ ನೀ, ಹಗುರಾಗುವೆನು
ಸ್ವರ ಸಂಚಯಕೆ ಜೊತೆಯಾಗುವೆನು 
ಹೇಗಾದರೂ ಕನಸನು ನನಸು ಮಾಡೆಯಾ? (೨)
ಮಿಡಿಯುತಿದೆ ನನ್ನ ಹೃದಯ 
ನೀನೊಮ್ಮೆ ಕೇಳಿ ಮೊರೆಯ
ನೀ ನಿಜವೆಂದು ಹೇಳಿ ಮರೆಯಾಗು ಓ..
ಅಂಬರದ ತುಂಬ ನಿನ್ನ ಹೆಜ್ಜೆ ಗುರುತು ಸಂಜೆ ಮೂಡಿದಂತೆ
ಕಿಟಕಿಯ ಗಾಜಿನಲ್ಲಿ ಹನಿಯು ನಿನ್ನ ಹೆಸರ ಗೀಚಿದಂತೆ... 

Monday 6 April 2020

ಮರೆತು ಬಿಡಬಹುದಿತ್ತು ಘಟಿಸಿದ ಕ್ಷಣಗಳ

ಮರೆತು ಬಿಡಬಹುದಿತ್ತು ಘಟಿಸಿದ ಕ್ಷಣಗಳ 
ನೆನಪಲ್ಲಿ ಇರಿಸಿಕೊಳ್ಳುವುದರ ಬದಲು 
ಬೆರೆತು ಬಿಡಬೇಕಿತ್ತು ತೆರೆದ ತೋಳುಗಳಲ್ಲಿ 
ಅಂತರ ಕಾದಿರಿಸಿಕೊಳ್ಳೋ ಮೊದಲು 

ಹರಿದು ಹಾಕುವ ಮುನ್ನ ಕೊಟ್ಟುಬಿಡಬೇಕಿತ್ತು 
ಮನಸಿಟ್ಟು ಬರೆದುಕೊಂಡ ಓಲೆಯ 
ನಾಲ್ಕು ಸಾಲುಗಳಲ್ಲಿ ಬಿಡಿಸಿ ಹೇಳಲು ಸುಲಭ 
ಒಗಟಲ್ಲೇ ಹೆಚ್ಚು ಸುಖವಂತು ಪ್ರಣಯ 

ಕಣ್ಣು ಕೂಡುವ ವೇಳೆ ಓಡುವ ಸಮಯವನು
ಲೆಕ್ಕಿಸದೆ ತಡ ಮಾಡಿ ಬಿಟ್ಟೆ 
ಮರಳಿನ ಮೇಲೆ ಜೋಡಿ ಹೆಸರ ಗೀಚುತಲೇ 
ಅಲೆಗಳಿಗೆ ಪರಿಚಯಿಸಿ ಕೊಟ್ಟೆ 

ಬಿಡದೆ ಪ್ರಶ್ನಿಸು ಎಲ್ಲವ ಸಿಗಲು ಮತ್ತೊಮ್ಮೆ 
ಅರ್ಹಳು ನೀ ಎಲ್ಲದಕ್ಕೂ 
ಗೊಂದಲಗಳೇನಿರಲಿ ಪರಿಹರಿಸು ಈ ಪಾಡು 
ಇದ್ದದ್ದೇ ಕಾಲ ಕಾಲಕ್ಕೂ 

ಎಲ್ಲ ಮುಗಿದು ಏನೂ ಆಗದಂತಿರಬೇಕು 
ಪ್ರಳಯವೊಂದು ಬರಲಿ ಬೇಗ 
ಮುಳುಗುವ ವೇಳೆಯಲಿ ಕೂಗಿ ಕರೆಯದಿರು 
ಗೋರಿಯಲಿ ಕೊಡುವಂತೆ ಜಾಗ!

ಪ್ರೀತಿಯಲಿ ಕೋಪವನು ಸಹಿಸಿಕೊಳ್ಳುವ...

ಪ್ರೀತಿಯಲಿ ಕೋಪವನು ಸಹಿಸಿಕೊಳ್ಳುವ 
ನೋವಿನಲೂ ಪ್ರೀತಿಯನು ಕಂಡುಕೊಳ್ಳುವ 
ಏನೇ ಬರಲಿ ಎಲ್ಲವನ್ನೂ ಹಂಚಿಕೊಳ್ಳುವ 
ಏನೂ ಇರದೆ ಎಲ್ಲ ಇರುವ ಹಾಗೆ ಬಾಳುವ 

ಪ್ರೀತಿಯಲಿ ಕೋಪವನು ಸಹಿಸಿಕೊಳ್ಳುವ... 

ಮುಳ್ಳ ಹೊತ್ತ ಬೇಲಿ ಗಿಡದಿ ನಗುವ ಹೂವು 
ಅಂತೆಯೇ ಇರಲಿ ಬಾಳಿನಲ್ಲಿ ಬೆಲ್ಲ-ಬೇವು 
ಚಿವುಟಿ ಬಿಟ್ಟೆ ನಿನ್ನ ಆಸೆಯ ಹಣ್ಣೆಲೆಯ 
ಉರುಳಿಸಿ ಬಿಟ್ಟೆ ಅಷ್ಟು ಮಾತ್ರಕೆ ಕಂಬನಿಯ 

ಪ್ರೀತಿಯಲಿ ಕೋಪವನು ಸಹಿಸಿಕೊಳ್ಳುವ...

