ಗಾಜಿನ ಮೇಲೆ ಜಾರಿವೆ ಹನಿಗಳು

ಗಾಜಿನ ಮೇಲೆ ಜಾರಿವೆ ಹನಿಗಳು
ಬಿಟ್ಟೂ ಬಿಡದೆ ಗುರುತುಗಳ
ಬಿಡಿಸಿಕೊಂಡ ನೆನಪಿನ ಚಿತ್ರವು
ನಡೆಸಿದೆ ಮಳೆಯೊಡನೊಣ ಜಗಳ

ಬೆರಳು ಕೊಡದು ಅಂಚೆ ವಿಳಾಸ
ಕರಗುವ ರೇಖೆಗೆ ಅಪ್ಪಣೆಯ
ಕುರುಡು ಆಸೆಗೆ ಇಲ್ಲದ ಕಣ್ಣು
ಎದುರು ನೋಡಿದೆ ಕತ್ತಲೆಯ

ನೀಲಿ ನೆನಪಿನ ಖಾಲಿ ಆಗಸ
ಒದ್ದೆ ಕೆನ್ನೆಯ ಭೂ ಚೆಹರೆ
ಸಾಕು ಮಾಡದೆ ತೊಟ್ಟಿಕ್ಕುತಿಹೆ
ಸಂಚಿ ತುಳುಕಿಸಿ ತಂಬೆಲರೆ

ತಡವಾದೀತು ಬುತ್ತಿ ಕಟ್ಟುವ
ಚಂದಿರ ಹಸಿವನು ಸಹಿಸೊಲ್ಲ
ಹಿತ್ತಲ ಹಟ್ಟಿಯ ಇಣುಕಿ ಆಗಿದೆ
ನಮ್ಮ ಕೋಣೆಗೂ ಬರಬಲ್ಲ

ನಿನ್ನ ನೆರಿಗೆಯ ಲೆಕ್ಕ ತಪ್ಪಿದೆ
ಅಚ್ಚರಿ ಪಡುತ ಎಣಿಸಿಬಿಡು
ಬಿಂದಿ ಅಂಟಿದ ಕನ್ನಡಿ ಸಾಕ್ಷಿಗೆ
ಒಪ್ಪುವ ಸುಳ್ಳನು ಬರೆದು ಕೊಡು

ಕಿಟಕಿ ಗಾಜಿನ ಮೋಜಿನ ಮಂಜು
ಒಡಲಾಯಿತು ನಮ್ಮನಿಸಿಕೆಗೆ
ಮಳೆಗೂ ಈಗಲೇ ಮನಸಾದಂತೆ
ಬೇಡಿದೆ ಹೊಸತು ಬರವಣಿಗೆ...

- ರತ್ನಸುತ