Wednesday, 23 December 2020

ಎಲ್ಲ ಅರಿತವರೆದುರು ಏನೂ ಅರಿಯದವ

ಎಲ್ಲ ಅರಿತವರೆದುರು ಏನೂ ಅರಿಯದವ 

ಕೂಡಿ ಬೆರೆತವರೊಳಗೆ ದೂರವೇ ಉಳಿದವ 
ಯಾರೂ ಕೂಗದ ಹೆಸರ ತನಗಿಟ್ಟುಕೊಂಡವ 
ಯಾವ ಸಂತೆಯ ಗದ್ದಲವನೂ ಲೆಕ್ಕಿಸದವ 

ಯಾವ ರಂಗಿಗೂ ತಾನು ಅಂಟಿಕೊಳ್ಳಲೊಲ್ಲದವ 
ಮೌನವೂ ಸಂಗೀತವೆಂದು ತಲೆದೂಗಿದವ 
ಅವರಿವರ ಮಾತಿಗೆ ಕಿವಿಗೊಡದ ಇವ 
ತನ್ನ ತಾನರಿಯದವನೆಂದು ತಾನೇ ಹೇಳುವವ 

ಭವ-ಬಂಧನದ ಎಲ್ಲ ಭಾವ ಅಭಾವ 
ಪರಿಣಮಿಸದಂತುಳಿವುದಿವನ ಸ್ವಭಾವ 
ಹಗ್ಗಕ್ಕೂ ಹಾವಿಗೂ ಗಂಟು ಬೆಸೆಯುವವ 
ಮೋಹಕ್ಕೂ ಮುಕ್ತಿಗೂ ಅಂತರ ತಿಳಿದವ 

ಎಲ್ಲ ಅಂಕಿಯ ದಾಟಿ ಶೂನ್ಯ ಹುಡುಕಿದವ 
ಎಲ್ಲ ಅಂಕೆಯ ಮೀರಿ ತಳದಲ್ಲೇ ಉಳಿದವ 
ಸ್ಥಿತಿಯಲ್ಲೂ ಇವನ ಕಣ್ಣಿಗೆ ಎಲ್ಲ ಉತ್ಸವ 
ಮೆರೆಸುವವರೊಳಗೆ ನೆಲೆಸುವುದು ಅಸಂಭವ 

No comments:

Post a Comment

ದೂರದಲ್ಲಿ ಯಾರೋ ನನ್ನ ಕೂಗಿದಂತಿದೆ

ದೂರದಲ್ಲಿ ಯಾರೋ ನನ್ನ ಕೂಗಿದಂತಿದೆ  ಹತ್ತಿರದಲ್ಲಿ ಬಂದು ಕೂತುಕೊಂಡ ಹಾಗಿದೆ  ಯಾವ ಮಾತಿಲ್ಲದೆ, ಮೌನವೇ ಸಾಗಿದೆ  ಹೋಗಿ ಬಂದು ನಿಲ್ಲಲಿಲ್ಲ  ಎಚ್ಚರಿಸಿ ಕೇಳಲಿಲ್ಲ ನನ್ನಂತ...