Tuesday 31 December 2019

ತೆರೆಯ ಸರಿಸಿ

ತೆರೆಯ ಸರಿಸಿ ಮರೆಯಾಗಿರುವ ಮುಖವ ತೋರು ಒಮ್ಮೆ
ಮುಗುಳು ನಗೆಯ ಬೀರಿ, ಮರುಳ ಮಾಡು ನನ್ನ
ಸನಿಹ ಬರುವ ಸಮಯ ತಿಳಿಸಿ ಬೇಕೆಂದೇ ತಡ ಮಾಡು
ಕಾದು ತಾಳುವೆ ಅಲ್ಲೇ, ಕಣ್ಣಲ್ಲೇ ನೂರು ಬಣ್ಣ 
ನಿದಿರೆ ಬಾರದ ರಾತ್ರಿಗಳ, ವರದಿ ಕೇಳದೆ ಹೋಗುವೆಯಾ
ಅದರೋ ಮಾತನು ಅರಿಯದೆಲೆ, ಅಳೆದು ತೂಗುವೆಯಾ
ಕರೆದು ಹೋಗುವೆ ಸನ್ನೆಯಲೇ, ಪ್ರೀತಿ ಮಾಡಲು ಕಲಿಸುವೆಯಾ 
ತಪ್ಪು ಮಾಡಲು ಮುದ್ದು ಮಾತಲೇ ನನ್ನ ತಿದ್ದುವೆಯಾ  

ಕವಿ ಪುಂಗವರು ಶರಣಾಗುವರು ಹಾಡಿ ಹೊಗಳಲು ನಿನ್ನ 
ಸಾಲಲಿ ಮೊದಲು ನಿಂತವ ನಾನೇ ಕರುಣೆ ತೋರದಿರು
ಪ್ರತಿಯೊಂದರಲೂ ಕೊಂಕನು ಹುಡುಕೋ ಚತುರೆ ಅಲ್ಲವೇ ನೀನು
ಬೇರೆ ಹೆಸರ ಹಿಡಿದು ಕರೆವೆ ಯುದ್ಧವೇ ನಡೆಸಿ ಬಿಡು
ಎಲ್ಲೇ ಹೋದರೂ ಬೆಂಬಿಡದೆ, ನೀನೂ ಹಾಜರಿ ಹಾಕಿರುವೆ 
ಎಲ್ಲ ಅರಿತರು ಸುಮ್ಮನೆ ನೀ, ನನ್ನ ಕಾಡಿಸುವೆ
ನಿನ್ನ ಮುನ್ನುಡಿ ಇಲ್ಲದಿರೋ, ನಾನು ಖಾಲಿ ಪುಸ್ತಕವೇ 
ನೀನು ಅಂಕವ ನೀಡದೆ ಹೋದರೆ ಸೊನ್ನೆ ಆಗಿರುವೆ 

**ಹಾಡು**

https://soundcloud.com/bharath-m-venkataswamy/0k3xr7jc5dmv

Friday 27 December 2019

ನೂರು ದಾರಿ ಒಂದುಗೂಡಿ ಏಕೆ ಸಾಗಬಾರದು?

ನೂರು ದಾರಿ ಒಂದುಗೂಡಿ ಏಕೆ ಸಾಗಬಾರದು?
ಊರು ನಾಡು ದೇಶ ಏಕೆ ಒಂದುಗೂಡಬಾರದು?
ನನ್ನ ನಿನ್ನ ಭಾಷೆಯಲ್ಲಿ ಪ್ರೀತಿಗುಂಟು ಅರ್ಥವು 
ಯಾವ ಗಾಳಿ ಮಾತೂ ನಮ್ಮ ದೂರ ಮಾಡಲಾಗದು 
ನಾವೆಲ್ಲಾ ಒಂದಾಗಿ 
ಹೂದೋಟದಂತೆ ಬೀಸೋ ಗಾಳಿಯಲ್ಲಿ ತೂಗುವ 
ಹೋದಲ್ಲಿ ಬಂದಲ್ಲಿ
ನಗುವನ್ನೇ ಹಂಚಿ ಸ್ನೇಹದಿಂದ ಕೂಡಿ ಬಾಳುವ

ಒಂದೇ ನೀರಿನ ಮೀನುಗಳು ನಾವು
ಈಜಬೇಕು ಎದುರು ಪ್ರವಾಹ ಬಂದರೂ
ಒಂದೇ ಸೂರಡಿ ಕನಸ ಕಂಡೆವು
ತಿದ್ದಲೇ ಬೇಕು ಅಕ್ಷರ ಏನೇ ಆದರೂ
ನಾಳೆ ಹೊಸತು ಅಧ್ಯಾಯ, ಮುಗಿದ ನೆನ್ನೆ ಇತಿಹಾಸ
ಇಂದೇ ಇಂದೇ ಇಂದೇ ನಮ್ಮ ಪಾಲಿನ ಅವಕಾಶ
ರೆಕ್ಕೆ, ಬಿಚ್ಚಿ, ಹಾರೋವಾಗ ನಮ್ಮದೇ ಆಕಾಶ..... 

ಬಣ್ಣ ರಾಚುವ ಗೋಡೆಗಳ ಮೇಲೆ 
ಮೂಡೋ ರೇಖೆಯು ನಮ್ಮ ಭಾವ ಸೂಚಕ 
ಮೋಡ ಮಣ್ಣಿನ ನಂಟು ಬೆಸೆವಾಗ 
ಹರಿದು ಹಾಳೆಯ ದೋಣಿ ಮಾಡೋ ಕಾಯಕ 
ಕಲಿಕೆ ಇಲ್ಲಿ ಆಟವೇ, ಕಲ್ಲು-ಮುಳ್ಳು ಪಾಠವೇ 
ಮನೆಯೇ ನಮ್ಮ ಮೊದಲ ಶಾಲೆ, ಇಲ್ಲಿ ಎಲ್ಲ ಚಂದವೇ 
ಬೆರೆತು, ಕಲಿತು, ಸಿಕ್ಕ ಅರಿವೇ ಶಿಕ್ಷಣ ಅಲ್ಲವೇ... 


**ಹಾಡು**
https://soundcloud.com/bharath-m-venkataswamy/nsf9tmhmowsp

Monday 23 December 2019

ದಿನಕೊಂದು ಕಥೆಯಂತೆ ಎಷ್ಟಾಗಿರಬಹುದು?

ದಿನಕೊಂದು ಕಥೆಯಂತೆ ಎಷ್ಟಾಗಿರಬಹುದು?
ಲೆಕ್ಕವೇ ಇಲ್ಲ ಮಂಪರಿನ ಸಹಚಾರಿ 
ಒಂದು ಕಾಡು, ಒಬ್ಬ ರಾಜ, ಒಂಟಿ ಮುದುಕಿ 
ಹೀಗೆ, ಒಂದೊಂದೇ ಕೂಡಿ ನೂರಾರು ಪಾತ್ರ 

ಥಟ್ಟನೆ ಆ ರಾತ್ರಿ ಯಾವುದೋ ಕಥೆಗೆ 
ನೀ ಪಟ್ಟು ಹಿಡಿದಿದ್ದೆ, ನೆನಪಾಗಲಿಲ್ಲ 
ನೆಪಕೊಂದು ಉಪಕಥೆ ಕೊಡಲಿಲ್ಲ ಹಿತವ 
ನಿನ್ನ ವ್ಯಥೆಗೆ ಎದೆ ಬಿರಿದದ್ದು ಸುಳ್ಳಲ್ಲ 

ಹೇಳುತ್ತಾ ಹೋದಂತೆ ಮಾಳಿಗೆಗೆ ನೆಟ್ಟ 
ಕಣ್ಣುಗಳು ಬೆರಗಾಗಿ ಊಹಿಸಿದವೇನೇನೋ 
ಕಲ್ಪನೆಯ ಸೂರಿನಡಿ ಸೃಷ್ಟಿಸಿದ ಚಿತ್ತಾರ 
ಕಾಡದೆ ಬಿಡಲಿಲ್ಲ ನಿನ್ನೊಡನೆ ನನ್ನನ್ನೂ 

ರೆಪ್ಪೆ ಮುಚ್ಚಿದೆಯೆಂದು ನಿಲ್ಲುವಂತಿಲ್ಲ 
ಮುಂದುವರಿಸದೆ ನಿದ್ದೆ ಮೂಡುವಂತಿಲ್ಲ 
ಕಂಪಿಸುವೆ ಅರೆಕ್ಷಣ ತಂಪಿನಲೂ ಬೆವರುತ 
ಬಿಟ್ಟಲ್ಲಿಂದಲೇ ಮತ್ತೆ ಶುರು ಮಾಡುವೆ 

ಏಕಮುಖವಾಗಿತ್ತು ಭಾವಗಳ ವಿಲೇವಾರಿ
ಈಗ ನನ್ನ ಪದಕೆ ನಿನ್ನ ದ್ವಿರುಕ್ತಿ 
ಎಚ್ಚರವಹಿಸುವ ಇರುಳಲಿ ಇಬ್ಬರಲೂ 
ಒಂದೇ ಕನಸನು ಕಾಣುವ ಶಕ್ತಿ....  

ಗಡಿಗೆಯ ಸದ್ದಲ್ಲಿ ತುಂಬಿರದ ದುಃಖವಿದೆ

ಗಡಿಗೆಯ ಸದ್ದಲ್ಲಿ ತುಂಬಿರದ ದುಃಖವಿದೆ
ತುಂಬಿಯೇ ಇದ್ದರದು ಅಳುತಿರಲಿಲ್ಲ
ಒಂದೊಂದೇ ಹನಿ ಕೂಡಿ ತುಂಬೋದು ಸಹಜನೆ
ಕೂಡಿ ಬಾಳೋಕಲ್ಲಿ ಮನಸಿರಲಿಲ್ಲ
ತಂಬೂರಿ ಮೀಟುವ ಬೆರಳಿಗೆ ಮುನಿಸಂತೆ
ತಂತಿಗೂ ಬೆರಳಿಗೂ ಸರಿ ಹೊಂದಲ್ಲ
ಸ್ವರವೊಂದು ಒಲಿದಾಗ ಹಾಡೊಂದು ಚಿಗುರೀತು
ಪದಕಿನ್ನೂ ಪರದಾಟ ಮುಗಿದಂಗಿಲ್ಲ.. ಜಂಗಮನು ಇನ್ನೂ ಎಚ್ಚರವಾಗಿಲ್ಲ..
ಇರುವಂತೆ ಇರುವೆವು ಬಂದಂತೆ ನಡೆದೇವು
ಇರಿಸು-ಮುರಿಸು ಮರೆತು ಬೆರೆತೋರಲ್ಲ
ಇರುಳ ದಾಟಿ ನಾಳೆ ಬರುವಂತೆ ಹೊಸತನ್ನ
ಬೆರಗಾಗಿ ಕಾಣೋಕೂ ಪುರುಸೊತ್ತಿಲ್ಲ
ಮುಳ್ಳಿರೋ ಗಡಿಯಾರ ಗೋಡೆಗೆ ತಗಲಾಕಿ
ಸಮಯಕ್ಕೆ ಸರಿಯಾಗಿ ನಡೆದೋರಲ್ಲ
ಕಲ್ಲ ಕೆತ್ತಿ ಎಲ್ಲ ಅದರ ತಲೆಗೆ ಹೊರೆಸಿ
ನಮ್ದೇನೂ ನಡಿಯೊಲ್ಲ ಅಂತೀವಲ್ಲ.. ಇದ್ರೆ ಆ ದೇವ್ರಾದ್ರೂ ನಗುತಾನಲ್ಲ...
ಬತ್ತದ ಗದ್ದೆಲಿ ಗುದ್ದಾಡಿ ಗೆದ್ದೋನು
ಬಿತ್ತಿ ಬೆಳೆದಾಗಷ್ಟೇ ಸತ್ಯ ಮಾತು
ನಾವೇನೇ ಅಂದ್ಕೊಂಡ್ರೂ ಆಗೋದೇ ಆಗೋದು
ಸೋಲು ಗೆಲುವು ಎರಡೂ ಬಾಳ ಸೇತು
ನನ್ನಂತೆ ನೀನಿಲ್ಲ , ನಿನ್ನಂತೆ ಅವನಿಲ್ಲ
ಅವನಿಗೆ ನಾನ್ಯಾರೋ ಗೊತ್ತೇ ಇಲ್ಲ
ಹುಟ್ಟು ಸಾವಿನ ಪಾಠ ಹೇಳೋ ಹಣ್ಣೆಲೆಯನ್ನ
ಒಪ್ಪುವ ಗುಣ ಮನುಜ ಕಲಿತೇ ಇಲ್ಲ.. ಅರಿತೋನಿಗರಿವೇನೇ ಖುಷಿಯ ಮೂಲ...

**ಹಾಡು**

https://soundcloud.com/bharath-m-venkataswamy/izgfwgl4b9cx

Thursday 19 December 2019

ಮನೆಗೆ ಬರಲೊಪ್ಪುವೆನು

ಮನೆಗೆ ಬರಲೊಪ್ಪುವೆನು
ಮಾತು, ಮನಸುಗಳ ಹದಗೊಳಿಸಿ
ಮೊಗಸಾಲೆಯಲ್ಲಿ ಕಸವಿದ್ದರೂ ಸರಿಯೇ
ಮೊಗದಲ್ಲಿ ನಗುವಿರಿಸಿ
ಒಲೆ ಹಚ್ಚದೆ, ಅಕ್ಕಿ ಬೇಯದೆ
ಉದರವ ಬೆಚ್ಚಗಿರಿಸುವಂತಾದರೆ
ಪ್ರತಿ ಹೆಜ್ಜೆಗೂ ಪ್ರೀತಿಯುಣಿಸುವಂತಿದ್ದರೆ

ಮನೆಗೆ ಬರಲೊಪ್ಪುವೆನು
ಹರಕಲು ಬಟ್ಟೆ ತೊಟ್ಟವನ ಜರಿಯದೆ
ಪಾದಕಂಟಿದ ಕೆಸರ ಲೆಕ್ಕಿಸದೆ
ಒರಟು ಹಸ್ತವ ಹಿಡಿದು
ಊರಾಚೆಯಿಂದ ಹೊಸ್ತಿಲ ತನಕ
ಮುನ್ನಡೆಸುವ ಔದಾರ್ಯತೆ ನಿಮಗಿದ್ದರೆ
ನನ್ನಂತೆ ನಾನು ಅನಿಸಲು ನಿಮಗಾದರೆ

ಮನೆಗೆ ಬರಲೊಪ್ಪುವೆನು
ಚಪ್ಪರ, ಚಾಮರಗಳ ಹಂಗಿಲ್ಲದೆ
ನಿಬ್ಬೆರಗಾಗಿಸಲ್ಪಡುವ ಪ್ರಯಾಸವಿಲ್ಲದೆ
ಹಬ್ಬದಬ್ಬರದ ಮಬ್ಬಿರದೆ
ಒಬ್ಬರನ್ನೊಬ್ಬರ ದೂಷಿಸದೆ
ಆಸ್ಥೆಯ ಆಸ್ತಿಯನ್ನೊಳಗೊಂಡ
ವಿಸ್ತಾರವಾದ ಹೃದಯ ನಿಮ್ಮದಾದರೆ

ಮನೆಗೆ ಬರಲೊಪ್ಪುವೆನು
ಪಸೆಯಲ್ಲಿ ನೆನ್ನೆಗಳ ಕೆದಕದೆ
ಕಿಸೆಯಲ್ಲಿ ನಾಳೆಗಳ ಹುಡುಕದೆ
ಕಣ್ಣೊಳಗೆ ಇಂಗದ ಇಂಗಿತಕೆ
ನೆಲೆ, ಬೇರು, ಗೊಬ್ಬರದಾಚೆಗೆ
ನಂಬುಗೆಯ ನೀರೆರೆವ ಗುಣವಿದ್ದರೆ
ಬೆಳೆದ ನಿಮ್ಮೊಳಗೆನ್ನ ಗುರುತಿದ್ದರೆ

ಮನೆಗೆ ಬರಲೊಪ್ಪುವೆನು
ಇರುವಷ್ಟು ಕಾಲ ಅದು ನನ್ನದೆಂಬ
ಬಿಟ್ಟು ಹೊರಡಲು ನಂಟು ಮುರಿಯಿತೆಂಬ
ಮೂಲದ ಅರಿವನ್ನು ನನ್ನೊಳಗೆ ಬಿತ್ತಿದರೆ
ಬೆನ್ನು ಬಾಗಿಲ ಕಂಡು
ಕಂಡ ದಾರಿಯ ಕೊಂದು
ಕೊಂದ ನೆರಳಿನ ಛಾಯೆ ಮತ್ತೆ ಉಸಿರಾದರೆ
ಪತ್ತೆ ಪತ್ರಗಳೆಲ್ಲ ದಿಕ್ಕೆಡುವಂತಿದ್ದರೆ
ವಿಶ್ವವೇ ನನ್ನ ಮನೆಯಾಗುವಂತಾದರೆ...

