ಕತೆಯೊಂದ ಹೇಳುವೆ ಎದೆಗೊರಗು

ಕತೆಯೊಂದ ಹೇಳುವೆ ಎದೆಗೊರಗು
ಮಾತಿಗೆ ಕಾಯದಿರು ಕಿವಿಗೊಡು ಉಸಿರಿಗೆ
ಬಿಡಿಸಿ ಹೇಳುವುದು ಸಮಯಕನುಸಾರ
ಭಾವಕನುಸಾರ, ಮೋಹಕನುಸಾರ

ಭಯ ಹುಟ್ಟಿಸುವುದು ಹಾಗೆ
ಹಿಂದೆಯೇ ನೇವರಿಸುವ ಕತೆಯೊಂದು
ಅಳು ತರಿಸುವುದು ಸಹಜವಾಗಿ
ಜೊತೆಗೆ ಸಾಂತ್ವನದ ಜೋಳಿಗೆ ಹಿಡಿದು


ಎಷ್ಟೋ ಕೊನೆಗಳು ಕೊನರುವವು
ನಾವಾಗೇ ಮುಟ್ಟಿದರೆ ತಾನೆ ಕೊನೆ
ಯಾವ ಕತೆಗೂ ನೀ ಕೊಡಲೊಲ್ಲೆ ಹೆಸರ
ಉಸಿರಲ್ಲೇ ಹೇಳು ನಿನ್ನದಾವುದು?


ತೂಕಡಿಕೆ ತರಿಸಿದ ಜೋಗುಳದ ಕತೆಯ
ಕದ್ದು ನಿನ್ನ ನೆನಪ ಸಂಚಿಗಿಳಿಸಿಕೊಂಡೆ
ಉನ್ಮಾದ ಲೇಪಿಸಿದ ತುಂಟ ಕತೆಯೊದಕ್ಕೆ
ಎದೆ ಪರಚಿ ಗಾಯವನೇ ಮಾಡಿಬಿಟ್ಟೆ


ಹೀಗೇ ಒಂದಾದಮೇಲೊಂದು ಉರುಳುರುಳಿ
ಹಗಲುಗಳು ಓಡಿ, ಇರುಳುಗಳು ಕೂಡಿ
ದೀಪ ಬೆಳಗಿಕೊಂಡು ಸಾಲು ಸಂಚಿಕೆಗಳು
ಮುಗಿಯಿತೆನ್ನುವ ಹೊತ್ತಿಗೆ ಏನೂ ನೆನಪಿಲ್ಲ


ನೆನಪಿರುವುದಿಷ್ಟೇ
ನಾ ನಿನಗೆ ಒಲಿದಿದ್ದು
ನೀ ನನಗೆ ಒರಗಿದ್ದು
ಮತ್ತು ನಾವೊಂದು ಸುಂದರ ಕತೆಯಾಗಿದ್ದು...