ಬನ್ನಿರೆಲ್ಲ ಕೂಡುವ

"ನನ್ನ ಕೈ ಖಾಲಿ
ಇದನ್ನ ನೋಡಿ ನಗಬೇಡಿ
ನಾನೇನನ್ನೂ ನನ್ನದಾಗಿಸಿಕೊಂಡಿಲ್ಲ
ನನ್ನನ್ನೂ ಸಹಿತ ದಾನ ಮಾಡಿದ್ದೇನೆ
ಅದಕ್ಕಾಗಿಯೇ ನಾನು ಹೀಗೆ
ಫಕೀರನಂತೆ ಹರಕಲು ಬಟ್ಟೆಯಲ್ಲಿ
ಬೀದಿ-ಬೀದಿ ಸುತ್ತುತ್ತಿದ್ದೇನೆ
ಏನಾದರೂ ಗಳಿಸಿ ಹಂಚಿಬಿಡಲು;

ಅನಿವಾರ್ಯವಾದರೆ ದೋಚಲೂ ಸಿದ್ಧ
ಭದ್ರವಾಗಿ ಕೂಡಿಟ್ಟ ಕಜಾನೆಗೆ
ಯಾವ ದಿಗ್ಬಂಧನ ಹಾಕಿದರೂ
ಮುರಿಯುವ ನಿಸ್ವಾರ್ಥ ಅಸ್ತ್ರ ನನ್ನಲ್ಲಿದೆ!!

ಹುಟ್ಟಿದಾಗ ಬೆತ್ತಲಾಗಿದ್ದುದಕೆ
ಬೇಸರ ಮಾಡಿಕೊಂಡವರಾರು ಹೇಳಿ?
ಮತ್ತೆ ಎಲ್ಲರೂ ಮರಳುವ ಬನ್ನಿ
ಆ ಪ್ರಸವ ಬೇನೆ ದಾಟಿ ನೆಲೆಸಿದ
ಆ ಕ್ಷಣದ ಊರಿಗೆ

ನಂತರ ತೊಡಿಸಿದ ಬಳೆ, ಓಲೆ
ಕಾಲ್ಗೆಜ್ಜೆ, ಮೂಗುತ್ತಿ, ಬೆಳ್ಳಿ ಉಡದಾರ
ಎಲ್ಲವನ್ನೂ ಕಿತ್ತು
ಇಲ್ಲದವರ ಹೊಟ್ಟೆ ತುಂಬೋಣ
ಸಮಾನರಾಗೋಣ ಹಸಿವಲ್ಲಾದರೂ
ಕಣ್ಣೀರ ಜೊತೆಗೊಂದು ಬೆರಳ ನೀಡಿ"

ಬನ್ನಿ ಆ ಫಕೀರನಂತೆ
ಹೆಸರು, ಗುರುತು, ಪರಿಚಯವಿಲ್ಲದಂತೆ
ಎಲ್ಲರಲ್ಲೂ ಸಾತ್ವಿಕ ರೂಪಿಗಳಾಗೋಣ;
ನಾನೆಂಬುದು ಒಂದೇ ಆಗಲಿ
ಅದು ನಿಮಿತ್ತವಾಗಲಿ
ಅಲ್ಲಿಯವರೆಗೂ ಸವೆಯೋಣ!!

-- ರತ್ನಸುತ