ಬಗೆ ಬಗೆ ಬಣ್ಣಗಳ ನಿನ್ನಲಿ ಕಂಡಿಹೆನು 
ಕೆಂಗಣ್ಣಿಗೆ ಅಂಜಿ ಕದ್ದು ಈಗ ಅಡಗಿಹೆನು 
ಕೇಳಲು ಬರಲಿಲ್ಲ ಶಿಕ್ಷೆಗೆ ವಿನಾಯಿತಿ 
ಆಲಿಸು ಎದೆ ಬಡಿತ ನೀನೂ ಬೆಚ್ಚಿ ಬೀಳುತಿ 

ಪ್ರೀತಿಯಲಿ ಕೋಪವನು ಸಹಿಸಿಕೊಳ್ಳುವ...

ಜಗಳಕೆ ಹುಡುಕಿ ಹುಡುಕಿ ಸಿಕ್ಕುವುದು ಕಾರಣ 
ಸರಸ ವಿನಾಕಾರಣ ಹುಟ್ಟಲು ರೋಮಾಂಚನ 
ಕಡಿದ ಬೆಣ್ಣೆ ಮುದ್ದೆ ಸವಿದಂತೆ ಸಂಸಾರ 
ಏನೇ ನಡೆದರೂ ಒಳಗುಟ್ಟೊಂದೇ ಪರಿಹಾರ 

ಪ್ರೀತಿಯಲಿ ಕೋಪವನು ಸಹಿಸಿಕೊಳ್ಳುವ...

ಇಳಿ ಹೃದಯದಲಿ ಸರಾಗ

ನನ್ನ ಜೊತೆ ನೀನಿರಲು
ಸುರಿದಂತೆ ಬೆಳದಿಂಗಳು
ಉಸಿರು ನಿಂತಾಗ ನೀ
ನೆರವಾಗು ಬದುಕಿಸಲು 
ಸದಾ ಕನಸಿನಲೂ ಬಿಡದೆ..

ನಿನ್ನೆಲ್ಲ ಆಸೆಗಳನ್ನು ಕೊಡು ನನಗೆ
ಹೇಗಾದರೂನು ಪೂರೈಸುವೆ
ನಿನ್ನಿಷ್ಟಕೆ ನಾ ಹಾಡುವೆ
ಈ ಕಣ್ಣಿನಲ್ಲೇ ಕಾಪಾಡುತ
ನೋವೆಲ್ಲವ ನಾ ನುಂಗುವೆ

ದಾರಿ ತೋಚದ ನನ್ನ ಯಾನಕೆ
ದೀಪವಾದೆ ನೀ ನಲ್ಲ
ಮೋಡಿಗಾರನೇ ನಿನ್ನ ಮಾತಿಗೆ
ಸೋತು ಹೋದೆ ಸುಳ್ಳಲ್ಲ
ನಡೆಯುವೆ ಕೊನೆವರೆಗೆ
ಕೊಡುತಲಿ ಸಿಹಿಯ ನಗೆ
ಇದೇ ಥರ ಇರು
ನೂರಾರು ಬೆರಗುಗಳ ತರೋ
ಮಳೆಯಂತೆ ಧರೆಗೆ.. ಆಆಆ

ದೂರ ದೂರ ಸಾಗಿ ನಿಂತೆವು
ಇನ್ನೂ ಹತ್ತಿರಕ್ಕೆ ಬಂದೆವು
ಇದು ಕನಸೆಲ್ಲವೂ 
ನನಸಾಗುವ ಸಮಯ 
ಇಳಿ ಹೃದಯದಲಿ ಸರಾಗ..

ರಂಗೋಲಿ ಗೀಚಿರುವೆ ಎದೆ ಬಾಗಿಲಲಿ
ನೀ ಬಂದ ಮೇಲೆ ರಂಗೇರಿದೆ
ಸಿಂಗಾರಕೆ ಸಜ್ಜಾಗಿದೆ
ನೀ ನೆಟ್ಟು ಹೋದ ಹೂದೋಟದಿ
ಹೂ ಬೀರಲು ಮುಂದಾಗಿದೆ...

ಎಲ್ಲ ತಪ್ಪಿಗೂ ಊಫಿ, ಎಲ್ಲವೂ ಮಾಫಿ

ಹೂವ ಹೊಸಕಿದ ಪಾಪ
ಜೀನ ಹೀರಿದ ಕೋಪ
ತೀರಿಸಿಕೊಳ್ಳಲು ಬಂತು ದುಂಬಿ
ಕತ್ತಲಲಿ ದಾರಿ ತಪ್ಪಿತು ಹಿತ್ತಲಿಗೆ ಹಾರಿ
ರಾಶಿ ಹೂವ ಗೊಂಚಲ ನಶೆಯಬ್ಬರಕೆ
ಎಲ್ಲ ತಪ್ಪಿಗೂ ಊಫಿ, ಎಲ್ಲವೂ ಮಾಫಿ