ಬಾ ಕೋಗಿಲೆ ಮಾತಾಡುವ

ಬಾ ಕೋಗಿಲೆ ಮಾತಾಡುವ
ತಾಯೊಬ್ಬಳು ಅಳುತ್ತಿರುವಾಗ ಹಾಡುವುದಾ?
ಬಾ ಮಾತಾಡುವ
ಅವಳ ನೋವ ಪರಿಹರಿಸುವ ಬಗ್ಗೆ
ದುಃಖ ಸಾಗರಕೆ ಎರಗಿ
ಅಂತರಾಳದ ಗುದ್ದಾಟವ ಅರಿತು
ಹೊತ್ತು ಮೀರುತ ಮಾತಾಡುವ



ಏನೆಂದು ಕೇಳಿದರೆ ಸುಳ್ಳಾಡುವಳು
ಮಾತಲ್ಲಿ ತಡೆದಿಟ್ಟ ಸಂಕಟ
ಕಣ್ಣಲ್ಲಿ ಉಮ್ಮಳಿಸಿದಾಗ ನಿತ್ರಾಣಳಾಗಿ
ಕುಸಿದು ಬಿದ್ದಾಗ ಮೇಲೆತ್ತುವ ಬಗ್ಗೆ
ಬಿಗಿದಿಟ್ಟ ಉಸಿರನ್ನು ತಿಳಿಗೊಳಿಸೋ ಬಗ್ಗೆ
ಮಾತಾಡುವ ಬಾ

ಒಲೆಯ ಕಿಡಿ ಹಾರಿ ಹಣೆ ಸುಟ್ಟಾಗ
ಹಿಟ್ಟು ತೊಳಸುತ ಕೈ ಬೊಬ್ಬೆ ಹೊಡೆದಾಗ
ಬಚ್ಚಲ ಸಾರಿಸಿ ಪಾದ ಬಿರಿದಾಗ
ಹಬ್ಬದ ಸೀರೆ ಬಣ್ಣ ಬಿಟ್ಟಾಗಲೂ
ಇಷ್ಟು ನೊಂದಿರಲಿಲ್ಲ ಈಕೆ

ಇದ್ದ ಮನೆಯ ಕಷ್ಟ ದಿಬ್ಬಗಳ ಹೊತ್ತು
ಬಿದ್ದ ಕಂದನ ತರಚು ಗಾಯವ ಮರೆತು
ನೆರೆಹೊರೆಯವರ ಕೊಂಕು
ಕೈ ಹಿಡಿದವನ ಚಟಕೂ
ಚಿಟಿಕೆಯಲಿ ಪರಿಹಾರ ಹುಡುಕಿದ ಈಕೆ
ಅಳುವುದೆಂದರೆ ಹೇಗೆ?

ಮೂಖಿಯಾದಳು ದೂರಲು ಯಾರೊಬ್ಬರನ್ನೂ
ಬಾಕಿ ಏನೇ ಇರಲಿ ಅವಳಂತೆ ತಾನು
ಸಹಜವಾಗಿ ನಗುವ ನಟನಾ ಪ್ರವೀಣೆ
ಒಗ್ಗರಣೆ ಡಬ್ಬಿಯೇ ಉತ್ತಮ ಉಪಮೆ
ಯಾರನ್ನೂ ಬಾಧಿಸದ ಈಕೆ
ಮರುಗುತಿಹಳೆಂದರೆ ಹೇಗೆ?

ಹಸಿದಾಗ ಘರ್ಜಿಸಿದ ಕೋಣೆಯಲಿ
ಮುನಿದು ಯುದ್ಧವಗೈದ ಅಂಗಳದಲಿ
ಪಟ್ಟವೇರಿ ಮೆರೆದ ಕೋಟೆಯಲಿ
ಪಟ್ಟು ಹಿಡಿದು ಗೆದ್ದ ರಂಗದಲ್ಲಿ
ದಿಟ್ಟವಾಗಿ ಬೆಳೆದ ಮಣ್ಣಿನಲಿ
ಥಟ್ಟನೆ ಮನಸಾಗೋ ಸ್ವರ್ಗದಲಿ
ಸೂಜಿಯಂಚಿನಷ್ಟು ಘಾಸಿಯಾದರೆ
ಶಿಖರಕ್ಕೆ ಏಕಿಷ್ಟು ಶೋಕವೆಂಬ
ಒಗಟನ್ನು ಬಿಡಿಸೋಕೆ ಉಪಕರಿಸು ಬಾ

ಮೌನ ಬಿಡು ಕೋಗಿಲೆ
ಮಾತನಾಡು ಈಗಲೆ
ಶಕ್ತಿ ಮಾತೆ ಮಡಿಲಿಗೆ
ಧಾವಿಸ ಬೇಕು ಕೂಡಲೆ.....

Friday 13 December 2019

ಕ್ರಿಸ್ಮಸ್ ಟೋಸ್ಟ್

ಒಂದೆಡೆ ಸೇರಿ ಎಲ್ಲರೂ ಚೀರ್ಸ್ ಹೇಳುತ್ತಾರೆ 
ಒಂದೇ ಗುಟುಕಿಗೆ  ಬಿಯರ್ ಮೇಲೆ ಬಿಯರ್ 
ಗಟಗಟನೆ ಹೊಟ್ಟೆಗಿಳಿಸಿಕೊಂಡು 
ಆನಂತರ ರಮ್, ವಿಸ್ಕಿ, ಜಿನ್ ಇತ್ಯಾದಿ 
ಏರಿದ ನಶೆಯೇರಿ ನಶೆ ಕುಳಿತಾಗ 
ಅಲ್ಲೊಂದು ಚರ್ಚೆ ಆರಂಭಿಸುತ್ತಾರೆ 

ನಾನಾ ಗಡಿಗಳ ದಾಟಿ ಬಂದವರು 
ಮಂದ ಬೆಳಕಿನ ಕೆಳಗೆ ಪಾರ್ಟಿ ಮಾಡುತ್ತಿದ್ದರು 
ಅವರ ಚರ್ಮದ ಬಣ್ಣವ ಕತ್ತಲು ಸಮನಾಗಿಸಿತ್ತು 
ಮತ್ತೇರಿದ್ದರಿಂದ ಫೌಲ್ ಲ್ಯಾಂಗ್ವೇಜ್ ಸಾಮಾನ್ಯವಾಗಿತ್ತು 
ಬಾರ್ ಟೆಂಡರ್ ಎಲ್ಲ ಬೈಗುಳಗಳ ನಗುತ್ತಲೇ ಸ್ವೀಕರಿಸಿ 
ಮತ್ತೆ ಮತ್ತೆ ಆರ್ಡರ್ಗಾಗಿ ಟೇಬಲ್ಲತ್ತ ಸುಳಿದಾಡುತ್ತಿದ್ದ 

ಅದು ಕ್ಯೂಬನ್ ರೆಸ್ಟೋ-ಬಾರ್ 
ಅಲ್ಲಿ ಛೆ ಗುವಾರ ನಗುತ್ತಲೇ ಗೋಡೆಗೆ ಜೋತುಕೊಂಡಿದ್ದ 
ಅಲ್ಲಿದ್ದವರೆಲ್ಲ ಕ್ರಾಂತಿಯ ಕುರಿತು ಮಾತಾಡಿದರು 
ಕ್ಯೂಬನ್ ಸಿಗಾರನ್ನು ವಿಶ್ಲೇಷಿಸುತ್ತಿದ್ದರು 
ಯಾರನ್ನೂ ಬೇಡದೆ ಕಾಲೆಳೆಯುತ್ತಿದ್ದರು 
ಕೊಲೊನಿಯಲ್ ಹಿಸ್ಟೊರಿಯನ್ನೂ ಕೆದಕುತ್ತಾ 

ಕ್ರಿಸ್ಮಸ್ ಟೋಸ್ಟ್ ಗಾಜಿನ ಸದ್ದು 
ಎಲ್ಲ ದಿಕ್ಕಿನಲ್ಲೂ ಕೇಳಿ ಬರುತ್ತಿತ್ತು 
ಎಲ್ಲರ ತಲೆ ಮೇಲೂ ಸಾಂಟಾ ಟೋಪಿ 
ಮುಖದಲ್ಲಿ ಸಂಭ್ರಮ, ಎಲ್ಲಿಲ್ಲದ ಉತ್ಸಾಹ 
ನಗುವು ಎಥೇಚ್ಛವಾಗಿ ತುಂಬಿತ್ತು 
ಯಾರು ಯಾರನ್ನೂ ಬಲ್ಲವರಾಗಿಲ್ಲವಾದರೂ 
ಅಲ್ಲಿ ಎಲ್ಲರಿಗೆಲ್ಲರೂ ಪರಿಚಿತರಾಗಿದ್ದರು 

ವರ್ಷಾರಂಭಕ್ಕೂ ಮುನ್ನ ಹೀಗೊಂದು ರಾತ್ರಿ 
ಕೇಳಿದರೆ ಟ್ರಯಲ್ಸ್ ಎಂದು ಟ್ರೋಲ್ ಮಾಡುತ್ತಾ 
ಮತ್ತೊಂದು ಬಾಟಮ್ಸ್ ಅಪ್ 
ಚಳಿಗಾಲದ ಸಂಜೆಗಳು ನಿಜಕ್ಕೂ ಸುದೀರ್ಘ 
ಎಚ್ಚರದಿಂದಿದ್ದಷ್ಟು ಮೋಜು ಜಾಸ್ತಿ 
ಎಚ್ಚರದಿಂದಿರಬೇಕಷ್ಟೆ...

ಮರ ಕಡಿವಾಗ ದೂರವಿರಿ

ಮರ ಕಡಿವಾಗ ದೂರವಿರಿ
ಕಾರು, ಬೈಕು ಇತ್ಯಾದಿಗಳ ದೂರವಿಡಿ
ಮಲಗಿರುವವರ ಕೂಗಿ ಎಚ್ಚರಿಸಿ
ಕಡಿವವ ತನ್ನ ಕರ್ತವ್ಯ ನಿಭಾಯಿಸುತ್ತಾನೆ
ಅಸಂಬದ್ಧ ಪ್ರಶ್ನೆ ಕೇಳಿ ಕೆಣಕದಿರಿ
ಸಾಕು ನಾಯಿಗಳು, ಬೀದಿ ನಾಯಿಗಳು
ಅತ್ತ ಸುಳಿಯದಂತೆ ನೋಡಿಕೊಳ್ಳಿ
ಕರೆಂಟು ತೆಗೆಯಬಹುದು
ಎಲ್ಲಕ್ಕೂ ಮುಂಚೆಯೇ ಪ್ರಿಪೇರಾಗಿ
ಕಡಿವಾಗ ಚಕ್ಕೆಗಳು ಚಿಮ್ಮಿ
ಕಣ್ಣು ಘಾಸಿಗೊಳ್ಳಬಹುದು, ಎಚ್ಚರ ವಹಿಸಿ
ಆ ಮರದ ಜೊತೆಗೆ
ನಿಮ್ಮ ನಿಮ್ಮ ಕೆತ್ತನೆಯ ಪ್ರೇಮ ಗುರುತುಗಳು
ಇಂದಿಗೆ ಸಮಾಧಿಯಾಗುತ್ತವೆ
ಒಂದು ಫೋಟೋ ತೆಗೆದಿಟ್ಟುಕೊಳ್ಳಿ
ಉಯ್ಯಾಲೆಯ ಹಗ್ಗದ ಗುರುತು
ಗಾಯದ ಗಂಟಿನಂತೆ ಉಳಿದಿತ್ತು
ಸಾಧ್ಯವಾದರೆ ಒಮ್ಮೆ ಮರವೇರಿ ಕಂಡು ಬನ್ನಿ
ಎಷ್ಟೋ ಸಲ ಪಿಕ್ಕೆಗೆ ಗುರಿಯಾಗಿದ್ದಿರಿ
ಆಗ ಹಿಡಿ ಶಾಪ ಕೊಟ್ಟಿದ್ದಿರಿ
ಶರತ್ಕಾಲದಲ್ಲಿ ಎಲೆಗಳುದುರಿ
ಸಾರಿಸಿದ ಮನೆಯಂಗಳವ ಛೇಡಿಸಿತ್ತು
ಹೋದರೆ ಹೋಗಲಿ ಕ್ಷಮಿಸಿ ಬಿಡಿ
ನೆನೆಪಿಗೆ ಒಂದು ರಂಗೋಲಿ ಬಿಡಿಸಿ
ಗೂಡು ಕಟ್ಟಿದ್ದ ಹಕ್ಕಿಗಳು
ಬಾಡಿಗೆ ವಸತಿಗೆ ನಿಮ್ಮ ಛಾವಣಿಗೆರಗಬಹುದು
ಸಜ್ಜ ಸಾಲಿಗೆ ಮುಳ್ಳ ನೆಡಿ
ಸಿನ್ಟೆಕ್ಸಿನ ಮುಚ್ಚಳ ಬಿಗಿಗೊಳಿಸಿ
ಒಣ ಹಾಕಿದ ಸಂಡಿಗೆಗೆ ಕಾವಲಿರಿ
ಅಥವಾ ತಗಡಿನ ಡಬ್ಬಿ ಬಾರಿಸುತ ಕೂರಿ
ಮರ ಕಡಿದು ಹೋದವರು
ಬೇರೊಂದು ಮರದ ಕೆಳಗೆ ವಿರಮಿಸಿರುತ್ತಾರೆ
ಒಂದು ಚೊಂಬು ನೀರು ಕೊಟ್ಟು ಕೇಳಿ
ಸ್ವಾಮಿ ಕರೆಂಟು ಇವತ್ತೇ ಬರುತ್ತಾ?
ನೆಕ್ಸ್ಟು ಯಾವ್ ಮರ ಕಡಿತೀರಿ? ವಗೈರೆ .. ವಗೈರೆ ..
ಯಾವುದೋ ದೇಶದ ಕಾಡ್ಗಿಚ್ಚು
ನಮ್ಮ ದೇಶದತ್ತ ಹಬ್ಬುವ ಟಿ.ವಿ ಸುದ್ದಿಗೆ
ವಿಚಲಿತರಾಗುತ್ತಾ ಊಟ ಮುಗಿಸಿ
ಮದ್ದು-ಮಾತ್ರೆ ನುಂಗಿ
ಎಚ್ಚರವಿರದೆ ನಿದ್ದೆಗೆ ಜಾರಿ
ಬೆಳಿಗ್ಗೆ ತಿಂಡಿ ಕಾಫಿ ಮುಗಿಸಿ
ಇಸ್ತ್ರಿ ಮಾಡಿದ ಬಟ್ಟೆ ತೊಟ್ಟು
ಗಾಡಿ ಏರಿ, ಹೆಲ್ಮೆಟ್ ಏರಿಸುವ ಮುನ್ನ
ಮಾಸ್ಕ್ ಧರಿಸಿ ಆಫೀಸ್ಗೆ ಹೊರಡಿ
ಬೆಂಗ್ಳೂರ್ ತುಂಬ ಹೊಗೆಯೋ ಹೊಗೆ....

