ನೆನಪಾದಾಗ ಹುಡುಕಾಡುವೆ ನಿನ್ನ

ನೆನಪಾದಾಗ ಹುಡುಕಾಡುವೆ ನಿನ್ನ

ನನ್ನ ಕಣ್ಣಿನ ಬಿಂಬದಲಿ (೨)

ಬಿಡುವಾದಾಗ ಹೊಸೆದ ಹಾಡು

ಕೇವಲ ನಿನ್ನ ಗುಂಗಿನಲಿ

ನೆನಪಾದಾಗ ಹುಡುಕಾಡುವೆ ನಿನ್ನ

ನನ್ನ ಕಣ್ಣಿನ ಬಿಂಬದಲಿ

ಯಾವ ದಾರಿ ಹಿಡಿದು ಬರಲಿ

ನಿನ್ನ ಮನೆಯ ತಲುಪುವೆ

ಎನೋ ಬರೆಯ ಹೊರಟು ನಿನ್ನ

ಹೆಸರಿನಲ್ಲೇ ಮುಗಿಸುವೆ

ತಾರೆ ನಡುವೆ ಗೆರೆಯ ಎಳೆದು

ರಾತ್ರಿಯೆಲ್ಲ ಕಾಯುವೆ

ತೇಲಿ ಬಂದ ಶಶಿಯ ಮೊಗದಿ

ನಿನ್ನ ರೂಪ ಕಾಣುವೆ

ಬದುಕ  ನೀನೇ ರೂಪಿಸಿರುವೆ-

ಎಂದು ಅನಿಸಿ ಅರಳುವೆ 

ನಿನ್ನ ಅಗಲಿಕೆಯನು ತಂದ 

ಊಹೆಯಲ್ಲೂ ನರಳುವೆ 

ಪ್ರೇಮವೆಂದರೇನು ಎಂದು 

ನೀನೇ ಕಲಿಸ ಬಂದೆಯಾ?

ಬಿರುಕು ಮೂಡಿದಂಥ ತುಟಿಗೆ 

ಮಂದಹಾಸ ತಂದೆಯಾ?

ಹಗಲು ರಾತ್ರಿ ಬೆಸೆಯುತಿರುವೆ 

ಪ್ರೇಮದೋಲೆ ಬರೆಯಲು 

ಮೊದಲ ಪದವೇ ಇಷ್ಟು ಮಧುರ 

ತುಂಬಿ ಬಂತು ಕಂಗಳು 

ನನ್ನ ಒಲವ ಚಿಗುರು ಬಳ್ಳಿ 

ನಿನ್ನ ಹಬ್ಬುವಂತಿದೆ 

ಏನೂ ಬೇಡ ನಿನ್ನ ಉಸಿರು 

ಸೋಕಿ ಹಿಗ್ಗಿತೆನ್ನೆದೆ....