ಶಾಂತ ಮೌನದ ಕ್ರಾಂತಿ
ತಿಂಗಳ ಮೈ ಕಾಂತಿ ಬಣ್ಣಿಸಿದೆ
ಕಂಡು ಹೋಗಲು ಬಂದ ಚಂದ್ರ 
ಕಿಟಕಿಯ ಇಣುಕಿ ನೋಡಲು ಬೆಳ್ಳಿ 
ಕೊಳಗ ಹಾಲ ಬಿಸಿ ಹಬೆಗೆ ಸಿಕ್ಕವನಾಗಿ
ಎಲ್ಲ ತಪ್ಪಿಗೂ ಊಫಿ, ಎಲ್ಲವೂ ಮಾಫಿ

ಕಣ್ಣು ತಾರೆಗಳೆಂದು
ಹೊನ್ನ ಹೂಡಿಹವೆಂದೆ
ತಾರಕೆವೇ ಬಿರಬಿರನೆ ಧರೆಗಿಳಿದು ಬಂತು
ಕಪ್ಪು ಮಸಿ ಬಳಿದವಳ ಗಲ್ಲಕ್ಕೆ ಗುರಿಯಿಟ್ಟು
ಶಿರ ಬಾಗಿ ರಸಗವಳ ಸವಿಯುತ್ತ ಶೃಂಗಾರ
ಎಲ್ಲ ತಪ್ಪಿಗೂ ಊಫಿ, ಎಲ್ಲವೂ ಮಾಫಿ

ಕೊರಳ ಕೊಳಲಿನ ಮೇಲೆ
ಬೆರಳ ಉರುಳಿಸಿದಂತೆ
ಹೊಮ್ಮುವ ನಾದಕ್ಕೆ ಸೋತಂತೆ ತಂಗಾಳಿ
ವಿದ್ವತ್ತನು ಮರೆತು, ಉನ್ಮತ್ತನ ಅರಸಿ
ಸಿಕ್ಕ ಸಾಕ್ಷಿಗೆ ಆರಿಸಿ ದೀಪದ ಕಿಡಿಯ
ಎಲ್ಲ ತಪ್ಪಿಗೂ ಊಫಿ, ಎಲ್ಲವೂ ಮಾಫಿ
ಧೂಪ ರೇಖೆಯ ದಾಟಿ
ಗುಟ್ಟು ಗುಟ್ಟಾಗಿರಿಸಿ
ಒಬ್ಬರೊಬ್ಬರ ಶಕುತಿ ಮುಕುತಿಯಂಚಲ್ಲಿ
ಅಲ್ಪ ವಿರಾಮದ ಯೋಗ ಸಮಾಪ್ತಿಗೆ
ಸಿಕ್ಕಲ್ಲಿ ನುಸುಳಿ ನಸುಕು ಬೆಳಕು ಹರಿದಂತೆ
ಎಲ್ಲ ತಪ್ಪಿಗೂ ಊಫಿ, ಎಲ್ಲವೂ ಮಾಫಿ...

ಕನ್ನಡಿಯ ಮುಖವನ್ನೇ ಬೇಡುವ ನಿನಗೆ

ಕನ್ನಡಿಯ ಮುಖವನ್ನೇ ಬೇಡುವ ನಿನಗೆ
ಅಸಲಿ ಚಹರೆಯ ಕುರಿತು ನೂರು ತಕರಾರು
ಬಿಂಬ ನಗುತಿಲ್ಲವೆಂದು ಅಳಲು ತೋಡುವೆ
ಸಂತೈಸಲು ನಿನಗೆ ನೀನೇ, ಮತ್ತಾರು?

ತುತ್ತು ತುತ್ತಿಗೂ ತೊಟ್ಟು ಕಣ್ಣೀರ ಬೆರೆಸಿ
ಉಪ್ಪು ಉಪ್ಪೆಂದರದು ಯಾರ ತಪ್ಪಾದೀತು
ಮುನಿಸಲ್ಲೇ ಎಲ್ಲವ ಗೆಲ್ಲ ಹೊರಟು ನಿಂತೆ
ತೇಲಿಸದೆ ವಿಷಯ ದಡ ಹೇಗೆ ತಲುಪೀತು?

ಅಂಟಿ ಕೂತರೂ ನಡುವೆ ಗೋಡೆ ಕಟ್ಟಿರುವೆ
ನಿಂತು ಕಾದರೂ ದಾಟಿ ಮುಂದೆ ಸಾಗಿರುವೆ
ಅಲೆಯಂತೆ ನಿನ್ನ ತಲುಪಲು ಕಷ್ಟವೇನಲ್ಲ
ಹೊತ್ತು ತರಲಾರೆ ಪ್ರತಿ ಬಾರಿ ಮುತ್ತನ್ನು!

ಹೇಳಿಕೊಡಬೇಕಾದ ಪ್ರಾಯವಲ್ಲ ನಿನದು
ಹೇಳಿಕೊಟ್ಟವರಿಗಿದ ತಿಳಿಸಿಬಿಡು ಮುಂದೊಮ್ಮೆ
ತಡವಾಗಿ ಮುದ ನೀಡಬಹುದು ನೆನೆ ಮಾತುಗಳ
ಮರೆತರೆ ಕರೆ ನೀಡು ಬರುವೆ ಮತ್ತೊಮ್ಮೆ

ಏಕಾಂತವೂ ಅಪೂರ್ಣವಾಗುವುದು ಕೆಲವೊಮ್ಮೆ
ವಿರಹ ಪ್ರಾಭಲ್ಯ ಕ್ಷೀಣಿಸಿದಂತೆ ಚೂರು
ಅತಿಯಾದ ಪ್ರೀತಿ ಕೊಟ್ಟು ಜೊತೆಗೆ ಇದ್ದುಬಿಡು
ಅಥವ ಅಷ್ಟೇ ಆಳದ ನೋವನುಣಿಸು...