Wednesday 11 December 2019

***ಶಾಯರಿ***

ಹಾಡು 
*******
ಏನನೋ ನಾ ಹೇಳುತಾ ಸಾಗುವೆ
ನೀ ಹಿಂದೆಯೇ ಹಿಂಬಾಲಿಸಿ ಬಾ
ಮನವರಿಕೆಯಾಗಲು ಮೊದಲಿಗೆ
ಮರುಕಳಿಸೆ ಜೊತೆಯಾಗಿ ಬಾ
ಮರೆತು ಮುಗ್ಗರಿಸಿದಂತೆ ಸಾಲು
ಎಡವದೆ ಬೆನ್ನ ತಡವು ಬಾ
ನಿನ್ನ ಕುರಿತೇ ಕೊನೆ ಮುಟ್ಟುವೆ ಮೆಲ್ಲೆಗೆ 
ಕೇಳುತಲೇ ಉಲಿ ನೀ......  ವ್ಹಾ.. ವ್ಹಾ..

ಶಾಯರಿ.. ಶಾಯರಿ.. ನಿನ್ನ ಈ ವೈಖರಿ!

ನಮ್ಮ ನಡುವ ಈ ಜುಗಲ್ಬಂದಿಗೆ
ರೀತಿ ನಮ್ಮದೇ ಬೇರೆ ಇಲ್ಲ ಬಾ
ನೀನು ಸೋತು, ನಾನೂ ಸೋತು ಮುಂದೆ 
ಇಬ್ಬರೂ ಗೆದ್ದೆವೆನ್ನೋಣ ಬಾ
ಏನೋ ಹೊಸತೊಂದನು ಹುಡುಕಲು 
ಮೌನಕ್ಕೆ ತಂಬೂರಿ ಮೀಟು ಬಾ
ನಿನ್ನ ಹೆಸರ ಒಗಟು ಮಾಡಿ ಹಾಡುವೆ
ಬಿಡಿಸಿ ಉಪಕರಿಸು ...... ವ್ಹಾ.. ವ್ಹಾ..



ಶಾಯರಿ.. ಶಾಯರಿ.. ನಿನ್ನ ಈ ವೈಖರಿ!

ನೀಳವೆನಿಸಿದರೆ ಮತ್ತೆ ಆಲಿಸು
ನೀರಸವಾದರೆ ದಾಳಿಗೆರಗಿ ಬಾ
ನುರಿತವಾದುವು ನಿನ್ನ ನೋಡುತ
ನಡುಗಿ ಹೋದವು ಕಂಡು ಬೆಚ್ಚು ಬಾ
ಗುಂಡಿಗೆ ತಾಳವು ಹೆಚ್ಚುತ ಹೆಚ್ಚುತ
ನಿನ್ನ ಎದೆಗೆ ತಾಳೆ ಹಾಕಲೆಂದು ಬಾ
ಇಬ್ಬರೆದೆಯ ಒಳಗೆ ಮಿಡಿದ ಶಾಯರಿ
ನೆಚ್ಚಿ ಕನಿಕರಿಸು ....  ವ್ಹಾ.. ವ್ಹಾ..



ಶಾಯರಿ.. ಶಾಯರಿ.. ನಿನ್ನ ಈ ವೈಖರಿ!

ತುಸು ಪೋಲಿಯಾಗುವೆ ತಡೆಯದೆ 
ಹಿಡಿದು ಮರುಳಾಗಿಸುತ ಬೀಗು ಬಾ
ಹುಸಿ ಕೋಪದ ಎಳೆಯನು ಬಿಡಿಸುತ
ಮುಂಗೋಪಿಯ ಮುಗುಳ್ನಗೆಯ ತಿದ್ದು ಬಾ
ಎಲ್ಲ ಮೆಚ್ಚಿಗೆಯಾದರೂ ನನ್ನಲಿ
ಏನೂ ಮೆಚ್ಚದಂತೆ ನಟಿಸು ಬಾ
ನಿನಗೆಂದೇ ಗೀಚಿ ಹರಿದ ಕಾಗದ 
ಒಗ್ಗೂಡಿಸಿ ಉದ್ಗರಿಸು....  ವ್ಹಾ.. ವ್ಹಾ..



ಶಾಯರಿ.. ಶಾಯರಿ.. ನಿನ್ನ ಈ ವೈಖರಿ!

ಕವಿತೆ
******
ಶಾಯರಿ ನಾ ಹೇಳುತ್ತಾ ಸಾಗುವೆ
ನೀ ಹಿಂದೆಯೇ ಹಿಂಬಾಲಿಸಿ ಸಾಗಿ ಬಾ
ಮನವರಿಕೆಯಾಗಲೆಂದು ಮೊದಲಿಗೆ
ಮತ್ತೆ ಮರುಕಳಿಸಲು ಆಗ ಜೊತೆಯಾಗಿ ಬಾ
ಮರೆತು ಮುಗ್ಗರಿಸಿದಂತೆ ಸಾಲುಗಳು
ಎಡವದಂತೆ ತನ್ನ ಬೆನ್ನ ತಡವು ಬಾ
ನಿನ್ನ ಕುರಿತೇ ಕೊನೆಗೊಳಿಸುವೆ ಹೇಳದೆ
ಕೇಳಿ ಕೇಳದಂತೆ ಉಲಿ ವ್ಹಾ.. ವ್ಹಾ..

ನಮ್ಮ ನಡುವ ಈ ಜುಗಲ್ಬಂದಿಗೆ
ನಮ್ಮದೇ ರಿವಾಜು ಬೇರೆ ಇಲ್ಲ ಬಾ
ನೀನು ಸೋತು, ನಾನೂ ಸೋತು ಹಾಗೇಯೇ
ಇಬ್ಬರೂ ಗೆದ್ದೆವೆನ್ನೋಣ ಬಾ
ಏನೋ ಹೊಸತೊಂದನು ಆಲೋಚಿಸೆ
ಮೌನಕ್ಕೆ ತಂಬೂರಿ ಮೀಟು ಬಾ
ನಿನ್ನ ಹೆಸರ ಒಗಟು ಮಾಡಿ ಹಾಡುವೆ
ಬಿಡಿಸಿದಂತೆ ನಾಚಿ ಹೇಳು ವ್ಹಾ.. ವ್ಹಾ..

ನೀಳವೆನಿಸಬಹುದು ಮತ್ತೆ ಆಲಿಸು
ನೀರಸವಾದರೆ ದಾಳಿಗೆರಗಿ ಬಾ
ನುರಿತವಾದುವೆಲ್ಲ ನಿನ್ನ ನೋಡುತ
ನಡುಗಿ ಹೋದವದನು ಕಂಡು ಬೆಚ್ಚು ಬಾ
ಗುಂಡಿಗೆ ತಾಳವು ಹೆಚ್ಚುತ ಹೆಚ್ಚುತ
ನಿನ್ನ ಎದೆಗೆ ತಾಳೆ ಹಾಕಿ ನೋಡು ಬಾ
ಇಬ್ಬರೆದೆಯ ಒಳಗೆ ಮಿಡಿದ ಶಾಯರಿ
ನೆಚ್ಚಿ ಕೊಂಡಾಡಿ ಕೂಗು ವ್ಹಾ.. ವ್ಹಾ..

ಪಿಸು ಮಾತಿನ ಪೋಲಿತನವ ಹಿಡಿಯುತ
ಮಳ್ಳನ ಮರುಳಾಗಿಸುತ್ತ ಬೀಗು ಬಾ
ಹುಸಿ ಕೋಪದ ಎಳೆಯನ್ನು ಬಿಡಿಸುತ
ಮುಂಗೋಪಿಯ ಮುಗುಳ್ನಗೆಯ ತಿದ್ದು ಬಾ
ಎಲ್ಲ ಮೆಚ್ಚಿಗೆಯಾದರೂ ನನ್ನಲಿ
ಏನೂ ಮೆಚ್ಚದ ಹಾಗೆ ನಟಿಸು ಬಾ
ನಿನಗೆಂದೇ ಗೀಚಿ ಹರಿದ ಹಳೆಗಳ
ಒಗ್ಗೂಡಿಸಿ ಉದ್ಗರಿಸು ವ್ಹಾ.. ವ್ಹಾ..

Tuesday 10 December 2019

ಏಕಾಂತವೇ ಅರಸಿ ಬಾ ನನ್ನನು

ಏಕಾಂತವೇ ಅರಸಿ ಬಾ ನನ್ನನು
ಹೇಗಾದರೂ ವರಿಸು ಈ ಬಾಳನು
ಈ ಗಾಜಿಗೆ ಅಂಟಿ ಕೂತ ಹನಿ
ಇನ್ನೊಂದು ಹನಿಯನ್ನ ಕೂಡುತ್ತಿದೆ
ನನ್ನ ಮುಗಿಲು ಎಲ್ಲೋ ಮರೆಯಾಗಿದೆ    -- (೧)


ನೆರಳನ್ನು ಕಂಡು ಜಂಭ ಪಡುವಾಗ 
ನೆನಪೈತೆ ನೀನು ಬಿಕ್ಕಳಿಸುತ್ತಿದ್ದೆ
ಮರೆಯೋದು ಹೇಗೆ ಜಾತ್ರೆಯ ನಡುವೆ 
ಅವಮಾನ ಮಾಡಿ ಮೂಲೆಗಿರಿಸಿದ್ದೆ 

ದಾರಿ ತಿರುವಲ್ಲೆಲ್ಲ ಬೆಳಕ ಕಂಡೆ
ನೀನಷ್ಟೇ ಕಂದೀಲು ಹಿಡಿದು ಕಾದೆ
ಮುಂದೇನೋ ಗೊತ್ತಿಲ್ಲ ನೀನೇ ದಿಕ್ಕು
ಏಕಾಂಗಿ ಆಗೋದೆ ಇನ್ನೇನ್ ಬೇಕು?    -- (೨)


ಕುಡುಗೋಲ ಪಾಠ ಮನಸಿಟ್ಟು ಕಲ್ತು
ಕೆಂಪಾದೋ ಎಲ್ಲ ಬಿಳಿ ಹಾಳೆ ಒಡಲು
ಕಡಲನ್ನೋ ಕಥೆಯ ಕಣ್ಣೀರು ಬರೆದು
ನಗುವೆಂಬೋ ದಡದಲ್ಲಿ ಅವಿತಿತ್ತು ನೋವು

ಕಾಡನ್ನ ಕಡಿದಾಗ ಊರೊಂದಾಯ್ತು
ಊರಿಗೂರೇ ಉರಿದು ಸುಡುಗಾಡಾಯ್ತು
ಜೋಳಿಗೆ ತುಂಬ್ದಷ್ಟು ಇನ್ನೂ ಬೇಕು 
ಖಾಲಿ ಕೈಲಿದ್ಬಿಡ್ಲಾ  ಸಮ್ನೆ ನಕ್ಕು?  -- (೩)

ಏಕಾಂತವೇ ಹುಡುಕಿ ಬಾ ನನ್ನನು
ಹೇಗಾದರೂ ವರಿಸು ಈ ಬಾಳನು  ......... 

Thursday 5 December 2019

ಹೂ ದಳಗಳ, ಈ ತಳಮಳ

ಹೂ ದಳಗಳ, ಈ ತಳಮಳ
ಸಂಚರಿಸಿದೆ ನನ್ನ ಈ ಉಸಿರಿಗೆ
ಕಾರಣವನು ನೀಡುವ ಭಯ
ಈ ಅನುಭವ ಹೊಸತು ಈ ತನುವಿಗೆ
ಕಾತರದಲಿ ನೀ ಬೆರೆತರೆ ನಾ ಬೆವರುವೆ ಸೋಲುತ...

ಹಾತೊರೆಯುವೆ ನೀ ತೊರೆದರೆ 
ಬಾನುಲಿಯಲೂ ಭೋರ್ಗರೆತವೇ 
ಜೀಕಾಡುವ ಮನವ ನೀ ದೂಡಲು ಇನ್ನೂ ತಾ ಸನಿಹಕೆ ಬರುವುದು 
ತೂಕಡಿಕೆಯ ಆರಂಭಕೆ 
ಕಣ್ಣಾಲಿಯ ಆವರಿಸುವೆ 
ಆರೋಹಣ ಮಿಡಿತ ನೀ ಕಾರಣ ಖಚಿತ ನೀರಾಗಲೇ ಕರಗುತ
ಒಂದು ನೂರು ಬಾರಿ ತೆಕ್ಕೆ ಸೇರಿಕೋ... 

ಈ ಕೊರೆಯುವ ತಂಗಾಳಿಗೆ 
ಬಾ ಕುಲುಮೆಯ ಊದು ಆ ಕೊಳಲಲಿ 
ಹಂಬಲಿಸುವೆ ಚಿನ್ನದ ಗರಿ 
ಹಾರಲು ಹೊಸ ಆಸೆ ನಿನ್ನೊಲವಲಿ 
ಮಾರ್ದನಿಸಲಿ ನಿನ್ನ ಕರೆ ತೋರ್ಬೆರಳಿಗೆ ಸಿಕ್ಕುವೆ.. 

ನೀ ತೀಡದ ಕಣ್ ಕಪ್ಪಿಗೆ 
ಓಲೈಸುವ ಕಣ್ಣೀರಿದೆ 
ಗಾಂಧರ್ವದ ಸಲುಗೆ ಬೇಕಂತಲೇ ಕೊಡದೆ ಒದ್ದಾಡುವ ಸುಖವಿದೆ 
ಕಾಡ್ಗಿಚ್ಚಿನ ಜ್ವಾಲೆಯಲೂ 
ರೋಮಾಂಚಕ ಕಾರಂಜಿ ನೀ 
ಓ ಮೇಘವೇ ನನ್ನ ಸಂದೇಶವ ಕೊಂಡು ಕದ್ದೋಡುವೆ ಎಲ್ಲಿಗೆ.. 
ನನ್ನ ಸಂತೆಯಲ್ಲಿ ನಿನ್ನೆ ಮಾರಿಕೋ... 

*ಹಾಡು*
https://soundcloud.com/bharath-m-venkataswamy/2a-1

Tuesday 3 December 2019

ದಾರಿ ಎದುರುನೋಟಕೆ ಸಿಕ್ಕಳು

ದಾರಿ ಎದುರುನೋಟಕೆ ಸಿಕ್ಕಳು
ಚೂರಿ ಕಣ್ಣ ಸುಂದರಿ
ಹಾರಿ ನುಲಿಯುವ ಕುರುಳ ಮರೆಯಲಿ 
ಅಡಗಿ ಕೂತ ಅಚ್ಚರಿ 
ನಗುವಿನ ಸೊಬಗಿಗೆ ನಾಚುವ ಸರದಿ 
ನನ್ನ ಪಾಲಿಗೆ ದೊರೆತಂತೆ 
ಬೆರಳಿನ ಉಗುರಿನ ಬಣ್ಣದ ಸಾಲು 
ನನ್ನೇ ಕೂಗಿ ಕರೆದಂತೆ 
ನಿನ್ನ ಹಿಂದೆ ಬರಲೇನು, ನೆರಳ ಹುದ್ದೆ ಪಡೆದಂತೆ...

ಬಲಹೀನನ ತೋಳಿನ ತುಂಬ
ಉಸಿರು ಕಟ್ಟಿದ ಬಯಕೆಗಳು 
ಮನ ಮೋಹಿಸಿ ಮರು ಮಾತಿರದೆ 
ಸೇರಿದೆ ಹೇಗೆ ಕವಿತೆಯಲೂ 
ಸಂಜೆ ಜಾರೋ ವೇಳೆ, ಎದುರು-ಬದುರು ಕೂತು 
ಯಾವ ಸದ್ದೂ ಇರದೆ, ಹಂಚಿಕೊಂಡ ಮಾತು 
ಇನ್ನೂ ಗುನುಗುವಾಗ ಮತ್ತೆ ಕನಸು ಬಿದ್ದಂತೆ 
ನಿನ್ನ ಹಿಂದೆ ಬರಲೇನು, ಎಲ್ಲೂ ಬಿಡದ ಮಗುವಂತೆ...

