ಕಲಾವಿದ ನಿರ್ಲಕ್ಷಕ್ಕೊಳಗಾದಷ್ಟೂ ಪ್ರಬಲನಾಗುತ್ತಿದ್ದಾನೆ

ಇವನಿಗೆ ಮಂಜು ಪರದೆಯ ಮೇಲೆ

ಚಿತ್ರ ಬಿಡಿಸುವುದೆಂದರೆ ಪಂಚ ಪ್ರಾಣ

ತಾನು ಎಳೆದ ಗೀಟು ಎಲ್ಲೂ ಕೂಡದೆ 

ತನ್ನಷ್ಟಕ್ಕೆ ತಾನು ಇದ್ದು ಬಿಡಬಹುದು 

ಅಥವ ಒಂದನೊಂದು ಕೂಡಿ 

ಪೂರ್ಣಾಕೃತಿ ಪಡೆದುಕೊಳ್ಳಬಹುದು 

ಯಾರೂ ಇವನ ಕಲಾವಂತಿಕೆಯ ಮೆಚ್ಚಿ 

ಅಥವ ತೆಗಳಿ ಮಾತನಾಡುವವರಿಲ್ಲ 

ಇವನಲ್ಲಿ ಮೂಡುವ ಭಾವಕ್ಕೆ ತಕ್ಕಂತೆ 

ಓರೆಕೋರೆಗಳು ಬಾಗಿ ಬೀಗುತ್ತವೆ 

ಮತ್ತು ಅವವುಗಳೊಳಗೇ ಸುಪ್ತವಾಗುತ್ತವೆ 

ಮೂಡಿದಷ್ಟೇ ಅವಸರದಲ್ಲಿ ನೇಪಥ್ಯಕ್ಕೆ ಸರಿದು 

ಇವನಲ್ಲಿ ಪ್ರದರ್ಶನಕ್ಕೂ ಸರಕಿಲ್ಲ 

ಆ ಕ್ಷಣ, ಆ ಗಳಿಗೆಗೆ ತಕ್ಕಂತೆ ಬಿಡಿಸಬಲ್ಲ;

ನೀರ ಮೇಲೋ, ಗಾಳಿಯಲ್ಲೋ 

ಕ್ಷಿತಿಜವನ್ನು ಎಳೆತಂದು ಇಬ್ಬನಿಗೆ 

ಮಳೆಬಿಲ್ಲನ್ನು ಒಲೆಯ ಮಸಿಗೆ ಸೇರಿಸುವ

ನಿರೂಪಮಾನ ಕಲೆ ಇವನದು 

ಯಾರೋ ಕದ್ದಿರಬಹುದಾದ ಗುಮಾನಿ 

ಅಥವ ಎರವಲು ಪಡೆದ ಸಬೂಬು

ಯಾವುದೂ ಇವನನ್ನು ಬಾಧಿಸುವುದಿಲ್ಲ;

ಬಿಡಿಸಿದ ಒಗಟನ್ನು ಮತ್ತೆ ಇವನೇ 

ಗೋಜಲಾಗಿಸಿಕೊಂಡು ಬಿಡಿಸಿ ಕೂರಬಹುದು  

ಅಥವ ಏನೂ ಅರಿಯದವನಂತೆ 

ನಿರ್ಲಿಪ್ತನಾಗಿ ಉಳಿದುಬಿಡಬಹುದು 

ಘೋಷ, ಜೈಕಾರಗಳು ಕೇಳುವುದಿಲ್ಲ 

ಪಾರಿತೋಷಕ, ಬಿರುದು ಕಾಣುವುದಿಲ್ಲ 

ಬೆರಳಂಚಲಿ ಬಣ್ಣದ ಕಲೆಯೂ 

ಕಣ್ಣಂಚಲಿ ಸಾರ್ಥಕತೆಯೂ ಗೋಚರಿಸುವುದಿಲ್ಲ;

ಒಳಗೇನೋ ಮಾರ್ಮಿಕ ತುಡಿತ 

ಸದಾ ಎಚ್ಚರಿಸಿದಂತೆ ತೊಳಲಾಡುತ್ತಾನೆ 

ಮೇಲ್ನೋಟಕ್ಕೆ ಶಾಂತ ರೂಪಿಯಾಗಿ 

ಯಾರಲ್ಲೂ ಹೇಳಿಕೊಳ್ಳಲಾಗದ ನೋವು

ಎಲ್ಲರಲ್ಲೂ ಹಂಚಿಕೊಳ್ಳಬಲ್ಲ ಖುಷಿ

ಎಲ್ಲವನ್ನೂ ಏಕ ಸ್ವರೂಪದಲ್ಲಿ 

ಅರ್ಥಾತ್ ನಿರ್ಭಾವುಕವಾಗಿ ವ್ಯಕ್ತಪಡಿಸುವ 

ಖಾಲಿತನದ ಅನಾವರಣ ಪ್ರತಿ ಸಲವೂ;

ಇದು ಕಲೆ ಎಂದವರಿಗೆ ಕಲೆ, ಇಲ್ಲವೆಂದವರಿಗೆ ಇಲ್ಲ 

ಕಲಾವಿದ ನಿರ್ಲಕ್ಷಕ್ಕೊಳಗಾದಷ್ಟೂ ಪ್ರಬಲನಾಗುತ್ತಿದ್ದಾನೆ...