Friday 3 April 2020

ಪುಟ್ಟ ಪುಟ್ಟ ಹೆಜ್ಜೆ ಗುರುತ

ಪುಟ್ಟ ಪುಟ್ಟ ಹೆಜ್ಜೆ ಗುರುತ
ಬಿಟ್ಟು ಸಾಗಿ ಬಹಳ ಕಾಲ
ಮರಳಿ ಬಂದೆ ಮೊರೆಯ ಕೇಳಿ
"ಏನ ಕೊಡುವೆ?" ಎನ್ನುತ
ಪಾದ ರಕ್ಷೆ ಮಾಡಿ ಕಾದೆ
ವೇಳೆ ಮುಗಿದು ಸುಮ್ಮನಾದೆ 
ನೋಡು ಈಗ ಏರುತಿಲ್ಲ 
ಬೆಳೆದು ನಿಂತೆ ಮನ್ಮಥ 

ಸಣ್ಣ ಬೆಣ್ಣೆ ಮುದ್ದೆ ಮಾಡಿ 
ಉಣ್ಣಿಸುತ್ತಲಿದ್ದೆ ಅಂದು 
ಬೆಳ್ಳಿ ಬಟ್ಟಲಲ್ಲಿ ತುಂಬಿ 
ಅತ್ತ ಇತ್ತ ಓಡುತ 
ಬೆಣ್ಣೆ ಗಡಿಗೆ ಎಲ್ಲಿ ಎಂದು 
ಹುಡುಕುತಾವೆ ಕಣ್ಣು ಈಗ 
ಬಟ್ಟಲನ್ನೇ ಬಾಯಿಗಿಳಿಸಿ 
ಒಂದೇ ಸಾರಿ ನುಂಗುತ 

ಭಂಗಿಯನ್ನು ಹೋಲುವಂತೆ 
ನೂಲ ಕೊಟ್ಟು ಮಗ್ಗದಲ್ಲಿ 
ನೇಯ್ದು ಬಟ್ಟೆ ಮಾಡಿ ನಿನಗೆ 
ಅಂಗಿ ಸಿದ್ಧವಾಯಿತು 
ಬಣ್ಣ ಇಷ್ಟವಾಯಿತೆಂದು
ಹಿಗ್ಗಿ ತೊಡಿಸಲೆಂದು ಬಂದೆ 
ತೊಳಿಗೇರಲಿಲ್ಲ ಅದಕೆ 
ಮನಸು ಚೂರು ಬಿಕ್ಕಿತು 

ತೋರು ಬೆರಳ ಹಿಡಿಯಲೆಂದು 
ನಿನಗೆ ನೀನೇ ಅಡ್ಡಲಾಗಿ 
ಎಲ್ಲ ಮೀರಿ ಚೀರಿ ಬಂದು 
ಸೇರುತಿದ್ದೆ ನನ್ನಲಿ 
ಬಲಿತ ನಡಿಗೆ ನೇರ ಈಗ 
ಗುರಿಯೂ ಅಷ್ಟೇ ದಿಟ್ಟವಾಗಿ 
ಏನು ಮೊನಚು ದೃಷ್ಟಿ
ಮತ್ತದೇನು ಸ್ಥೈರ್ಯ ನಿಂತಲಿ 

ಮುಂಚೆ ಕೆನ್ನೆ ಸವರಿದಂತೆ 
ಸವರಿ ಹೋಗು ಒಮ್ಮೆ ಬೇಗ 
ಬೆಚ್ಚಗಿನ ಹಸ್ತಕೊಮ್ಮೆ 
ಕದ್ದು ಮುತ್ತ ನೀಡುವೆ
ಬಿದ್ದ ಕನಸಿನಲ್ಲಿ ತಡವಿ 
ಹೊದ್ದ ಮುನಿಸ ಮೆಲ್ಲಗೆಡವಿ 
ನೀನು ಹಾಕೋ ತಾಳಕೆಂದೂ 
ಇಚ್ಛೆಯಿಂದ ಕುಣಿಯುವೆ... 