ಅನುರಾಗದ ಮೆರವಣಿಗೆಯಲಿ 
ಇರಿಸಿ ಸಾಲು ದೀಪಗಳು 
ಕಿಡಿ ಹೊತ್ತಿಸಿ ಸಂಭ್ರಮಿಸುವೆನು 
ಕುಡಿ ನೋಟದಲಿ ನೀನಿರಲು 
ಗುರುತು ಪರಿಚಯವಿರದೆ, ಹುಟ್ಟೋ ಪ್ರೀತಿ ಚಂದ 
ಏನೂ ಕಾರಣವಿರದೆ, ಗಿಟ್ಟಲ್ಲ ಅನುಬಂಧ 
ಎಲ್ಲ ಹೇಳಿ ಇನ್ನೂ ಏನೋ ಬಾಕಿ ಉಳಿದಂತೆ 
ನಿನ್ನ ಹಿಂದೆ ಬರಲೇನು, ಹೆಜ್ಜೆ ಬಿಟ್ಟ ಗುರುತಂತೆ...

*ಹಾಡು *


https://soundcloud.com/bharath-m-venkataswamy/aervcypz0mt1

Friday 29 November 2019

ಅರೆಬೆಂದ ಪದ್ಯ

ಪೋಣಿಸಿ ಅರೆಬೆಂದ ಪದ್ಯ
ನಿನ್ನ ಓದಿಗೆ ಕೊಟ್ಟೆ
ನೀನೋ ಗೀಚುಹೊತ್ತಿಗೆ ಕಸಿದು
ಒಡೆದ ಸಾಲುಗಳನ್ನು ಮರು ಜೋಡಿಸಿಕೊಂಡು
ನಿನಗೆ ತೋಚಿದ ಹಾಗೆ ಅರ್ಥ ಕಲ್ಪಿಸಿಕೊಂಡೆ

"ವ್ಯರ್ಥ ಸಮಯ ಏಳು ಕತ್ತಲಾಯಿತು"
ದೀಪ ಹೊನಲಿಗೆ ನಿನ್ನ ನೆರಳು ಉತ್ತರಿಸಿತು
"ನನ್ನ ಕಲ್ಪಿಸಿಕೊಂಡವನ ಕಲ್ಪನೆಯ ಸುತ್ತ
ನನ್ನ ಮೀರಿದ ವ್ಯಾಪ್ತಿಯಾಳ ಅರಿವಾಯಿತು!"

ಅನುಮಾನ ಎಲ್ಲೆಲ್ಲೂ, ಒಮ್ಮೊಮ್ಮೆ ಹಿಗ್ಗು
ಇನ್ನೆಲ್ಲೋ ತೋಚದೆ ಸಂಕೋಚ, ಸಿಗ್ಗು
ಏನೋ ಗೊಂದಲ, ಪ್ರಶ್ನೆಗಳ ಗದ್ದಲ
ಕಣ್ಣ ಬಾಷ್ಪಗಳೆಲ್ಲಕೂ ಸಮಾನ ಉತ್ತರ

ಮೊನಚಿನ ಮೊಂಡು ಹಿಡಿ ಬಿಗಿದು
ಝಳಪಿಸಿದಂತೆ ಕಣ್ಣ ಪ್ರಭೆಗೆ
ದಿಗ್ಭ್ರಮೆಗೊಂಡು ನಿದ್ದೆ ಬರದಿರಲು
ಗಂಟಲೊಣಗಿ ಭಯವ ನುಂಗಿಕೊಂಡೆ

ಖಾಲಿ ಬಿಟ್ಟ ಪುಟಗಳಿಗಿಂತ
ಹರಿದು ಗೊಬ್ಬರವಾದವುಗಳೇ ಲೇಸು,
ಇತ್ತ ಏದುಸಿರು ಬಿಡುತ್ತ
ನನ್ನತ್ತ ದಿಟ್ಟಿಸುತ್ತಿವೆ ಒತ್ತ(ಡ)ಕ್ಷರಗಳು

ಪದ್ಯ ಬಿಡಿಸಿ ಹೇಳಲಾಗದು
ಹಾಗೆಂದು ಕಟ್ಟಿ ಹಾಕಲೂ ಕೂಡದು
ಕೆಟ್ಟು ಬರೆದವರೆಷ್ಟು ಮಂದಿಯೋ
ಬರೆದು ಕೆಟ್ಟವರದೆಷ್ಟೋ ....

ನನ್ನ ದೇವರು ನೀನು..ನಿನ್ನ ದೇವರ ಹುಡುಕು

ದಿನಗಳುರುಳಿ ದುರುಳ ರಾತ್ರಿಗಳು
ಹೊದ್ದ ಕಂಬಳಿಯೊಳಗೆ ಹೆಗ್ಗಣಗಳಂತೆ
ಮೈಯ್ಯೆಲ್ಲ ಪರಚಿ ಗಾಯವಾಗಿಸಿವೆ.
ಹತೋಟಿಗೆ ಸಿಗದ ಕನಸೊಂದರ ನೆರಳು
ಕಣ್ಣಿಗೆ ಕಟ್ಟಿದಂತೆ ಪಸೆಯ ಗುರುತು..
ಸೂಜಿಯಾಕಾರದ ಬಿಸಿಲು ಚಪ್ಪರ ಸೀಳಿ
ಮೀಟಿ ಎಚ್ಚರವಾದಾಗ
ನಿಜ ಲೋಕವೂ ಸಜೆಯೊಂದಿಗೆ ಸಜ್ಜಾಗಿತ್ತು

ಅಮಾನುಷ ದಾರಿಯಲ್ಲಿ ಸಾಗಿ
ಗುಡಿ ತಲುಪಿ ಕೈ ಮುಗಿವಷ್ಟರಲ್ಲಿ
ದೇವರು ತಮಾಷೆಯಂತೆಯೂ
ಹೂವು ಕುರೂಪವಾಗಿಯೂ ಕಂಡು
ನಾಸ್ತಿಕರ ಗುಂಪಲ್ಲಿ ಭಜನೆಗೆ ಕೂತೆ..
ಅಸಲಿಗೆ ಇಲ್ಲವೆಂಬಲ್ಲೇ ಹೆಚ್ಚು
ಇರುವನೆಂಬಲ್ಲಿ ಕಡಿಮೆ ಕಾಲ ಕಳೆವನಂತೆ..
ಊರಾಚೆ ನೆಟ್ಟ ಕಲ್ಲಿನ ಸೊಲ್ಲು

ರಾಕ್ಷಸನ ಅಂಗರಕ್ಷಕನ ಶತ್ರು ಯಾರು?
ಹಸಿದವರ ಪಾಲಿನ ದೇವರಾರು?
ರೂಪ ತಾಳುವ ಭ್ರಮೆಗಳ ಉಪಮೆಗೆ
ರುಚಿಗಿಷ್ಟು ಉಪ್ಪು ಸಿಕ್ಕಂತೆ ಏಕಾಂತ,
ಯಾವ ದಡ ತಲುಪಿಸುವುದೋ..
ಅಲೆಗಳಿಗೂ ಕಾಡಿದ ಪ್ರಶ್ನೆ!
ದೂರ ತೀರದ ನೀರವ ನೊಗಕೆ
ಜೋಡಿಯಾಗಲೊರಟಂತೆ ಸುಳುವು?

ಎಲ್ಲ ಇದ್ದವರಿಗಿಲ್ಲದಿರದವುಗಳ ಚಿಂತೆ
ಏನೂ ಇಲ್ಲದವರಲ್ಲಿ ಎಲ್ಲವೂ ಇದ್ದಂತೆ
ನಿನ್ನ ಕಿಸೆಯಿಂದ ನಾ ಕದ್ದ ನಿದ್ದೆಗೆ
ಬದಲಿ ನನ್ನ ಭ್ರಮೆಗಳ ಭಾರ ಹೊರೆಸುವೆ
ಆದರೆ ಸಹಿಸು, ಅಥವ ಮುಂದೆ ದಾಟಿಸು
ನನ್ನ ದೇವರು ನೀನು..
ನಿನ್ನ ದೇವರ ಹುಡುಕು..

ಕಣ್ಣೀರೇ ನೀನೆಷ್ಟು ಬಲಹೀನ

ಸಿಕ್ಕ ತೋಳಿಗೆ ಹೀಗೆ
ಮಿತಿ ಮೀರಿ ಹರಿವೆ
ಕಣ್ಣೀರೇ ನೀನೆಷ್ಟು ಬಲಹೀನ!
ಹೊಮ್ಮಿದಷ್ಟೂ ಪ್ರಾಣ
ಹಗುರಾಯಿತೆನ್ನುವರು
ನನಗೇಕೋ ಚೂರು ಅನುಮಾನ

ನಕ್ಕು ಮರೆಸುವ ಯತ್ನ
ಸಿಕ್ಕಿ ಬೀಳುವ ಶಂಕೆ
ನಕ್ಕಾರು ಸುತ್ತಲ ಆ ನಾಕು ಮಂದಿ
ಬೆವರಿನೊಟ್ಟಿಗೆ ನಿನ್ನ
ನೆಂಟಸ್ಥಿಕೆಯ ಛಾಯೆ
ಆಗಲೊಲ್ಲೆ ಏಕೆ ಕೆನ್ನೆಯಲಿ ಬಂದಿ

ನಿನ್ನ ಹರಿವೂ ಒಂದು
ಭಾಷೆಯ ರೂಪವೇ
ಭಾಷಾಂತರ ಗೊಳಿಸು ನನ್ನೆದೆಯ ನೋವ
ನೆನೆಪುಗಳು ಸಾಕಷ್ಟು
ಸಾಲುಗಟ್ಟಿವೆ ದುಃಖ-
-ಉಮ್ಮಳಿಸಿ ಆಗಿವೆ ಕಣ್ಣೆರಡೂ ತೇವ

ಕೋಡಿಯಾದೆ ಒಮ್ಮೆ
ಕಣ್ಣಂಚಲಿ ಜಿನುಗಿ
ಮರೆಯಾದ ಜ್ಞಾಪಕ ನಿನಗೂ ಇರಲಿ
ಸರಿಯಾದ ಸಮಯಕೆ
ಸವಿನಯದಿ ಕರೆಯುವೆ
ಮರೆಯದೇ ಬರಬೇಕು ಬರಗಾಲದಲ್ಲಿ

ರಂಗು ರಂಗಿನ ಅಂಗಿ
ತೊಡಿಸಿ ನಡೆಸುವರಂತೆ
ನಿನಗಿಲ್ಲ ನನ್ನೊಳಗೆ ಆ ಒಂದು ಪಾತ್ರ
ನಿನ್ನಿಷ್ಟಕೆ ನಾನಲ್ಲ
ನನ್ನಿಷ್ಟಕೆ ನೀನಲ್ಲ
ಆದರೂ ಹೃದಕ್ಕೆ ನೀ ಖಾಸ ಮಿತ್ರ

ಬರೆದ ಪತ್ರಗಳಲ್ಲಿ
ಅಳಿಸಿದಕ್ಷರಗಳನು
ಪೂರ್ತಿಗೊಳಿಸುವ ಶಕುತಿ ಕುಂದಿದೆ ಬೆರಳಿಗೆ
ದುಡುಕು ಸಂಜೆಗಳೆಷ್ಟು
ನಿಷ್ಕರುಣಿಯೆಂದರೆ
ಬಿಡಿಸಿ ಹೇಳದ ಹೊರತು ವಿಧಿಯಿಲ್ಲ ಕೊರಳಿಗೆ!

ಮೌನಕ್ಕೆ ಶರಣಾಗುವಾಗ

ಮೌನಕ್ಕೆ ಶರಣಾಗುವಾಗ
ಕೇಳಿತ್ತು ಆ ನಿನ್ನ ಗುನುಗು
ಕನಸಲ್ಲಿ ನೀ ಕಾಣುವಾಗ
ಕಣ್ಣಲ್ಲಿ ಯಾಕಿಷ್ಟು ಮೆರುಗು?
ಹೇಳಿ ಹೋದೆ ನೀನೊಂದು ಶಾಯರಿ
ಸೋಕಿದಂತೆ ಹೃದಕ್ಕೆ ಹೂಗರಿ
ಸಣ್ಣ ತಪ್ಪು ಮಾಡೋ ಆಸೆ
ಸಣ್ಣದೊಂದು ಸಂಕೋಚಕೆ.. 

ಒಂದೊಂದೇ ಎಳೆಯನ್ನು ಬಿಚ್ಚಿ 
ಹೇಳಿ ಕೊಡುವಾಗ ನೀ ಪ್ರೇಮ ಪಾಠ 
ಮಗುವಂಥ ಮನಸನ್ನು ಬಾಚಿ 
ತೂಗಿ ತೊನೆದಾಡಿದೆ ಪಾರಿಜಾತ 
ಕಾರಣವಿರದೆ ಮೂಡುವ ಮುಗುಳು 
ಹೆಜ್ಜೆಯ ಮೇಲೆ ಹೆಜ್ಜೆಯನಿಡಲು 
ಬಣ್ಣ ಹಚ್ಚಿ ಹೋದೆ ನೀನು 
ನೀನೇ ಬರೆದ ಚಿತ್ತಾರಕೆ.. 

ಆರಂಭಿಸು ಒಂದು ವಾದ 
ಸೋತು ತಲೆ ಬಾಗುವೆ ನಿನ್ನ ಮುಂದೆ 
ಆಲಂಗಿಸು ಮತ್ತೆ ಬೇಗ 
ಸಂಜೆ ಮೀರಿದ್ದು ಅರಿವಾಗದಂತೆ 
ಅನುಮತಿ ಇರದೆ ಹಣೆಗಿಡು ಮುತ್ತು 
ಹರೆಯದ ಬೇಲಿ ನಾಚುವ ಹೊತ್ತು 
ಕದ್ದು ದೀಪ ಆರೋ ಮುನ್ನ 
ಜಾರಿ ಹೋಗು ಆಂತರ್ಯಕೆ..


https://soundcloud.com/bharath-m-venkataswamy/dvsfcg0cwp1e

Monday 25 November 2019

ಕೊನೆಯ ತುತ್ತು ಬೇಡವೆಂದಾಗ

ಕೊನೆಯ ತುತ್ತು ಬೇಡವೆಂದಾಗ
ಕರಿಬೇವಿನ ಜೊತೆ ಉಣಿಸಿದ ಕೈ
ಆಟದಲ್ಲಿ ಬಿದ್ದು ಗಾಯಗೊಂಡಾಗ
ಸೋತ ಬೆನ್ನ ನೀವಿದ ಕೈ 
ಅಂಜಿದ ಇರುಳಿಗೆ ಬೆಳಕಿನ ಅಂಬಲಿ 
ರಕ್ಷೆಯ ಕಂಬಳಿ ಹೊದಿಸಿದ ಕೈ 
ನಡು ನೀರಲಿ ಈಜಲು ಕಲಿಸಿ
ಖಾಲಿ ಕಿಸೆಯನು ಹೊರೆಸಿದ ಕೈ 

ಒಲ್ಲದ ಬದುಕಿನ ಬಾಗಿಲ ತೆರೆಸಿ 
ಸಾಕ್ಷ್ಯ ರೂಪವ ಬಿಡಿಸಿದ ಕೈ 
ಬಸಿದ ಕನಸಿಗೆ ಕರಗಿದ ಕಣ್ಣಿಗೆ 
ಬೊಗಸೆ ಒಡ್ಡಿದ ಕರುಣೆಯ ಕೈ 
ಆತ್ಮದ ತತ್ವದ ಸತ್ವವ ಸಾರಿ
ಬಿಂಬವ ಬೀರಿದ ಕನ್ನಡಿ ಕೈ 
ನಿಲ್ಲದ ಕಾಲವ ನವೀಕರಿಸಿ 
ಕಾಲಾನುಸಾರ ನಡೆಸಿದ ಕೈ 

ಬೆಳೆಗೂ ಕಳೆಗೂ ಕುಡುಗೋಲಿಗೂ 
ಕಡಿವಾಣದ ಪಾಠವ ಕಲಿಸಿದ ಕೈ 
ಹೊತ್ತಿದ ಉರಿಗೆ ಮೆತ್ತಿದ ಮಸಿಯಲಿ 
ಚಿತ್ತಾರವನು ಬಿಡಿಸಿದ ಕೈ 
ನಿರ್ದಯಿ ದೇವರ ಮಾಡಲು ಕೈ 
ನಿರ್ಮಲ ರಕ್ಕಸಳಾಗಲೂ ಸೈ  
ಬಳೆಗಾರನ ಬೆಲೆಬಾಳುವ ಕೈ 
ಬಲಹೀನನ ಬಲವರ್ಧನ ಕೈ 

ಎಲ್ಲೋ ದೂರದ ಕರೆಗೆ

ಎಲ್ಲೋ ದೂರದ ಕರೆಗೆ
ಗಮನ ಹರಿಸುವ ಸರದಿ
ಕೊನೆಯ ಹೆಜ್ಜೆಯ ಗುರುತು
ಬಿಡುವ ಮನೆಯಂಗಳದಿ
ಹಿತ್ತಲ ಬಾಗಿಲು ಮುಂಬಾಗಿಲಿಗೆ ದೂರ
ಆರಿದ ಒಲೆಗೆ ಹಸಿದು ಮಂಕು ಹಜಾರ
ತೂಗುಯ್ಯಲೆಯ ಮೇಲೆ
ಮಾಗಿದ ಕನಸಿನ ನೆರಳು 
ಬಿರಿದ ಗೋಡೆಯ ತುಂಬ 
ಹಬ್ಬಿದ ಬೇರಿನ ಟಿಸಿಲು ... 

