ಬಣ್ಣ

ಇದ್ದ ಬಣ್ಣವ 

ತನ್ನ ಅಸಲಿಯತ್ತಿಗಿಂತ 

ಬೇರೆ ಸ್ವರೂಪದಲ್ಲಿ 

ಕಾಣುವುದೂ ಕುರುಡು;

ನನಗೀಗ ಅದು ಕವಿದಿದೆ 

ಕೆಸರಲ್ಲಿಯ ನೀರು 

ನೀಲಿ ಸಮುದ್ರವ ಹೋಲದೆ!

ಮೋಡ, ಹಾಲಿಕಲ್ಲು, ಮಳೆ

ಇವೆಲ್ಲದರ ಬಣ್ಣ 

ಏಕಿಷ್ಟು ಭಿನ್ನ?

ನೆತ್ತರು ಕೆಂಪು ಎಂದು 

ಹರಿಸಿದವರು ಹೇಳಿದರೂ 

ಒಪ್ಪಲು ತಯಾರಾಗಿರಲಿಲ್ಲ;

ಪ್ರತ್ಯಕ್ಷವಾಗಿ ಕಂಡೂ 

ಸಂದೇಹ ಪಡುವಂತಾಗಿದೆ 

ಅದು ಹೆಪ್ಪುಗಟ್ಟಿ ಕಪ್ಪಾಗಿತ್ತೆ?

ಗಿಡಮರದೆಲೆಗಳದ್ದೋ 

ದಿನಕ್ಕೊಂದು ನಿಲುವು 

ಹಸಿರು, ಕಂದು, ಹಳದಿ ಇತ್ಯಾದಿ,

ಹೂಗಳದ್ದೂ ಅದೇ ಕತೆ;

ಆಕೆಯನ್ನೊಮ್ಮೆ ಗುಲಾಬಿಗೆ ಹೋಲಿಸಿ 

ಪ್ರತಿಕ್ರಿಯೆಗೆ ಕಾದಿದ್ದೆ,

ಮೊಗದಲ್ಲಿ ನನ್ನಷ್ಟೇ ಗೊಂದಲ

ನಗುವಲ್ಲಿ ಸಾವಿರ ಒಗಟು  

ಅಸ್ಥಿರ, ನಮ್ಮ ಮನಸಿನಂತೆ 

ಸಿದ್ಧ ಆಕಾರದಲ್ಲುಳಿಯದೆ 

ಬದಲಾಗುತ್ತಲೇ 

ಬದಲಾವಣೆಗಳ ಪ್ರಶ್ನಿಸುವುದು,

ವಿರೋಧಿಸುತ್ತಲೇ ವಿನೋದಿಸುವುದು 

ಬಣ್ಣಗಳು 

ನಮ್ಮ ಜೊತೆ ಆಟವಾಡಿದಷ್ಟು 

ನಾವು  

ಬಣ್ಣಗಳ ಜೊತೆ ಆಟವಾಡಿಲ್ಲವೇನೋ!