Wednesday 1 April 2020

ಹೃದಯ ಕದ್ದವಳು

ಮುಳ್ಳಿಗೆ ಮನಸೆಲ್ಲಿದೆ, ಚುಚ್ಚುವುದೇ ಚಳಿಯೇ
ದಾರಿಗಡ್ಡಿಪಡಿಸಿ ನೋವ ಕೊಡುವ ಆಟ ಸಹ್ಯವೇ?
ಒಂಟಿ ಕಾಲ ನಡಿಗೆಗೆ ಅಧಿಕ ವೇಳೆ ಬೇಕಿದೆ 
ಕಾದು ಕೂರು ಅಲ್ಲೇ ಇಗೋ ಕೊನೆಯ ತಿರುವು ಸಿಕ್ಕಿದೆ 

ಕಿತ್ತು ಎಸೆದೆನಾದರೂ, ನಂಜು ಪಾದಕೇರಿದೆ 
ನೆತ್ತರಲ್ಲಿ ಬೆರೆತು ತಾನು ಮೈಯ್ಯ ಪೂರ ಹಬ್ಬಿದೆ 
ಕಣ್ಣು ಮಂಜು, ಕುರುಡು ದಾರಿ, ಮಾತು ಸತ್ತ ಹಾಗಿದೆ 
ನಿನ್ನ ಎದೆಯ ಬಡಿತಕ್ಕಿಂತ ನೂರು ಪಟ್ಟು ಹೆಚ್ಚಿದೆ 

ತಲೆಗೆ ಏರಿದ ವಿಷ, ಮೆದುಳ ಕದಡಿ ಬಿಟ್ಟಿತು 
ಉರುಳಿ ಬಿಟ್ಟು ಹನಿಗಳ ಹಣೆಯು ಬೆವರಿಕೊಂಡಿತು 
ಹತ್ತಿರ ಆಗುವ ಹಂಬಲವಿದೆ ಓಟಕೆ 
ಅಸಲು ಇಟ್ಟ ಹೆಜ್ಜೆ ಕಿತ್ತು ಇಡಲು ಆಗದಂಜಿಕೆ 

ಸರತಿ ಸಾಲಿನಲ್ಲಿ ನಿಲ್ಲಲೆಂದು ಬಂತು ಸೂಚನೆ 
ನಾನು ಕೆನೆಗೆ ಉಳಿದುಕೊಂಡೆ ಮುಂದೆ ಮಂದೆ ಮಂದೆ 
ಎಲ್ಲರಲ್ಲೂ ನನ್ನ ಹಾಗೇ ತೀರದ ಕುತೂಹಲ 
ಸಮಯ ಮುಳ್ಳು ಚಲಿಸುವಂತೆ ಸಾಗಿ ಹೊರಟೆ ಮುಂದೆ 

ಎಲ್ಲ ಬಗಿದು ನಿಂತರು ತಮ್ಮ ತಮ್ಮ ಎದೆಗಳ 
ಬತ್ತಿ ಹೋದ ಅಂಗದೊಡನೆ ತಾಜಾ ಪುಷ್ಪ ಹಿಡಿದು 
ಬಗಿದು ಸೀಳಿಕೊಂಡೆ ಎದೆಯ ಹುಡುಕಿ ಹುಡುಕಿ ಸೋತೆ 
ಎಂದೋ ತಿಂದು ತೇಗಿದವನಂತೆ ಬೆಚ್ಚಿ ಕೂತೆ 

ಮುಂದೆ ಸಾಗಲು ಸಾಲು ನಾಲ್ಕು ರಾತ್ರಿಯ ಮೀರಿ 
ಸಿಕ್ಕವಳು ಅವಳೇ, ಮುಳ್ಳ ನೆಟ್ಟವಳು 
ಖಾಲಿ ಕೈ ಹೊಂದಿದವನ ಅರಸಿದವಳಂತೆ 
ನಂಜನ್ನು ಹೀರಿ, ಹೃದಯ ಕಸಿ ಮಾಡಿ ಬಿಟ್ಟಳು
ಜೀವ ತುಂಬುವ ಪ್ರೇಮ ಅಮೃತವ ಕೊಟ್ಟಳು... 

ಪೊರೆಯನ್ನು ಕಳಚಿದ ಮರುಕ್ಷಣ

ನಿನ್ನಿಷ್ಟಗಳಲಿ ನಾನಿಲ್ಲದ ನಿಜವ
ನಿಷ್ಠುರವಾಗಿ ನುಡಿವ ನೀನು
ನನ್ನ ನೆಚ್ಚಿಕೊಂಡಿರುವುದಕ್ಕೆ ನಿದರ್ಶನವೆಂದು
ನಾ ಬಲವಾಗಿ ನಂಬಿರುವೆ

ನೀ ತಾಳುವ ನಿಲುವು
ನನ್ನತ್ತ ಧಿಕ್ಕಾರ ಭಾವ ಸೂಸುತ್ತಲೇ
ಸೆಳೆಯಲು ಚಡಪಡಿಸಿದಂತೆಲ್ಲ
ಅದು ನನ್ನ ಸ್ವೀಕಾರವೆಂಬಂತೆ ಭಾವಿಸುವೆ

ನನ್ನ ನಿರ್ಗಮನಕೆ ಆಗಮಿಸುವ ಖುಷಿ
ನನ್ನನ್ನೇ ಕೇಂದ್ರೀಕರಿಸಿಕೊಂಡಿತ್ತೆಂಬ ಕಾರಣ
ಮುನಿದು ನೀ ನನ್ನ ಅಮಾನತ್ತಿನಲ್ಲಿಟ್ಟಾಗ 
ಅನುಪಸ್ಥಿತಿಯಲ್ಲಾದರೂ ಒಂದಿಷ್ಟು ಕಾಡುವೆ