ಶಾಲೆಯ ಜಾಡಿನ ತಿರುವಲ್ಲಿ 
ಸಿಗುವುದು ನಮ್ಮ ಗ್ರಾಮ ಗುಡಿ
ತಣ್ಣಗೆ ಕುಂತ ಭಗವಂತ
ಹಳೆಯ ಪರಿಚಯ ನಮಗಲ್ಲಿ
ಹೇಳಿ ಬರುವ ಅವನಿಗೂ ಒಂದು ವಿದಾಯ
ಮುನಿದ ಬೀದಿ ದೀಪಗಳೇ
ಗುಮ್ಮನು ಬರದೆ ಕಾವಲಿರಿ
ಆಲದ ಮರದ ಕೊಂಬೆಗಳೇ 
ಎಟುಕುವ ಬಿಳಲನು ತೂಗಿ ಬಿಡಿ
ಹೊರಡುವ ಮುನ್ನ ಸವಿದು ಹೋಗುವೆ ಖುಷಿಯ.. 

ಅಟ್ಟದ ಧೂಳಿಗೆ ಒರಗಿ 
ಮಲಗಿತು ಅಜ್ಜನ ಕೋಲು 
ಕಬ್ಬಿಣ ಪೆಟ್ಟಿಗೆಯೊಳಗೆ 
ಮರುಗಿತು ಅಜ್ಜಿಯ ಶಾಲು 
ಮುರಿದ ಬಳಪಕೆ ಇನ್ನೂ ತಿದ್ದುವ ತವಕ  
ಹರಿದ ಸೀರೆಯು ಕೌದಿಯಾಗದೆ ಮರುಕ 
ಸವೆದ ಚಪ್ಪಲಿಗಿನ್ನೂ 
ದಾರಿ ಕಾಯುವ ಕೆಲಸ 
ಬೀಗ ಬಿಗಿದ ಕದಕೆ 
ಕಳೆದ ಕೀಲಿಯ ವಿರಸ...  

*ಹಾಡು*
https://soundcloud.com/bharath-m-venkataswamy/yozxzcgl0d3k


ಕಳೆದು ಹೋದ ನೆನ್ನೆಗೆ

ಕಳೆದು ಹೋದ ನೆನ್ನೆಗೆ
ನಾಳೆಯ ಬಲಿ ಕೊಡುವುದೇ?
ಸರಿದು ಹೋದ ಕ್ಷಣಗಳು
ನೆನಪು ತಾಳಿವೆ ಮರೆಯದೆ
ಹಾಡಬೇಕೆಂಬ ಬಯಕೆಗೆ
ಬೇಡಿ ಹಾಕಲು ಏತಕೆ?
ಹಾಳೆ ಹರಿದರೆ ಹೊರಳಿಸಿ
ಓದು ಬದುಕನು ಮುಂದಕೆ..

ಎಲ್ಲೋ ಗೂಡ ಕಟ್ಟುವ ಹಕ್ಕಿ
ಇನ್ನೆಲ್ಲೋ ಗುಟುಕ ಅರಸಿದಂತೆ
ಹಗಲು ಕನಸು ಕಾಣೋ ಚುಕ್ಕಿ
ರಾತ್ರಿ ವೇಳೆ ಮಿನುಗುವಂತೆ
ನಿನಗೂ ಒಂದು ಕಾಲ ಬಂದೇ ಬರುವುದು
ಅರಿವು ನಿಂತ ನೀರು ಆಗಲೇ ಬಾರದು
ನಿನಗೆ ನೀನೇ ಬೇಲಿ ಹಾಕೋ
ಹುಚ್ಚು ಕವಿಯೋ ಮುನ್ನ ಬೇಗ
ಎಚ್ಚರವಾಗು.. ಕನಸುಗಳು ಕಮರಿ ಹೊಗದಂತೆ..

ಕವಲು ದಾರಿ ಎದುರಾದರೇನು
ಗುರಿಯತ್ತ ಗಮನ ಹರಿಸು ನೀನು
ಎಡವಿ ಬೀಳುತ ಕಲಿತ ಪಾಠ
ತರುವ ಆತ್ಮವಿಶ್ವಾಸವನ್ನು
ಗಳಿಸು ಹಂಚುವಂತೆ ಎಲ್ಲವ ಎಲ್ಲೆಡೆ
ನಗುವೇ ನಿನ್ನ ಸ್ವಂತ ಸವಿದು ಮುನ್ನಡೆ
ತಿರುವು-ಮರುವು ದಾಟಿದಂತೆ
ಗೆಲುವು ಎದುರು ನೋಡುವಂತೆ
ಸಾಗರವಾಗು... ಅಲೆಗಳೆ ಒಲಿದ ಚಪ್ಪಾಳೆಯಂತೆ...

Friday 22 November 2019

ನಿನ್ನೊಂದಿಗೆ ಹೇಗಾದರೂ ಸಾಗೋದೇ ರೋಮಾಂಚಕ

ಪ್ರಾಣಾನೇ ಪಣವಾಗಿಟ್ಟು ಪ್ರೀತಿಗಾಗಿ

ಪ್ರಾಣಾನೇ ಪಣವಾಗಿಟ್ಟು ಪ್ರೀತಿಗಾಗಿ
ಜೋಪಾನ ಮಾಡಿಕೊಂಡ ಪ್ರೇಮಿ ನಾನು
ಕಣ್ಣಲ್ಲಿ ಕಣ್ಣ ಇಟ್ಟು ನೋಡು ಈಗ
ಕಣ್ಣೀರೂ ನಿನ್ನ ಧ್ಯಾನ ಮಾಡೋದನ್ನು

ತೀರದಂಥ ಈ ನೋವಲ್ಲೂ, ಮತ್ತೆ ಹೇಳುವೆ ನೀ ಕೇಳು
ಜೀವಮಾನಕೆ ನೀನಷ್ಟೇ ಬೇರೆ ಯಾರಿಲ್ಲ
ಗಾಳಿ ಮಾತಿಗೆ ಮರುಳಾಗಿ, ಗೇಲಿ ಮಾಡುವೆ ಹೀಗೇಕೆ
ನಿನ್ನ ಬಿಟ್ಟರೆ ಈ ಹೃದಯ ಮಿಡಿಯೋ ಹಾಗಿಲ್ಲ

ಸರಿಯಾ ಹೇಳು ಇದು ಸರಿಯಾ ಹೇಳು?
ಕೊಲ್ಲು ನನ್ನ ಒಂಟಿ ಮಾಡೋ ಬದಲು
ಸರಿಯಾ ಹೇಳು ಇದು ಸರಿಯಾ ಹೇಳು?
ಕೇಳೋರಿಲ್ಲ ಈ ಮನದ ಗೋಳು....


ಹಾಡೊಂದು ಮುಗಿದಾಗ, ಬಿಡದೆ ಕಾಡುವ ರಾಗ
ಅನುರಾಗವೇ ಅನುಮಾನಿಸಿ ಏಕೆ ದೂರವಾದೆ
ಸಾವೊಂದು ಎದುರಾಗಿ, ಕಷ್ಟ ಹೇಳಿಕೊಂಡಾಗ
ಆ ಸಾವಿಗೂ ಸಂತೈಸುತ ದುಃಖನ ತಂದೆ

ಜೋಡಿ ಹೆಜ್ಜೆಯ ಬೇಡಿಕೊಂಡಿದೆ ನಾನು ಹೊರಟಿರೋ ದಾರಿ
ನೀನು ಬಾರದೆ ಚೂರೂ ಸಾಗದು ಏನು ಮಾಡಲಿ ನಾ?
ಕಾದು ಬೆಂದಿರೋ ಮೂಖ ವೇದನೆ ಗೀಚಿ ಹೇಳುವೆ ನಿಲ್ಲು
ಕೋಪವನ್ನು ನೀ ಸಾಕು ಮಾಡದೆ ಹೇಗೆ ಉಳಿಯಲಿ ನಾ..?

ಸರಿಯಾ ಹೇಳು ಇದು ಸರಿಯಾ ಹೇಳು?
ನಿನ್ನ ವಿನಹ ಖಾಲಿ ನನ್ನ ಬಾಳು
ಸರಿಯಾ ಹೇಳು ಇದು ಸರಿಯಾ ಹೇಳು?
ಕೇಳಿ ಹೋಗು ನನ್ನ ಮನದ ಗೋಳು....

Thursday 21 November 2019

ಹೊಸತನ

ಹೊಸ ಪೊರಕೆಗೆ ಮನೆಯೆಲ್ಲ ಹೂವು 
ಹೊಸ ಎಕ್ಕಡ ಕಾಲ ಕಚ್ಚಿದವು 
ಹೊಸ ಮಡಿಕೆಯ ನೀರು ನೀರಸ 
ಹೊಸ ಒಲೆಗೆ ಸೌದೆ ಪಾಯಸ 
ಹೊಸ ಪಾತ್ರೆಯೂ ತಳ ಹಿಡಿಯಿತು 
ಹೊಸ ಮನೆಯಲೂ ಕಸ ಹೊಕ್ಕಿತು 

ಹೊಸ ಅಕ್ಕಿ ಮುದ್ದೆ ಕಟ್ಟಿತು 
ಕೆಂಪು ರಾಗಿ ಗಂಟು ಬಿಗಿಯಿತು
ಹೊಸ ಬಣ್ಣ ಬಳಿದ ಗೋಡೆಗೆ 
ಹಳೆ ಕನ್ನಡಿ ಜೋತುಕೊಂಡಿತು 
ಹೊಸ ಜೋಡಿಗೆ ಮರದ ಬಾಗಿಲು 
ಹಳೆ ಸೇರು ಹೊಸ್ತಿಲಾಯಿತು  

ಹೊಸ ಬೆಳಕು ಛಾಯೆ ಮೂಡಲು 
ಹೊಸ ಋಜುವು ಕನಸ ಕಾಣಲು 
ಹೊಸ ನಾಳೆಗೆ ಅದೇ ಕಣ್ಣು 
ಹೊಸತನವನು ಪಸರೋ ಮಣ್ಣು 
ಹಳೆ ಕಿಸೆಯಲಿ ಹೊಸ ಕಾಸು 
ಹಳೆ ಕಾಸಿಗೆ ಹೊಸ ಅಂಗಿ 

ಹಳೆ ಪದ್ಯಕೆ ಹೊಸ ರಾಗ 
ಹಳೆ ಹಕ್ಕಿಗೆ ಹೊಸ ಚಿಗುರು 
ದಾರಿ ತಿರುವಲಿ ಹೊಸ ಪರಿಚಯ 
ಹೊಸ ಒಲವು ಪ್ರತಿ ಸಲವೂ 
ಕೈ ತುತ್ತಿಗೆ ರುಚಿ ಇಮ್ಮಡಿ 
ಹುಸಿ ತೇಗು, ಹೊಸ ಹಸಿವು 

ಕಸಿಗೊಂಡರೆ ಹೊಸ ಮೊಗ್ಗು 
ಪಕಳೆ ಕೆನ್ನೆಗೆ ಹೊಸ ಸಿಗ್ಗು 
ಮುತ್ತು ಹಳೆಯದು ಮತ್ತು ಹೊಸತು 
ನಲ್ಮೆ ಬಾಳ್ಮೆಗೆ ಒಲಿದ ಸ್ವತ್ತು 
ಮಮತೆ, ಕರುಣೆ ಒಲುಮೆ ರೂಪ 
ನುರಿತ ಸಮಯಕೆ ನಾಳೆ ಹೊಸತು.... 

Wednesday 13 November 2019

ಅಮ್ಮ

ಅಮ್ಮ ಅಂದು ನಾ
ಮಣ್ಣು ತಿಂದ ತಪ್ಪಿಗೆ
ನೀನು ಇತ್ತ ದಂಡನೆ
ಇನ್ನೂ ನೆನಪಿದೆsssss 
ಅಮ್ಮ ಅಂದು ನಾ
ಎಡವಿ ಗಾಯಗೊಂಡರೆ
ನೀನು ಪಟ್ಟ ವೇಧನೆ
ಇನ್ನೂ ನೆನಪಿದೆsssss 
ಅಮ್ಮ ಈ ಕಂದನ
ಎದೆಗೆ ಅಪ್ಪಿ ಹಾಡಿದ
ಲಾಲಿ ಹಾಡಿನ ಸವಿ
ಇನ್ನೂ ನೆನಪಿದೆ... (೧)

ಹಗಲು ರಾತ್ರಿ ಕನಸ ಹೊಸೆದು
ಕೌದಿ ಮಾಡಿ ಹೊದ್ದಿಸಿ
ತೋರು ಬೆರಳ ಹಿಡಿದು ಮೆಲ್ಲ
ಹೆಜ್ಜೆ-ಹೆಜ್ಜೆ ಸೇರಿಸಿ 

ತಿದ್ದಿ ತೀಡಿ ಅಕ್ಷರಗಳ
ಅರ್ಥವನ್ನು ರೂಪಿಸಿ
ಗದ್ದಲವ ಗೆಲ್ಲುವಂಥ
ಮೌನವನ್ನು ಜ್ಞಾಪಿಸಿ

ಎಷ್ಟೇ ಜನುಮ ಕಳೆದು
ಲೋಕ ಗೆದ್ದು ಬಂದರೂ
ನಿನ್ನ ಮಡಿಲ ನಿದ್ದಿಗಿಂತ 
ಯಾವ ಸೊಗಸಿದೆ..  (೨)

ಅಮ್ಮ....

Friday 8 November 2019

ಬರೆದು ಕೆಟ್ಟವರದೆಷ್ಟೋ ....

ಪೋಣಿಸಿ ಅರೆಬೆಂದ ಪದ್ಯ
ನಿನ್ನ ಓದಿಗೆ ಕೊಟ್ಟೆ 
ನೀನೋ ಗೀಚುಹೊತ್ತಿಗೆ ಕಸಿದು 
ಒಡೆದ ಸಾಲುಗಳನ್ನು ಮರು ಜೋಡಿಸಿಕೊಂಡು 
ನಿನಗೆ ತೋಚಿದ ಹಾಗೆ ಅರ್ಥ ಕಲ್ಪಿಸಿಕೊಂಡೆ 

"ವ್ಯರ್ಥ ಸಮಯ ಏಳು ಕತ್ತಲಾಯಿತು" 
ದೀಪ ಹೊನಲಿಗೆ ನಿನ್ನ ನೆರಳು ಉತ್ತರಿಸಿತು 
"ನನ್ನ ಕಲ್ಪಿಸಿಕೊಂಡವನ ಕಲ್ಪನೆಯ ಸುತ್ತ 
ನನ್ನ ಮೀರಿದ ವ್ಯಾಪ್ತಿಯಾಳ ಅರಿವಾಯಿತು!"

