ಹೊಸತನ

ಹೊಸ ಪೊರಕೆಗೆ ಮನೆಯೆಲ್ಲ ಹೂವು 

ಹೊಸ ಎಕ್ಕಡ ಕಾಲ ಕಚ್ಚಿದವು 

ಹೊಸ ಮಡಿಕೆಯ ನೀರು ನೀರಸ 

ಹೊಸ ಒಲೆಗೆ ಸೌದೆ ಪಾಯಸ 

ಹೊಸ ಪಾತ್ರೆಯೂ ತಳ ಹಿಡಿಯಿತು 

ಹೊಸ ಮನೆಯಲೂ ಕಸ ಹೊಕ್ಕಿತು 

ಹೊಸ ಅಕ್ಕಿ ಮುದ್ದೆ ಕಟ್ಟಿತು 

ಕೆಂಪು ರಾಗಿ ಗಂಟು ಬಿಗಿಯಿತು

ಹೊಸ ಬಣ್ಣ ಬಳಿದ ಗೋಡೆಗೆ 

ಹಳೆ ಕನ್ನಡಿ ಜೋತುಕೊಂಡಿತು 

ಹೊಸ ಜೋಡಿಗೆ ಮರದ ಬಾಗಿಲು 

ಹಳೆ ಸೇರು ಹೊಸ್ತಿಲಾಯಿತು  

ಹೊಸ ಬೆಳಕು ಛಾಯೆ ಮೂಡಲು 

ಹೊಸ ಋಜುವು ಕನಸ ಕಾಣಲು 

ಹೊಸ ನಾಳೆಗೆ ಅದೇ ಕಣ್ಣು 

ಹೊಸತನವನು ಪಸರೋ ಮಣ್ಣು 

ಹಳೆ ಕಿಸೆಯಲಿ ಹೊಸ ಕಾಸು 

ಹಳೆ ಕಾಸಿಗೆ ಹೊಸ ಅಂಗಿ 

ಹಳೆ ಪದ್ಯಕೆ ಹೊಸ ರಾಗ 

ಹಳೆ ಹಕ್ಕಿಗೆ ಹೊಸ ಚಿಗುರು 

ದಾರಿ ತಿರುವಲಿ ಹೊಸ ಪರಿಚಯ 
ಹೊಸ ಒಲವು ಪ್ರತಿ ಸಲವೂ 
ಕೈ ತುತ್ತಿಗೆ ರುಚಿ ಇಮ್ಮಡಿ 
ಹುಸಿ ತೇಗು, ಹೊಸ ಹಸಿವು 

ಕಸಿಗೊಂಡರೆ ಹೊಸ ಮೊಗ್ಗು 
ಪಕಳೆ ಕೆನ್ನೆಗೆ ಹೊಸ ಸಿಗ್ಗು 
ಮುತ್ತು ಹಳೆಯದು ಮತ್ತು ಹೊಸತು 
ನಲ್ಮೆ ಬಾಳ್ಮೆಗೆ ಒಲಿದ ಸ್ವತ್ತು 
ಮಮತೆ, ಕರುಣೆ ಒಲುಮೆ ರೂಪ 
ನುರಿತ ಸಮಯಕೆ ನಾಳೆ ಹೊಸತು....