ವಿಸ್ತರಿಸಿದ ನಿನ್ನ ಕನಸುಗಳ ಪಾಲಿಗೆ
ನಾ ಅಪ್ರಸ್ತುತ ಅನಿಸುವಷ್ಟಾದರೂ
ತಿರಸ್ಕಾರಕ್ಕೆ ನನ್ನ ನೆನಪಿಸಿಕೊಂಡಾಗ 
ಕೃತಜ್ಞನಾಗಿ ನಮಸ್ಕರಿಸಿ ಉಳಿದುಬಿಡುವೆ

ಯಾರದ್ದೋ ಮುಲಾಜಿಗೆ ಅಂಜಿ
ಹತ್ತಿರ ಬಂದಷ್ಟೇ ದೂರ ಉಳಿದು
ಧರಿಸಿದ ಕೃತಕ ನಗುವಿನ ಪೊರೆಯನ್ನು 
ಕಳಚಿದ ಮರುಕ್ಷಣ ಸಣ್ಣ ಮಾತಿಗೆ ಸಿಗುವೆ!

ಖಾಲಿ ತೀರದ ಮೇಲೆ

ಖಾಲಿ ತೀರದ ಮೇಲೆ ಮೂಡಿದೆ 
ಸಾವಿರಾರು ಹೆಜ್ಜೆ ಗುರುತು 
ಗೆಜ್ಜೆ ಕಟ್ಟಿದ ಪಾದ ನನ್ನದು 
ಮೌನ ತಾಳಿತೆಲ್ಲವ ಮರೆತು 
ಆಸೆ ಬಯಲಿಗೆ ಬೇಲಿ ಹಾಕಲು 
ಹಾರಬೇಕಿದೆ ರೆಕ್ಕೆ ಪಡೆದು 
ಹುಡುಕಿ ಬರಲೇ ನಿನ್ನ ಮನೆಯ 
ಮಿಡಿದ ಎದೆಯ ಸದ್ದ ಹಿಡಿದು 

ಬೇರು ಹೊಕ್ಕಿದೆ ಮನಸಿನಾಳ 
ಚಿಗುರು ಕಾಲಕೆ ಕ್ಷಣಗಣನೆ 
ನೆಟ್ಟು ಹೋದೆ ಅಂದು ಒಲವ
ಬಿಟ್ಟ ಹೂಗಳದೊಂದೇ ಪ್ರಾರ್ಥನೆ 
ಆಗು ನೀ ಈ ಬಳ್ಳಿ ಹಬ್ಬಿಗೆ 
ಮರದ ಟೊಂಗೆ, ಭವದ ಹಂಗು 
ಕಲ್ಪಿಸಿಕೊಳಲು ನಿನ್ನ ಉಸಿರ 
ಹೆಚ್ಚಿಕೊಂಡಿತು ಕೆನ್ನೆ ರಂಗು 

ಸುತ್ತ ಕತ್ತಲು ಮುರಿದ ಬಾಗಿಲು 
ಕಣ್ಣ ತುಂಬ ಬೆಂದ ಕಂಬನಿ 
ಬಿಂಬ ಸೂಸುವ ಗಾಜಿನೊಡಲಿಗೂ 
ವಿಸ್ತರಿಸಿದೆ ಬಿರಿದ ಮಾರ್ದನಿ 
ದಟ್ಟ ನೋವಿನ ಕಾನನದಲಿ 
ಕಳೆದ ನಗುವಿನ ಪತ್ತೆ ಹಚ್ಚಿ 
ಬಂದು ಮುಡಿಸು ನೊಂದ ತುಟಿಗೆ
ಆದ ಗಾಯಕೆ ಬೆರಳ ಚಾಚಿ.. 

ಯಾರೊಂದಿಗೆ ನಾ ಹೇಳಲಿ

ಯಾರೊಂದಿಗೆ ನಾ ಹೇಳಲಿ
ನೂರಾರಿವೆ ಭಾವನೆ, ನೀನೊಮ್ಮೆ
ಮಾತಾಡಿಸು ಈ ಗಾಯಕೆ
ನೀನಾಗಬೇಡ ಹೊಣೆ, ಮತ್ತೊಮ್ಮೆ
ಈಗಾಗಲೇ ತಪ್ಪಾಗಿದೆ
ಸಾಲೆಲ್ಲವೂ ಚಿತ್ತಾಗಿದೆ
ಗೊತ್ತಾಗದೆ ಎದೆಯಲ್ಲಿ ನೋವನ್ನು 
ಹೊತ್ತಂತೆ ಹೀಗೇಕೆ ಒದ್ದಾಡಿಹೆ..

ಅನಿರೀಕ್ಷಿತ ಹುಟ್ಟೋದು ಈ ಪ್ರೀತಿ
ತರಬೇತಿ ಕೊಡಬಾರದೇ
ಪರದಾಟಕೂ ಸರಿಯಾದ ಸಮಯಕ್ಕೆ
ಪರಿಹಾರ ಸಿಗಬಾರದೇ
ಬಲಹೀನರೇ ಬಲೆಯಲ್ಲಿ ಸಿಲುಕೋದು
ಅನ್ನೋದು ರೂಢಿಗತ
ಅನುಮಾನವೇ ಇಷ್ಟೆಲ್ಲ ನಡೆವಾಗ
ನಿನ್ನನ್ನು ತಡೆ ಹಾಕಿತಾ?
ಒದ್ದಾಟಕೂ ಮಿತಿಯಿಲ್ಲವೇ
ಕದ್ದಾಲಿಸೋ ಮನಸಿಲ್ಲವೇ
ಕೊಡಬಾರದೇ ಹೃದಯಕ್ಕೆ ಮತ್ತೊಂದು
ಅವಕಾಶವ ಎಂದು ಒದ್ದಾಡಿಹೆ..