ಅನುಮಾನ ಎಲ್ಲೆಲ್ಲೂ, ಒಮ್ಮೊಮ್ಮೆ ಹಿಗ್ಗು 
ಇನ್ನೆಲ್ಲೋ ತೋಚದೆ ಸಂಕೋಚ, ಸಿಗ್ಗು 
ಏನೋ ಗೊಂದಲ, ಪ್ರಶ್ನೆಗಳ ಗದ್ದಲ 
ಕಣ್ಣ ಬಾಷ್ಪಗಳೆಲ್ಲಕೂ ಸಮಾನ ಉತ್ತರ 

ಮೊನಚಿನ ಮೊಂಡು ಹಿಡಿ ಬಿಗಿದು 
ಝಳಪಿಸಿದಂತೆ ಕಣ್ಣ ಪ್ರಭೆಗೆ 
ದಿಗ್ಭ್ರಮೆಗೊಂಡು ನಿದ್ದೆ ಬರದಿರಲು 
ಗಂಟಲೊಣಗಿ ಭಯವ ನುಂಗಿಕೊಂಡೆ 

ಖಾಲಿ ಬಿಟ್ಟ ಪುಟಗಳಿಗಿಂತ 
ಹರಿದು ಗೊಬ್ಬರವಾದವುಗಳೇ ಲೇಸು 
ಇತ್ತ ಏದುಸಿರು ಬಿಡುತ್ತ 
ನನ್ನತ್ತ ದಿಟ್ಟಿಸುತ್ತಿವೆ ಒತ್ತ(ಡ)ಕ್ಷರಗಳು  

ಪದ್ಯ ಬಿಡಿಸಿ ಹೇಳಲಾಗದು 
ಹಾಗೆಂದು ಕಟ್ಟಿ ಹಾಕಲೂ ಕೂಡದು 
ಕೆಟ್ಟು ಬರೆದವರೆಷ್ಟು ಮಂದಿಯೋ 
ಬರೆದು ಕೆಟ್ಟವರದೆಷ್ಟೋ .... 

ಕರೆಯುವ ಮುನ್ನ ಕೈ ಚಾಚಲೇ?

ಕರೆಯುವ ಮುನ್ನ ಕೈ ಚಾಚಲೇ?
ಕೊರಳಲಿ ಏಕೋ ರಗಳೆ
ಮರುಗುವ ಮುನ್ನ ಮಗುವಾಗಲೇ?
ತುಳುಕುವ ಕಣ್ಣು ಕಡಲೇ?
ಅರಿವೇ ಇರದೆ ಅರಸಿ ಬಂದಿರೋ
ಮುಗಿಲ ತಡೆದು ಕರಗು ಎನ್ನಲೇ?
ಮಳೆ ಹನಿ ಹನಿಯೊಂದಕೂ ನಡುಕವಿದೆ
ಎದೆ ಕಡಲಲಲೆಯೊಂದರ ಪರಿಚಯಕೆ
ಬಿರಿವ ಭಯವೇ ದೂರ ಬಯಸಿದೆ..   


ಇಲ್ಲಿ ಕಾಲವು ಗಡಿಯಾರದ ಗಡಿ ದಾಟಿದೆ
ಹೋರಾಡುತ ಇದ್ದ ಪ್ರಾಣ ಸಾಯುತ್ತಿದೆ
ತನ್ ಮೇಲೆಯೇ ತನಗಾಗಿ ತಾತ್ಸಾರಕೆ
ಈ ಸಂಜೆಯು ತಾನಾಗೇ ಮಂಕಾಗಿದೆ
ಈ ಗಾಯವಿನ್ನೂ ಹಸಿಯಾಗಿರಲು ನೀ ಮತ್ತೆ
ಇನ್ನೊಂದು ಗಾಯಕ್ಕೆ ಬಯಕೆ ಇಡುವೆ ಮನವೇ, ಸರಿಯೇ?

ಪದೆ ಪದೆ ಅದೇ ಕಥೆ ಅನಂತವಾಗಿ ಸಾಗಿದೆ
ತರಾತುರಿ ಎಲ್ಲ ಕನಸ್ಸಿನಂತೆ ಉಳಿದು ಬಿಟ್ಟಿದೆ
ಸಮೀಪವನ್ನು ದೂರದಿಂದ ಮೌನದಲ್ಲಿ ಧ್ಯಾನಿಸಿ
ನಿರೂಪಮಾನವಾದ ಲೋಕವೊಂದು ಕೂಗಿ ಕರೆದಿದೆ
ನಿರೀಕ್ಷೆಯೊಂದು ಶಿಕ್ಷೆಯಂತೆ ಕೊಲ್ಲುವಂಥ ವೇಳೆಗೆ
ಪರೀಕ್ಷೆಯಲ್ಲಿ ಕೂತರಲ್ಲಿ ಎಲ್ಲ ಪ್ರಶ್ನೆ ನೀನೇ ಆಗುವೆ ಏಕೆ ನೀ ಹೇಳು...?

ಹಾಡಿನ ಕೊಂಡಿ:
https://soundcloud.com/bharath-m-venkataswamy/faitfnzi4a6c

Friday 1 November 2019

ಕನ್ನಡ... ಕನ್ನಡ... ಕನ್ನಡ

ಶ್ವಾಸ ಶುಚಿಗೊಳಿಸೋ ಭಾಷೆ
ಶಾಸನ ಸಮೃದ್ಧ ಭಾಷೆ
ದ್ವೇಷವನೊಲ್ಲದ ಭಾಷೆ
ಕೋಶಕೆ ಕಲಶದ ಭಾಷೆ
ಕಾವ್ಯ ದಾಸ್ಯಕೊಲಿದ ಭಾಷೆ
ನಿತ್ಯ ನಿರಂತರಮ್ಯ ಭಾಷೆ
ಮೌನದಿ ಝೇಂಕಾರ ಭಾಷೆ
ಅಕ್ಷರಶಃ ಕ್ಷೌಧ್ರ ಭಾಷೆ ....


ಆ ನುಡಿ, ಈ ನುಡಿ
ಏನಾದರೂ ನುಡಿ
ಮುನ್ನುಡಿಯಾಗಿಸು ಕನ್ನಡವ
ಮತ-ಮತಗಳ
ಒಮ್ಮತ ಸೇತುವೆಯಿದು
ವಿಂಗಡಿಸದು ನಮ್ಸಂಗಡವ ...

Monday 28 October 2019

ಬೋಳಾಗುವ ಮುನ್ನ

ಬೋಳಾಗುವ ಮುನ್ನ ಓಕುಳಿ ಹಬ್ಬ
ಚೆದುರುವ ಬದುಕಿಗೆ ಚಿಗುರಿನ ಕನಸು
ಕಾಲ್ತುಳಿತವ ಲೆಕ್ಕಿಸದ ಹಣ್ಣೆಲೆಗಳ ಪಾಳಿ
ಶರದೃತು ವರವೋ, ಶಾಪವೋ? ಅಂತೂ
ಎಲ್ಲೆಲ್ಲೂ ಅಳಿವಿನಂಚಲಿ ಸಿಂಗಾರ ಪರ್ವ

ಕೋಗಿಲೆಗೆ ದೂರದ ಆಸ್ವಾದ
ಮಣ್ಣು ಮಾಗಿದ ಸಿರಿಯನುಂಡು ಸಂತೃಪ್ತ
ಗಾಳಿ ಕದಲಿಸೋ ಮುನ್ನ ಗೇಲಿ ಮಾಡಿದರೂ
ಒಲ್ಲೆನೆನ್ನದೆ ತಲೆದೂಗಿದ ಕೊಂಬೆ
ಪರಿವರ್ತನೆಗೆ ಸಲ್ಲಿಸುತಲಿತ್ತು ಪ್ರಾರ್ಥನೆ

ಅಂದು ನೆರಳನ್ನಿತ್ತು ಇಂದು ಬಡವಾಗಿ
ಆಸೆಗಳ ಬೇಡಿ ಕಳಚಿ ಬಿಡುಗಡೆಗೆ
ಬಾನೆತ್ತರ ಹಬ್ಬಿದ ಅಹಂಕಾರ ಕಮರಿ
ಬೆಳಕಿನೆದುರಲ್ಲೇ ಬೆತ್ತಲಾಗುವ ಸಮಯ
ನೆಲಕಪ್ಪಳಿಸಿದ ನೆರಳೂ ಸವಕಲು

ರಾಜ ತಾ ಮೆರೆದು ರಾಜನಾಗುಳಿದಿಲ್ಲ
ರಾಣಿಯ ಸೌಂದರ್ಯ ಕನ್ನಡಿಯೇ ಉಂಡಂತೆ
ಮುಪ್ಪಿಗೆ ಗೋರಿಯ ಕೊಂಡಾಡೋ ಸಮಯ
ಹುಟ್ಟಿಗೂ ಮುನ್ನ ಗರ್ಭ ಧರಿಸುವ ನೇಮ
ಅಳಿದ ಗುರುತುಗಳಲ್ಲಿ ನಾಳೆಗಳ ಎದೆ ಬಡಿತ...

Thursday 3 October 2019

ಪುಟವ ತೆರೆದಂತೆ ಹೊಸ ದಿನ

ಪುಟವ ತೆರೆದಂತೆ ಹೊಸ ದಿನ
ಪುನಃ ಮರುಕಳಿಸೋ ಪ್ರತಿ ಕ್ಷಣ
ನೆನ್ನೆ ನಾಳೆಯ ನಡುವೆ 
ತೆರೆದು ನಿಂತಿದೆ ಜಗವೇ 

ಬದುಕಿನ ಸಾರಾಂಶವೇ ನಗುವಲ್ಲಿದೆ
ಬಿಡುಗಡೆ ಸಿಗಲಾರದೆ ಬದುಕೆಲ್ಲಿದೆ..? (1)

ಹತ್ತಿರ ಕರೆದಾಗ ದೂರವೇ ಉಳಿವಂಥ
ಅಂಧಕಾರಕೆ ಬೆಳಕು ಕಾವಲಾಗಿದೆ
ಆಸೆಯ ಕಡಲಲ್ಲಿ ಮುಳುಗುವ ನೆರಳನ್ನು
ನಂಬಿದ ಅಲೆ ದಡಕೆ ನೂಕಿದಂತಿದೆ

ಕಾಡುವ ಆ ಪ್ರಶ್ನೆಯೇ ಉತ್ತರಿಸಿದೆ
ನಿನ್ನ ನೀ ಹುಡುಕಾಡಲು ಇಲ್ಲಿ ಸ್ಥಳವಿದೆ .. (2)

ಹಾರುವ ಹಂಬಲಕೆ ಕ್ಷಿತಿಜವೇ ಗುರಿಯಾಗಿ
ರೆಕ್ಕೆ ತಾಳುವ ವಯಸು ಇಂದು ನಮ್ಮದು 
ಎಲ್ಲಿಯೂ ತಲೆ ಬಾಗಿ ನಿಲ್ಲದ ಮನಸೊಂದು
ಜೊತೆಗೆ ಇದ್ದರೆ ಸೋಲು ಎದುರುಗೊಳ್ಳದು

ಜಾರುವ ಕಣ್ಣೀರಿದು ಸಾಹಿತ್ಯವೇ
ನೀರವ ಆವರಿಸಲು ಮಾಧುರ್ಯವೇ.. (3)

Friday 27 September 2019

ಬೇಡುವವರು ಮತ್ತು ಕೊಲ್ಲುವವರು

ಎರಡು ವರ್ಗದ ಜನರಿದ್ದಾರೆ
ಬೇಡುವವರು ಮತ್ತು ಕೊಲ್ಲುವವರು
ಜೇಬಲ್ಲಿ ಒಂದಷ್ಟು ನಾಣ್ಯಗಳ ತುಂಬಿಕೋ
ಬೇಡುವವರ ನೆರವಿಗೆ
ಕೊಲ್ಲುವವರ ಕರುಣೆಗೆ

ಬೇಡುವವರಿಗೆ ಬೆನ್ನು ಬಾಗಿ ನೀಡು
ಕೊಲ್ಲುವವರಿಗೆ ದೂರದಿಂದಲೇ ಬೀಸು
ಒಂದೋ ಹಸಿವ ನೀಗಿಸು
ಇಲ್ಲ ನೆತ್ತರು ಹರಿಸು

ಮುಂದೊಂದು ದಿನ
ಮತ್ತಾರಿಂದಲೋ ಎಸೆಯಲ್ಪಟ್ಟ ಬಿಲ್ಲೆ
ನಿನ್ನ ತಾಕಿ ರಕ್ತ ಚಿಮ್ಮಬಹುದು
ಆಗ ನೀನೂ ಕಟುಕನೆಂಬುದನರಿತು
ಶಾಂತಿ ಮಾರ್ಗ ಹುಡುಕು

ರಕ್ತ-ಸಿಕ್ತ ಬಿಲ್ಲೆಗಳು
ನಿನ್ನ ಭಿಕ್ಷಾ ಪಾತ್ರೆಯಲ್ಲಿ ಸದ್ದು ಮಾಡಬಹುದು
ಕೊಟ್ಟವರು ಅಷ್ಟಾಗಿ ಬಾಗಿಲ್ಲವಾದರೂ
ಕೊಟ್ಟರೆಂದಷ್ಟೇ ತೃಪ್ತಿ ಪಡು

ನಿನ್ನ ಹೊಟ್ಟೆ ತುಂಬಿದಾಗ
ಅನ್ಯರಿಗೆ ಕೈ ಚಾಚು
ಅಗೋ ಅಲ್ಲಿ ರಕ್ತದ ಮಡುವಿನಲ್ಲಿ
ಚೆಲ್ಲಾಡಿದ ಚಿಲ್ಲರೆಯನ್ನು ಮಣ್ಣಿನಿಂದ ಮುಚ್ಚು
ಗಾಯಗೊಂಡವರ ಎದೆಗೊರಗಿಸಿಕೋ...

Wednesday 25 September 2019

ಬಿಡುಗಡೆಯನ್ನು ಬಯಸಿ

ಬಿಡುಗಡೆಯನ್ನು ಬಯಸಿ
ಸೆರೆಯಾದವರೆಷ್ಟೋ ಜಗದಲ್ಲಿ
ಹುಸಿ ನಗೆಯನ್ನು ಸರಿಸಿ
ಕಣ್ಣೀರಿಡುತಿಹರು ಮರೆಯಲ್ಲಿ
ಉಪಾಯ ಗೊತ್ತಿಲ್ಲದೆ..
ಮುಖವಾಡ ಬೇಕಾಗಿದೆ.. (1)

ಎದುರು-ಬದುರಾಗಿ ಸಿಕ್ಕರೂ
ಗುರುತು ಹಿಡಿವಷ್ಟು ಇಲ್ಲ ಬಿಡುವು
ಅದಲು-ಬದಲಾಗಿ ಯೋಚನೆ
ಅಸಲಿ ಅಸ್ತಿತ್ವವೆಲ್ಲೋ ಕಳುವು
ಮುರಿದ ಕನ್ನಡಿಯ ಮನಸನು
ಕಳೆದುಕೊಂಡವರೇ ಎಲ್ಲ ಕಡೆಯೂ
ಮಾತು ತೊರೆದಷ್ಟೇ ಸುಲಭಕೆ
ನೂರು ಚೂರಾಯಿತಿಲ್ಲಿ ಒಲವು 

ಸಂಜೆ ವೇಳೆಗೆ ಉಸಿರು ಬಂದಂತೆ
ಇರುಳು ಮುಗಿಯುತ್ತ ಬೆಳಕು ಕಂಡಂತೆ
ಯಾವ ಹೊಸತೇನು ಕಾಣದಾಗ
ಜಾಡಿಸು ಎಲ್ಲವ, ಧರಿಸು ಮುಖವಾಡವ.. (2)

ಪುಟವ ತೆರೆದಂತೆ ಹೊಸ ದಿನ
ಪುಟಿದ ಚಿಗುರಂತೆ ಸಂಭ್ರಮದಲ್ಲಿ
ಮನಸಿನಿಂದ ಹೊರ ನಡೆಯುವ
ಮುನಿದ ಅಲೆಗೊಂದು ತೀರವಿರಲಿ
ಹೃದಯ ತಂಬೂರಿ ನಾದಕೆ
ಸತ್ತ ಸ್ವರವೊಂದು ಹುಟ್ಟಿ ಬರಲಿ
ಮೌನ ವ್ಯಾಕರಣವೆಲ್ಲವೂ
ಎದೆಯ ಹಾಡಾಗಿ ಹೊಮ್ಮಿ ಬಿಡಲಿ

ಏಳು ಬೀಳೆಲ್ಲ ಸಹಜವೇ ತಾನೇ
ಎಡವಿ ಬೀಳೋದೂ ಕಲಿತ ಪಾಠನೇ
ನೀನು ನೀನಾಗಿ ಬಾಳುವಾಗ
ಪ್ರಶ್ನಿಸು ಎಲ್ಲವ, ಕಳಚು ಮುಖವಾದವ... (3)

