ನಿದ್ದೆಗೆ ಜಾರಲು
ಸದ್ದು ಮಾಡದೆ ಬರುವೆ
ಕದ್ದು ಹೋಗಲು ನಿನ್ನ ಕನಸುಗಳನು
ಕಣ್ಣ ಗುಡ್ಡೆಯ ಮೇಲೆ
ಹೊದ್ದ ರೆಪ್ಪೆಗೆ ಒಮ್ಮೆ
ಸಣ್ಣ ಮುತ್ತನು ಕೊಟ್ಟು ಹಿಗ್ಗುತಿಹೆನು
ಎಚ್ಚರವಾಗಿಸದೆ
ವಿಷಯವ ಮುಟ್ಟಿಸುವೆ
ಉತ್ತರಿಸು ನಿನ್ನೊಳಗೆ ನಿನಗೆ ನೀನೇ
ಮತ್ತಿರದ ರಾತ್ರಿಯಲಿ
ಮದಿರೆ ನೆನಪುಗಳನ್ನು
ಹೊತ್ತು ತರುವೆನು ಸ್ಮರಿಸು ಆಗ ನನ್ನೇ
ಗಹನವಾಗಿಸದಂತೆ
ಅತಿ ಸರಳ ಮಾರ್ಗದಲಿ
ತುಸು ದೂರ ಕ್ರಮಿಸುವ ಕನವರಿಸುತ
ಚಂದಿರನ ಕೈಚಾಚು
ದೂರದಲಿ ನಿಲ್ಲಿಸಿ
ತೃಪ್ತಿಗೊಳ್ಳುವವರೆಗೆ ಅನುಭವಿಸುತ
ಸದ್ದು ಗದ್ದಲ ನಡುವೆ
ಕಳುವಾಗದಿರಲೆಂದು
ಪಿಸು ಮಾತುಗಳನೆಲ್ಲ ಬಚ್ಚಿ ಇಡುವೆ
ಹಸಿವೆಂದು ನೊಂದರೆ
ಬೆಟ್ಟವೇರಿ ಒಂಟಿ
ಮರದ ಎಲೆಮರೆ ಹಣ್ಣ ಕಿತ್ತು ತರುವೆ
ಬೆಳಕು ಮೂಡುತಲಿದೆ
ಎಲ್ಲ ಕಟ್ಟಿಟ್ಟು ಬುಟ್ಟಿಗೆ
ತುಂಬಿ ಹೊತ್ತು ಹೋಗುವೆ ಇಂದಿಗೆ
ಕಣ್ಣರಳಿಸಿ ನೋಡು
ಕನ್ನಡಿಯ ಬಿಂಬವು
ತನ್ನ ತಾ ನೋಡಿ ನಾಚಿತು ಮೆಲ್ಲಗೆ
No comments:
Post a Comment