ಪೊರೆಯನ್ನು ಕಳಚಿದ ಮರುಕ್ಷಣ

ನಿನ್ನಿಷ್ಟಗಳಲಿ ನಾನಿಲ್ಲದ ನಿಜವ

ನಿಷ್ಠುರವಾಗಿ ನುಡಿವ ನೀನು

ನನ್ನ ನೆಚ್ಚಿಕೊಂಡಿರುವುದಕ್ಕೆ ನಿದರ್ಶನವೆಂದು

ನಾ ಬಲವಾಗಿ ನಂಬಿರುವೆ

ನೀ ತಾಳುವ ನಿಲುವು

ನನ್ನತ್ತ ಧಿಕ್ಕಾರ ಭಾವ ಸೂಸುತ್ತಲೇ

ಸೆಳೆಯಲು ಚಡಪಡಿಸಿದಂತೆಲ್ಲ

ಅದು ನನ್ನ ಸ್ವೀಕಾರವೆಂಬಂತೆ ಭಾವಿಸುವೆ

ನನ್ನ ನಿರ್ಗಮನಕೆ ಆಗಮಿಸುವ ಖುಷಿ

ನನ್ನನ್ನೇ ಕೇಂದ್ರೀಕರಿಸಿಕೊಂಡಿತ್ತೆಂಬ ಕಾರಣ

ಮುನಿದು ನೀ ನನ್ನ ಅಮಾನತ್ತಿನಲ್ಲಿಟ್ಟಾಗ 

ಅನುಪಸ್ಥಿತಿಯಲ್ಲಾದರೂ ಒಂದಿಷ್ಟು ಕಾಡುವೆ

ವಿಸ್ತರಿಸಿದ ನಿನ್ನ ಕನಸುಗಳ ಪಾಲಿಗೆ

ನಾ ಅಪ್ರಸ್ತುತ ಅನಿಸುವಷ್ಟಾದರೂ

ತಿರಸ್ಕಾರಕ್ಕೆ ನನ್ನ ನೆನಪಿಸಿಕೊಂಡಾಗ 

ಕೃತಜ್ಞನಾಗಿ ನಮಸ್ಕರಿಸಿ ಉಳಿದುಬಿಡುವೆ

ಯಾರದ್ದೋ ಮುಲಾಜಿಗೆ ಅಂಜಿ

ಹತ್ತಿರ ಬಂದಷ್ಟೇ ದೂರ ಉಳಿದು

ಧರಿಸಿದ ಕೃತಕ ನಗುವಿನ ಪೊರೆಯನ್ನು 

ಕಳಚಿದ ಮರುಕ್ಷಣ ಸಣ್ಣ ಮಾತಿಗೆ ಸಿಗುವೆ!