Friday 20 September 2019

ಹಾಡಾಗು, ಹಾಲ್ಗಡಲಾಗು

ಹಾಡಾಗು, ಹಾಲ್ಗಡಲಾಗು
ಮಳೆಯಾಗು, ಮಳೆಬಿಲ್ಲಾಗು
ಕಣ್ಣಾಗು, ಕಣ್ಮಣಿಯಾಗು
ನೆರಳಾಗು, ನೀ ಜೊತೆಯಾಗು
ಆಗುವುದಾದರೆ ದೇವರೇ ಆಗು ನನ್ನ ಪಾಲಿಗೆ
ಕಾತರದಲ್ಲೇ ತುಂಬಿಸು ನನ್ನ ಪ್ರೀತಿ ಜೋಳಿಗೆ     (1)

ಸಂಶಯವೊಂದು ಹೆಗಲೇರಿದರೆ
ಇರಿದೇ ಕೊಲ್ಲುವೆ ಕಣ್ಣಲ್ಲಿ
ಕಂಚಿನ ಕಂಠದಿ ಬೈಯ್ಯುವ ನಿನಗೆ
ನನ್ನ ಖುಷಿಯಲಿ ಪಾಲಿರಲಿ
ಕೊಡುವುದನ್ನೆಲ್ಲ ಇಂದೇ ಕೊಟ್ಟರೆ
ಖಾಲಿ ಆಗುವ ಭಯದಲ್ಲಿ
ಉಳಿಸಿಕೊಳ್ಳುವೆ ಚೂರು ಭಾವನೆ
ನಾಳೆ ಸಿಗುವ ನೆಪದಲ್ಲಿ

ಎಲ್ಲ ಚಿಂತೆಗೂ ಅಂಟಿಕೊಂಡು ಕೂರಬೇಡ
ತಂಟೆ ಇಲ್ಲದ ಪ್ರೀತಿ ಎಲ್ಲಿದೆ
ಎಲ್ಲ ಹುಡುಗರು ಒಂದೇ ಅಂತ ಹೇಳಬೇಡ
ಏನೂ ತೋಚದ ಜೀವ ಇಲ್ಲಿದೆ                (2)

ಹಗಲುಗನಸಲಿ ನನಗೂ ನಿನಗೂ
ನಿತ್ಯವೂ ನಡೆವುದು ಕಲ್ಯಾಣ
ಹೀಗೇ ಆದರೆ ಆಸೆಗಳೆಲ್ಲಕೂ
ಹೇಗೆ ಹಾಕಲಿ ಕಡಿವಾಣ 
ಹುರಿದುಂಬಿಸುವ ಬೆಳದಿಂಗಳಲಿ 
ಹೂ-ದುಂಬಿಗಳೇ ಆಗೋಣ
ಮೆಲ್ಲುಸಿರಿಂದ ಮೂಡೋ ಇಂಪಿಗೆ
ಸೇರಿಸು ನಿನ್ನ ಸಾಲನ್ನ 

ಲೆಕ್ಕ ಮೀರುವ ನನ್ನ ಹುಚ್ಚಾಟಗಳನು
ನಿನ್ನ ಲೆಕ್ಕಕೆ ಚುಕ್ತಾ ಮಾಡಿಕೋ
ಇಷ್ಟು ಹೇಳಲು ನನ್ನ ಮಾತನ್ನು ತಡೆದು
ಒಂದೋ ಎರಡೋ ಮುತ್ತ ನೀಡಿಕೋ..    (3)

Sunday 15 September 2019

ಇನ್ನೂ ಒಂದಿಷ್ಟು ಹೊತ್ತು

ಇನ್ನೂ ಒಂದಿಷ್ಟು ಹೊತ್ತು 
ನೀ ನನ್ನ ಜೊತೆಗಿರಬೇಕು
ಎಲ್ಲ ಬಾಕಿ ಉಳಿದ ಮಾತು
ಹೇಳಿ ಬಿಡಬೇಕು
ಬಿಡುಗಡೆ ಮುನ್ನ ಕೊಡಬೇಕೊಂದು ಮುತ್ತು
ಸೆರೆಯಾದಾಗ ನೀನೇ ನನ್ನ ಸ್ವತ್ತು
ಈ ಹೊತ್ತು ಎಲ್ಲ ಹೊಸತು
ಹೀಗೇ ಇರಲಿ ಯಾವತ್ತೂ...

ಎಷ್ಟು ಕಾಲ ಕೂಡಿದಂತೆ ಕಳೆಯಬೇಕು
ಇಷ್ಟೇ ಬದುಕು ಎಲ್ಲ ಕ್ಷಣವೂ ಬದುಕಬೇಕು
ಒಂದು ಹೆಜ್ಜೆ ನೀನು ಇಟ್ಟು
ಹೋಗ ಬೇಡ ನನ್ನ ಬಿಟ್ಟು
ಸಾಗುವುದಾದರೆ ಜೊತೆಗೇ ಸಾಗೋಣ
ಸಾಯುವುದಾದರೂ ಜೊತೆಗೇ ಸಾಯೋಣ
ನನ್ನ ಪ್ರಾಣ ನೀನೇ ತಾನೆ
ಕಣ್ಣು ನೀನು ರೆಪ್ಪ ನಾನೇ..

ChuTukas

ಕದಡದೆ ಎಲ್ಲಿಯ ಕಲೆ?
ಬಣ್ಣ ಕದಡಿದೆಡೆ ಚಿತ್ರ
ಕಲ್ಲು ಕದಡಿದೆಡೆ ಶಿಲೆ
ಗಾಳಿ ಕದಡಿದರೆ ನಾದ
ಶಾಯಿ ಕದಡಿದರೆ ಕಾವ್ಯ!!

****

ಎಲೆ ಮರೆಯ ಕಾಯೆಂದು ನೀವೇಕೆ ಮರುಗುವಿರಿ?
ಮಾಗುವ ಕಾಲಕ್ಕೆ ನೀವಷ್ಟೇ ಮರಕೆ
ಕಿತ್ತು ತಿಂದವರೆಲ್ಲಿ ಕಷ್ಟಕ್ಕೆ ಬಂದಾರು?
ಮುಪ್ಪಾದ ಎಲೆಯೊಡನೆ ಎರಗಿ ಬುಡಕೆ..

ಜನ್ಮ ನೀಡಿದಮ್ಮ

ಜನ್ಮ ನೀಡಿದಮ್ಮ ನಿನದೂ
ಜನ್ಮ ದಿನವು ಈ ದಿನ
ನಾನು ನಿನಗೆ, ನೀನು ನನಗೆ
ಶುಭ ಕೋರಲೀ ಸುದಿನ
ಮೂರು ದಶಕ ದಾಟಿ ಬೆಳೆದೆ
ನಿನ್ನ ಮೀರಿ ಅಳತೆಲಿ
ಆಗಸವ ಮುಟ್ಟೋ ಕರುಣೆ
ಅದ ಹೇಗೆ ತಲುಪಲಿ
ನಾನೂ ನೀನೂ ಒಂದೇ 
ಹಂಚಿಕೊಂಡು ಕರುಳ ಪ್ರೀತಿಯ
ಇಷ್ಟು ದೂರ ಬಂದೆ ಹಿಡಿದು
ಬೆಳಗಿ ಕೊಟ್ಟ ಪ್ರಣತಿಯ
ನಿನ್ನ ಮಡಿಲು ಹೊಂಗೆ ನೆರಳು
ಮಿಡಿವ ತಂತಿ ನೋವಿಗೆ
ನೀನು ಇರಲು ನಗುತ ಹೀಗೆ
ಸ್ವರ್ಗ ನಮ್ಮ ಪಾಲಿಗೆ!

ಕಂಡು ಕೇಳರಿಯದಂಥ ಒಂದು ವಿಷಯ

ಕಂಡು ಕೇಳರಿಯದಂಥ ಒಂದು ವಿಷಯ ಹೇಳಲೇ
ನೊಂದು ಬೆಂದುಹೋದಂಥ ನನ್ನ ಕಥೆಯ ಕೇಳೆಲೇ
ರೆಕ್ಕೆ ಬಂದಂತೆ ಕಾಗದ ಹಾರಿ ಹೋಗಿದೆ
ಪದ್ಯ ಗೀಚಿದ್ದು ತೋಚದೆ ಹೋಯಿತೇ
ಹುಚ್ಚು ಕವಿದಂತೆ ಮನಸಿಗೆ ಎಲ್ಲೆ ಮೀರಿದೆ
ಹಚ್ಚಿಕೊಂಡಿದ್ದೇ ಕಾರಣ ಆಯಿತೇ

ಆರಂಭವೇ ಕೊನೆಯಾದರೆ ಹೇಗೆ ಹೇಳು
ನೀನಿಲ್ಲದೆ ನರಳುತ್ತಿದೆ ನನ್ನ ಬಾಳು...


ಹಚ್ಚಿ ಇಟ್ಟ ದೀಪದಲ್ಲಿ ಬೆಳೆಕೇ ಇಲ್ಲ
ಮುಚ್ಚು ಮರೆಯ ಆಟದಲ್ಲಿ ಹಿತವೇ ಇಲ್ಲ
ಮತ್ತೆ ಮತ್ತೆ ಪತ್ತೆ ಹಚ್ಚಿ ಬಂದಂತಿದೆ
ಮುಳ್ಳಿನಂತೆ ಕಾಡೋ ನೋವು ಸಾಯೋದಿಲ್ಲ
ಕೆನ್ನೆ ಕೊಟ್ಟೆ ಈಗ
ಮುತ್ತು ನೀಡೋ ಬದಲು
ಪೆಟ್ಟು ಕೊಟ್ಟು ಹೋಗು ಮಾತನಾಡದೆ..

ಕಣ್ಣೀರಿಗೆ ಕೈಚಾಚುತ ಧೈರ್ಯ ಹೇಳು
ನಿನ್ನಾಸರೆ ಬೇಕಂತಿದೆ ನನ್ನ ಬಾಳು..

ಬೆಂಕಿಗೆ ದೂಡಬಹುದಿತ್ತು, ಸುಮ್ಮನಿದ್ದಿರಿ

ಬೆಂಕಿಗೆ ದೂಡಬಹುದಿತ್ತು, ಸುಮ್ಮನಿದ್ದಿರಿ
ಮುಳ್ಳು ಚುಚ್ಚಬಹುದಿತ್ತು, ಸುಮ್ಮನಾದಿರಿ
ಬಿದ್ದಾಗ ಕೈ ಹಿಡಿದಿಲ್ಲವಾದರೂ, ಬೀಳಿಸದಿದ್ದಿರಿ
ನಿಮ್ಮವನಲ್ಲನೆನ್ನಬಹುದಿತ್ತು, ಜೊತೆಗೊಂಡಿರಿ

ಧೂಳಿನಂತಾದರೂ ಇರಿಸಿಕೊಂಡಿರಿ ಒದರದೆ
ಹೂವಿನಷ್ಟೇ ಹಗುರಾಗಿ ಎರಗಿ ಎದೆಗೆ
ಬೇಲಿ ಕಟ್ಟಿ, ದೂರವಿಡದೆ ತುತ್ತು ಹಂಚುವಲ್ಲಿ
ನಿಮ್ಮ ಹಾದಿಯತ್ತ ನನ್ನ ನೆರಳ ನಡಿಗೆ

ಇಷ್ಟ ಪಟ್ಟಿರಿ ತುಂಟ-ತರಲೆಗಳ
ಕಷ್ಟ ಕಲ್ಲುರುಳಿಸುವಲಿ ಬೆವರಾದಿರಿ
ಒಂಟಿಯೆನಿಸುವಲ್ಲಿ ಆಗಂತುಕರಾಗಿ
ದಾರಿಯುದ್ದಕೂ ಎದುರುಗೊಂಡು ಮಿಡಿದಿರಿ

ನಾನಿಲ್ಲದ ಹೊತ್ತಲ್ಲಿ ಹುಡುಕಾಡಿದಿರಲ್ಲದೆ
ಇದ್ದಾಗ ಪ್ರಮುಖನೆನದೆ ಸಾಮಾನ್ಯನ ಮಾಡಿದಿರಿ
ಪಲ್ಲಕ್ಕಿಯ ಮೇಲಿಟ್ಟು ಮೆರೆಸುವ ಭ್ರಮೆಯಾಚೆ
ಪಂಜರಗಳ ಮುರಿಯುವ ಸಾಧ್ಯತೆಗಳ ತೆರೆದಿರಿ

ವಕ್ರತೆಯೂ ಕಲೆಯೆಂದು
ವಿಕೃತಿಯೂ ಕೃತಿಯೆಂದು
ಅವಸಾನವೂ ಪ್ರಕೃತಿಯ ರೂಪವೆಂದು
ಬೆರಗು ಬೇರೆಲ್ಲೂ ಇಲ್ಲ
ಬೆಳಗುವುದೇ ಅದರ ಮೂಲ
ಹಚ್ಚಿದಿರಿ ದೀಪವೊಂದ ಮನದಿ ಅಪ್ಪಿಕೊಂಡು

ತಾವರೆಗೊಳದ ಬೇರಿನ ಪರಿಚಯ ನಮ್ಮದು
ಆಗಾಗ ಮಿಂಚಿದೆವು ಪತ್ರೆ ಮೇಲೆ ಹೊರಳಿ
ನನ್ನ ಹೆಸರಿನೊಡನೆ ಕೂಡಿದ ನೆನಪು ಮೂಡುವಾಗ
ತುಟಿ ಅರಳಿಸುವ ಸಣ್ಣ ತುಣುಕು ಇಣುಕಿ ಬರಲಿ..

"ಬೆನ್ನಿಗೆ ಮುಖ ಭಾವದ ಕೊರತೆ"

"ಬೆನ್ನಿಗೆ ಮುಖ ಭಾವದ ಕೊರತೆ"
ನೋವಿನ ಗುಟ್ಟು ಅಡಗಿಸಿಟ್ಟು
ತಲೆ ತಗ್ಗಿಸಿ ನಡೆವಾಗ ಎದೆ ಉಬ್ಬಿರಲಾರದು.
ಗೂನಿದ ಭುಜದಡಿ ವಿಸ್ತಾರ ಬೆನ್ನು
ಮಾತನಾಡುತ್ತಲೇ ಮಾತನಾಡಿಸುತ್ತೆ
ಮುಖವಾಡಗಳಿಗದು ಅರ್ಥವಾಗುವುದಿಲ್ಲ
ಬಿನ್ನು ಕೊಟ್ಟು ನಡೆದೆ ಎಂದು ಜರಿವರು

ಹರಕಲು ತೊಟ್ಟರೂ ಬೇಡೆನ್ನದು
ಕನ್ನಡಿಯೆಡೆಗೆ ಬೆನ್ನು ಮಾಡುವಾಗ
ತಲೆ ಹೊರಳಿಸಿ ನೋಡುತ್ತೇನೆ
ಬಿದ್ದ ಮಡತೆ ಹರಕಲನ್ನು ಮರೆಸಿ
ಆಗಿನ್ನೂ ಮೂರು ಸಂವ್ತ್ಸರದ ಹಿಂದೆ
ದೀಪಾವಳಿಗೆ ಕೊಂಡ ಅಂಗಿಯಂತಿರದೆ
ನೆನಪಿನ ಚಿತ್ತಾರ ಹೊತ್ತು ಹೊಸತಾಗೇ ಇತ್ತು

ಹಾಸಿಗೆಗೆ ಆಸೆಗಳ, ಕನಸುಗಳನುಣಿಸಿ
ಬೆಚ್ಚಿ, ಬೆವರಿ, ಕಂಪಿಸಿದ ತೊಗಲಿಗೆ
ಎಂದೂ ಕೈಯ್ಯಾರೆ ಕಲ್ಲು ಕೊಟ್ಟು ತಿಕ್ಕಲಾಗಲಿಲ್ಲ.
ಒರಗಿದ ಗೋಡೆಗೆ ಗುರುತಿಟ್ಟು
ನೆರಳಿನ ಮೇಲೂ ಕಣ್ಣಿಟ್ಟು
ಬಾಯಾರಿದಾಗಲೂ ಬಾಯಿ ತೆರೆಯದಿತ್ತು ಬೆನ್ನು

ಬಳೆ ಸದ್ದು ಉದ್ದಗಲಕ್ಕೂ ಸವರಿ
ಹಸ್ತಕ್ಕೆ ತಾಕಿ ಒರಟುತನ
ಎದೆಗಂಟಿದ ಮೆದು ಮಾಂಸ ಜ್ವಾಲೆ
ಬೆವರ ಹನಿಯನು ಹಡೆದು
ಇಂಗಿದ ಇಂಗಿತಕೆ ಪರಚು ಗಾಯ
ಮಂಗ ಬುದ್ಧಿಯ ಕೈಗೆ ಮಾಣಿಕ್ಯ ಸಿಕ್ಕಂತೆ

ನೊಂದ ಬೆನ್ನಿಗೂ, ಬೆನ್ನ ನೋವಿಗೂ ಅಂತರವಿದೆ
ಗುಣ ಪಡಿಸುವ ವಿಧಾನಗಳೂ ಬಿನ್ನ
ನನ್ನ ಬೆನ್ನಿಗೆ ಕಣ್ಣು, ಕಿವಿ, ಬಾಯಿಲ್ಲ
ಆದರೂ ಆಲಿಸುವುದು, ಗ್ರಹಿಸುವುದು, ಉಲಿವುದು.
ನಾನು ನನ್ನ ಬೆನ್ನ ಆಪ್ತ ಗೆಳೆಯ
ನಾ ಅವನ, ಮತ್ತವ ನನ್ನ ಹೊತ್ತಿರುವ..