ಕಣ್ಣಂಚಲಿ ಬರಬೇಡ ಹನಿಯಾಗಿ
ಬಾಯಾರಿದೆ ಕೆನ್ನೆಯು
ತಂಗಾಳಿಯ ತರಬೇಡ ಉರಿವಾಗ
ಎದೆ ಗೂಡಲಿ ಜ್ವಾಲೆಯು
ಈ ದೂರವ ಅಳೆಯೋಕೆ ಬರುವಾಗ
ಬಹು ಬೇಗ ಕೊನೆಗಾಣಿಸು
ಶರಣಾಗುವೆ ಋಣಿಯಾಗಿ ಒಲವಲ್ಲಿ
ಖುಷಿಯೊಂದ ದಯಪಾಲಿಸು
ಆಲಾಪವೇ ಮುಂದಾಗಿಸು
ಆನಂತರ ನಾ ಹಾಡುವೆ
ಸಂಗೀತವೂ ಸಂಗಾತಿಯ ಬೇಡೆ
ನಿನ್ನನ್ನು ನೆನೆಯುತ್ತ ಒದ್ದಾಡಿಹೆ..

ಕೋರಸ್ಸಿನಲ್ಲಿ ಹಾಡಿಕೊಳ್ಳಿರಿ

ಕೋರಸ್ಸಿನಲ್ಲಿ ಹಾಡಿಕೊಳ್ಳಿರಿ
ಆದಷ್ಟು ವೈರಸ್ ಇಂದ  ದೂರ ನಿಲ್ಲಿರಿ 

ರಾಗ ಯಾವುದಾದರೇನು ಹಾಡು ಮುಖ್ಯ ತಾನೆ
ತಾಳ ತಪ್ಪಿದಾಗ ಯಮನೇ ಆದ್ರೂ ಓಡುತಾನೆ
ಅಪಶೃತಿ ತುಂಬ ಮುಖ್ಯ ನಮ್ಮ ಹಾಡಲಿ
ಕೇಳಿದ ಕೂಡಲೆ ಕರೋರ ಬಿಕ್ಕಿ ಸಾಯಲಿ

ಕೋರಸ್ಸಿನಲ್ಲಿ ಹಾಡಿಕೊಳ್ಳಿರಿ
ಆದಷ್ಟು ವೈರಸ್ ಇಂದ  ದೂರ ನಿಲ್ಲಿರಿ 

ಸೋಪು ಹಾಕಿ ತಿಕ್ಕಿ ಮೊದಲು ಕೈಯ್ಯನು
ತುರಿಕೆ ಆದ್ರೂ ಕೆರೆದುಕೊಳ್ಳ ಬೇಡಿ ಮೂಗನು 
ಶೀತ-ನೆಗಡಿ-ಕೆಮ್ಮು ಎಲ್ಲ ಮುಂಚೆ ಕಾಮನ್ನು
ಈಗ ತಾವೇ ಜೀವಕಾದವಲ್ಲ ದೊಡ್ಡ ದುಶ್ಮನ್ನು
ಇಪ್ಪತ್ತ ಒಂದು ದಿನ ಇದ್ದುಬಿಡಿ ಮನೆಯಲಿ
ಅಷ್ಟರಲ್ಲಿ ಚೂರು ಕಮ್ಮಿ ಆಗಬಹುದನಾಹುತ
ಲಾಟಿ ಏಟಿಗಿಂತ ಸ್ಟ್ರಾಂಗು ವೈರಸ್ಸಿನೇಟು
ಸ್ವಲ್ಪ ಯಾಮಾರಿದ್ರೂ ಉಳಿಯೋದೇ ದೌಟು... 

ಕೋರಸ್ಸಿನಲ್ಲಿ ಹಾಡಿಕೊಳ್ಳಿರಿ
ಆದಷ್ಟು ವೈರಸ್ ಇಂದ  ದೂರ ನಿಲ್ಲಿರಿ 

ದೇಶ ದೇಶ ಗಡಿಯ ದಾಟಿ ಬಂದಿದೆ
ಮನೆಗೆ ನುಗ್ಗಿ ಹೆಗಲ ಏರಲದಕೆ ಕಷ್ಟವೇ
ಅಂಥ ಸಿಲ್ಕ್ ಬೋರ್ಡೇ ಈಗ ಸೈಲೆಂಟಾಗಿದೆ 
ರಾಜಧಾನಿ ಬೆಂಗಳೂರು ಖಾಲಿ ಖಾಲಿಯಾಗಿದೆ 
ಒಂದು ದೇಶದ ಪ್ರಧಾನಿಯನ್ನೂ ಲೆಕ್ಕಿಸದೆ ಹೋಯಿತು
ರಾಜನಾದ್ರೇ ನನಗೇನು ಅಂತ ಅಂಟಿಕೊಂಡಿತು
ಇಂಥ ಟೈಮಿನಲ್ಲೂ ಸೇವೆ ಮಾಡೋ ಡಾಕ್ಟ್ರೇ ಗ್ರೇಟು
ರಾತ್ರಿ ಹಗಲು ನಮ್ಮ ಕಾಯೋ ವೀರರೇ ಸಲ್ಯೂಟು...