ಆದಷ್ಟೂ ಬೇಗ ಹಾಡೊಂದು ಬರಲಿ

ಆದಷ್ಟೂ ಬೇಗ ಹಾಡೊಂದು ಬರಲಿ
ಕಟ್ಟಿದ ಮಹಲುಗಳ ಕೆಡವಿಕೊಂಡು
ಹಿಂದೆಯೇ ಮೌನವೂ ಆವರಿಸಿ ಬಿಡಲಿ
ನನ್ನದೆಂಬುದು ಏನೂ ಇಲ್ಲವೆಂದು

ಎಷ್ಟಕ್ಕೆ ಕೊಂಡೆ ನನ್ನನ್ನು?

ಎಷ್ಟಕ್ಕೆ ಕೊಂಡೆ ನನ್ನನ್ನು?
ಇಷ್ಟಕ್ಕೆ ಕೊಲ್ಲು ನೀನಿನ್ನೂ
ನಿನ್ನಷ್ಟು ಮುದ್ದು ಯಾರಿಲ್ಲ
ಮುತ್ತಲ್ಲೇ ಮಾತು ಕೊಡಲೇನು?

ಇನ್ನಾರು ಜನ್ಮ ಸಾಲಲ್ಲ
ನೀನಿರದೆ ಶಬ್ಧ ಹೊರಡೊಲ್ಲ
ನಿತ್ರಾಣದಲ್ಲೂ ಈ ಪ್ರಾಣ
ನಿನ್ನೆಸರ ಧ್ಯಾನ ಬಿಟ್ಟಿಲ್ಲ

ಗುಟ್ಟಾದೆ ಎದೆಯ ಗೂಡಲ್ಲಿ
ಗುರಿಯಿಟ್ಟೆ ಮೌನ ಶರದಲ್ಲಿ
ಜೋಪಾನ ಮಾಡಿ ಎತ್ತಿಟ್ಟು
ಬಿಚ್ಚಿಟ್ಟೆ ನೆನಪ ಮರೆತಲ್ಲಿ

ಬರಿಗೈಯ್ಯ ಹಿಡಿದು ನಡೆವಾಗ
ನೆರಳೂ ನಕ್ಕಿತ್ತು ಆಗಾಗ
ಮೈಲಿಗಲ್ಲನ್ನು ನೆಡಲಿಲ್ಲ
ಬೇಲಿ ಕಟ್ಟೋದು ಯಾಕೀಗ?

ಸಣ್ಣ ಮಳೆಯೊಂದು ತಡವಾಗಿ
ನಮ್ಮ ಮಿಲನಕ್ಕೆ ಸರಿಯಾಗಿ
ಇಳಿದು ಬಂದೀತು ಬಾ ಬೇಗ
ಒಪ್ಪಿ ಬಿಗಿದಪ್ಪು ತಲೆಬಾಗಿ...

ಒಂಟಿ ಮನೆಯಲ್ಲಿ ದೀಪವಿದ್ದೂ

ಒಂಟಿ ಮನೆಯಲ್ಲಿ ದೀಪವಿದ್ದೂ
ಹಚ್ಚುವ ಮನಸಿರದೆ ಕತ್ತಲೆಲ್ಲೆಲ್ಲೂ
ನೀನು ಹಚ್ಚಿಟ್ಟ ಕಿಚ್ಚೊಂದೇ ಒಳಗೆ
ಹಾಡು ಕಲಿಸಿತ್ತು ಗೋಳಿನಲ್ಲೂ

ಗೊಂಬೆ ಜೋಡಿಸಿ ಉರುಳಿಸಿ ಬಿಟ್ಟೆ
ಲಜ್ಜೆಗೆಟ್ಟವು ನಗುತಾವೆ ನೋಡಿ
ಗಾಜಿನೊಳಗಿಟ್ಟೆ ಜೋಪಾನವಾಗಿ
ಮೂಖ ಹೃದಯಕ್ಕೆ ಮುಳ್ಳೊಂದೇ ಜೋಡಿ

ಮಸಿಯ ಗೋಡೆದು ಮತ್ತೇನೋ ಗೋಳು
ಹುಸಿಯನಾಡೋದೇ ಬದುಕಾಗಿ ಅದಕೆ
ಸುಟ್ಟು ಹೋದಂಥ ಹಾಳೆಯ ಬಯಸಿ
ಗಾಯಗೊಂಡಂತಿತ್ತು ಗೀಚುಹೊತ್ತಿಗೆ

ಮಡಿಕೆಯ ತಳ ಸೋರಿ ಒಲೆಗಿಲ್ಲ ಬಾಳು
ಪೊರಕೆಗೆ ಪೊರೆ ಕಟ್ಟಿ ಹೊಡೆದಷ್ಟೂ ಧೂಳು
ವಾರ ಸಂತೆಯಲಿಟ್ಟು ಮಾರಿಕೊಂಡಂತೆ
ಕನಸುಗಳು ಕಣ್ಣನ್ನೇ ಕರಗಿಸಿವೆ ನೋಡು

ಆದಿಗಂಟಿದ ಗಂಧ ಈಗಿಲ್ಲವೇಕೆ?
ಆಗಾಗ ಬರುತಿದ್ದೆ ಹೀಗಾದೆಯೇಕೆ?
ಕನ್ನಡಿಯ ಎದುರಿಟ್ಟು ಹೋದದ್ದು ನೀನು
ನನ್ನೊಡನೆ ಅಷ್ಟೇ ನಾ ಮಾತಾಡಬೇಕೆ?

ಕೊನೆಗೊಂದು ಮಾತೆಂದು ಕಣ ತುಂಬಿ ಬಂದೆ
ಒಂದಷ್ಟು ಸುಳ್ಳನ್ನು ಬೇಕೆಂದೇ ಕೊಂದೆ
ಇದ್ದಷ್ಟೂ ಕೊಟ್ಟರೆ ಇನ್ನಷ್ಟು ಕೊಡಬಹುದು
ಇಂದಿಗಿಷ್ಟೇ ಪ್ರಾಣವ ಕೊಡಲು ತಂದೆ...

ಆ ದಡದ ಅಲೆಯೊಂದು

ಆ ದಡದ ಅಲೆಯೊಂದು
ಈ ದಡಕೆ ಬಡಿದು
ಏನನ್ನೋ ಪ್ರಸ್ತಾಪಿಸಿದಂತಿದೆ
ಈ ದಡವು ಸುಮ್ಮನೆ
ತನ್ನೆಲ್ಲ ಗುರುತುಗಳ
ಉತ್ತರದ ರೂಪದಲಿ ಕೊಟ್ಟಾಗಿದೆ

ಆ ದಡದಲೊಬ್ಬಳು
ಈ ದಡದಲೊಬ್ಬ
ಹೀಗೆ ನಡೆಸಿರಲು ಸಂಭಾಷಣೆ
ಮೇಲೊಬ್ಬ ಚಂದಿರ
ನೂರು ಚೂರುಗಳಾಗಿ
ಕಡಲೊಡಲು ಚೆದುರಿರಲು ಆಕರ್ಶಣೆ

ಹಿಮ್ಮುಖದ ಅಲೆಗಳನು
ಮುಮ್ಮುಖದವುಗಳು
ಮುದ್ದಾಡಿ ಅಲ್ಲೇನೋ ರೋಮಾಂಚನ
ಸಣ್ಣ ಗುಳ್ಳೆಗಳಂತೂ
ಮೂಡಿ ಸಿಡಿಯುವ ವೇಳೆ
ತಿಳಿಗಾಳಿಗೊಲಿದಂತೆ ವಾತ್ಸ್ಯಾಯನ

ಸಾಲುಗಟ್ಟಿದ ಆಸೆ
ಉಸಿರುಗಟ್ಟಿಸಿ ಮುಂದೆ
ಯಾವ ಸಂಚಿಗೆ ಹೊಂಚು ಹಾಕುತಿಹುದು?
ಅತ್ತ ಅವಳೆದೆಯುಬ್ಬಿ
ಇತ್ತ ಇವ ತಬ್ಬಿಬ್ಬು
ನಡುವೆ ಕಡಲ ದೂರ ಎಂಥ ಘೋರ!

ಒಂದು ಮುಳ್ಳಿಗೆ ಸಿಲುಕಿ
ಒಂದು ಮಲ್ಲಿಗೆ ದಳವು
ಇನ್ನೂ ಹಂಚಿದ ಘಮಲು ಪ್ರೇಮವೇನು?
ವಿರಹಿಗಳು ಹೀಗೆಲ್ಲ
ಕಾವ್ಯ ಪ್ರವೃತ್ತರಾಗಿ
ಮಿಡಿದರೆ ಹೃದಯಕ್ಕೆ ತೃಪ್ತಿಯೇನು...?

ಗಾಜಿನ ಮೇಲೆ ಜಾರಿವೆ ಹನಿಗಳು

ಗಾಜಿನ ಮೇಲೆ ಜಾರಿವೆ ಹನಿಗಳು
ಬಿಟ್ಟೂ ಬಿಡದೆ ಗುರುತುಗಳ
ಬಿಡಿಸಿಕೊಂಡ ನೆನಪಿನ ಚಿತ್ರವು
ನಡೆಸಿದೆ ಮಳೆಯೊಡನೊಣ ಜಗಳ

ಬೆರಳು ಕೊಡದು ಅಂಚೆ ವಿಳಾಸ
ಕರಗುವ ರೇಖೆಗೆ ಅಪ್ಪಣೆಯ
ಕುರುಡು ಆಸೆಗೆ ಇಲ್ಲದ ಕಣ್ಣು
ಎದುರು ನೋಡಿದೆ ಕತ್ತಲೆಯ

ನೀಲಿ ನೆನಪಿನ ಖಾಲಿ ಆಗಸ
ಒದ್ದೆ ಕೆನ್ನೆಯ ಭೂ ಚೆಹರೆ
ಸಾಕು ಮಾಡದೆ ತೊಟ್ಟಿಕ್ಕುತಿಹೆ
ಸಂಚಿ ತುಳುಕಿಸಿ ತಂಬೆಲರೆ

ತಡವಾದೀತು ಬುತ್ತಿ ಕಟ್ಟುವ
ಚಂದಿರ ಹಸಿವನು ಸಹಿಸೊಲ್ಲ
ಹಿತ್ತಲ ಹಟ್ಟಿಯ ಇಣುಕಿ ಆಗಿದೆ
ನಮ್ಮ ಕೋಣೆಗೂ ಬರಬಲ್ಲ

ನಿನ್ನ ನೆರಿಗೆಯ ಲೆಕ್ಕ ತಪ್ಪಿದೆ
ಅಚ್ಚರಿ ಪಡುತ ಎಣಿಸಿಬಿಡು
ಬಿಂದಿ ಅಂಟಿದ ಕನ್ನಡಿ ಸಾಕ್ಷಿಗೆ
ಒಪ್ಪುವ ಸುಳ್ಳನು ಬರೆದು ಕೊಡು

ಕಿಟಕಿ ಗಾಜಿನ ಮೋಜಿನ ಮಂಜು
ಒಡಲಾಯಿತು ನಮ್ಮನಿಸಿಕೆಗೆ
ಮಳೆಗೂ ಈಗಲೇ ಮನಸಾದಂತೆ
ಬೇಡಿದೆ ಹೊಸತು ಬರವಣಿಗೆ...

- ರತ್ನಸುತ

ಮೊದಲ ಮಳೆ ಈಗಷ್ಟೇ ಶುರುವಾಗಿದೆ

ಮೊದಲ ಮಳೆ ಈಗಷ್ಟೇ ಶುರುವಾಗಿದೆ
ತಯಾರಿಗೂ ಮೊದಲೇ ಹಸಿಯಾಗಿಸಿ
ಮೊದಲ ಹೂ ಚಿಗುರೊಡೆವ ಮುಂಸೂಚನೆ
ಬಳ್ಳಿ ಹೂಂಗುಟ್ಟಿತು ತಲೆಬಾಗಿಸಿ

ಬತ್ತಿದ್ದ ತೊರೆಯಲ್ಲಿ ಹಾಡು ಹರಿದಂತೆ
ನೋಡು-ನೋಡುತ್ತಲೇ ಎಲ್ಲೆಡೆ ಹಸಿರು
ಹನಿಯ ಹಾದಿಲಿ ಬೆಳಕು ಎದುರಾಗಿ
ಬಾನೀಗ ರಂಗೇರಿದ ಬಿಲ್ಲ ತವರು

ಜಾರು ನೆಲ, ಸೋರುವ ಉಪ್ಪರಿಗೆ ಹಂಗು
ಹೂತ ಬೇರಿಗೆ ಈಗ ನೂರು ಕಣ್ಣು
ಬೇಲಿಯನು ದಿಕ್ಕರಿಸಿ ಕೊಚ್ಚಿ ಹೋಯಿತು
ತಾನು ಯಾರಿಗೂ ಸ್ಥಿರವಲ್ಲವೆಂದ ಮಣ್ಣು

ನಿಂತ ಮಳೆ, ನಿಂತ ಹೊಳೆ, ನಾನೂ ನಿಂತಲ್ಲೇ
ಇನ್ನೆಲ್ಲೋ ಇನ್ನೇನೋ ಹೊಸ ಚೇತನ
ಮರದೆಲೆಯು ಕಾಯ್ದಿಟ್ಟ ಹನಿ ಜಾರಿ ತಾಕಲು
ಮನದರಸಿ ಉಲಿದಷ್ಟೇ ರೋಮಾಂಚನ

ಮತ್ತೆ ಮಳೆ ಮುತ್ತ ಸೆಳೆ ಮತ್ತು ಹೊಳೆ
ಜೀವಂತವಾಗಿಸಲು ನಿರ್ಜೀವವ
ಚಿತ್ತವಿದು ಉನ್ಮತ್ತಗೊಳ್ಳದಿರಲಾರದು
ಭಾವುಕತೆ ಮೀರಿದೆ ನಿರ್ಭಾವವ...

ದಣಿವಾರಿ ಕೊಳದಲಿ

ದಣಿವಾರಿ ಕೊಳದಲಿ  ಕೆಂದಾವರೆ ಅರಳಿದೆ  ಮುಗಿಲೇರಿ ಬರದಲಿ  ಹನಿಗೂಡಲು ಇಳಿದಿದೆ  ರವಿಕಾಂತಿ ಸವಿಯುತ  ಹರಳಂತೆ ಮಿನುಗುತಾ  ಬೆರಗಲ್ಲೇ ತಯಾರಿಯಾಗುತಿದೆ  ಮನದಂಗಳ ಮುಂಜಾನೆಯ...