ಕೋರಸ್ಸಿನಲ್ಲಿ ಹಾಡಿಕೊಳ್ಳಿರಿ
ಆದಷ್ಟು ವೈರಸ್ ಇಂದ  ದೂರ ನಿಲ್ಲಿರಿ 

ಪ್ರೀತಿ ಮತ್ತು ಕೋಪ

ತಯಾರಿಯಿಲ್ಲದೆ ಕಲ್ಮಶರಹಿತವಾಗಿ ಹುಟ್ಟುವುದು
ಪ್ರೀತಿ ಮತ್ತು ಕೋಪ
ಎರಡರಲ್ಲಿ ಯಾವುದಾದರೂ ಸರಿ 
ನೀ ನನ್ನೆಡೆ ಬೀರುವುದನ್ನೇ ಕಾದಿರುತ್ತೇನೆ
ಇತಿ-ಮಿತಿಗಳ ಗೋಜಿಗೆ ಸಿಲುಕದೆ
ಇಷ್ಟಾನುಸಾರ ನನ್ನತ್ತ ಪ್ರಹರಿಸು
ಕಲ್ಲಿನ ಮೂರ್ತಿಯಂತೆ ನಗುತ್ತಲೇ ಸ್ವೀಕರಿಸುವೆ

ಮಾಯೆ ಹೊಸೆವ ಸಾಹಸವೇ ಬೇಡ
ಸ್ಥಿತಿಯಲ್ಲಿ ನಗುವು, ಅನುಪಸ್ಥಿತಿಯ ಕೊರಗು
ಎರಡೂ ಮಾಯೆಯೇ
ನನ್ನಲ್ಲಿ ಅಸಂಖ್ಯ ಭಾವನೆಗಳ ಹುಟ್ಟುಹಾಕುವಲ್ಲಿ
ಎರಡಕ್ಕೂ ಸಮ ಪಾಲು
ಅಷ್ಟಕ್ಕೂ, ನೀ ಇದ್ದೂ ಇರದಂತೆ
ಇರದೆಯೂ ಇದ್ದಂತೆ ಭ್ರಮಿಸಿಕೊಂಡಾಗ
ವಾಸ್ತವಕ್ಕೂ, ಕಲ್ಪನೆಗೂ ನೇರ ಸಮರ
ಗೆಲುವು ಸದಾ ನಮ್ಮಿಬ್ಬರದ್ದೇ

ಮಾತು ತಪ್ಪುವುದು ಸಹಜವಾದ್ದರಿಂದ
ಯಾವ ಮಾತಿಗೆ ಯಾವ ದಂಡನೆಯೆಂದು
ಮುಂಗಡ ತಿಳಿಸಿ ಬಿಡು ಮತ್ತೆ
ಪಾಪ ಪ್ರಜ್ಞೆಗೆ ಕ್ಷಾಮ ಬಾರದ ಹಾಗೆ
ಇತ್ತ ದಂಡನೆಗೆ ತಲೆದೂಗುವೆ
ಕ್ಷಮೆ ಕೋರಿ ನಾ ಕುಗ್ಗುತ್ತಿರುವಂತೆ
ಕ್ಷಮಿಸಿ ನೀ ನನ್ನ ಹಿಗ್ಗು ಹೆಚ್ಚಿಸು

ಹೊತ್ತು ಹಸಿವು ನೀಗುವಲ್ಲಿಗೆ
ಮರು ಹೊತ್ತಿನ ಎಣಿಕೆಗೆ ಬೆರಳುಗಳು ಸಾಲವು
ಇಗೋ ನನ್ನವೂ ನಿನ್ನವೇ
ಕೂಡಿ ಕಳೆದು, ತೂಗಿ ಅಳೆದು
ಕೊನೆಗೆ ಲೆಕ್ಕ ಮುಗಿದ ಮೇಲೆಯೂ
ನಿನ್ನಲ್ಲೇ ಉಳಿದು ಬಿಡಲಿ
ಬಿಗಿ ಹಿಡಿತಕೆ ಬೇಕಾಗಿರುವವು ಇವೇ,
ತೋಳ್ಬಂಧನದ ವೇಳೆ ಬಿಡುಗಡೆಗೊಂಡರಾಯಿತು...

ದಣಿವಾರಿ ಕೊಳದಲಿ

ದಣಿವಾರಿ ಕೊಳದಲಿ  ಕೆಂದಾವರೆ ಅರಳಿದೆ  ಮುಗಿಲೇರಿ ಬರದಲಿ  ಹನಿಗೂಡಲು ಇಳಿದಿದೆ  ರವಿಕಾಂತಿ ಸವಿಯುತ  ಹರಳಂತೆ ಮಿನುಗುತಾ  ಬೆರಗಲ್ಲೇ ತಯಾರಿಯಾಗುತಿದೆ  ಮನದಂಗಳ ಮುಂಜಾನೆಯ...