Wednesday, 5 June 2013

ಒಬ್ಬ ನಾ - ಮತ್ತೊಬ್ಬ ನೀ

ಒಬ್ಬರ ಹನಿಗಳು
ಮತ್ತೊಬ್ಬರಿಗೆ ಕೇವಲ
ಒಬ್ಬರ ಹನಿಗವನ
ಮತ್ತೊಬ್ಬರಿಗೆ ನೀಳ
ಅಳತೆ ಮಾಡಿ ನೋಡಿದರೆ
ಎಲ್ಲವೂ ಎಲ್ಲರಂತೆಯೇ
ಒಂದೇ ಬಿಂಬದ ಕನ್ನಡಿ
ಹತ್ತು ಹಲವು ಮೂಲ

ಒಬ್ಬರ ಮೌನ
ಮತ್ತೊಬ್ಬರಿಗೆ ಶಾಪ
ಒಬ್ಬರ ಹಸಿವು
ಮತ್ತೊಬ್ಬರ ಪರಿತಾಪ
ಒಂದೇ ಮುಖ ಮುದ್ರೆಯೊಳಗೆ
ನೂರೆಂಟು ಮುಖವಾಡ
ದೇವರೂ ಚತುರನೇ ಸರಿ
ತಾಳಿದನು ಹಲವು ರೂಪ

ಒಬ್ಬರ ಅಭಿಲಾಷೆಗಳು
ಮತ್ತೊಬ್ಬರಿಗೆ ಅತಿರೇಖ
ಒಬ್ಬರ ಮನದಾಸೆಗಳು
ಮತ್ತೊಬ್ಬರಿಗೆ ನರಕ
ಒಂದೇ ಸೂಜಿಯ ಅಂಚನು
ಹಿಂಬಾಲಿಸಿದ ನೂಲಿಗೆ
ಹೊಲಿಗೆ ಹೊರಗೆ, ಒಳಗೆ
ಕಂಡೂ ಕಾಣದಿರುವ ತವಕ

ಒಬ್ಬರ ಒತ್ತು
ಮತ್ತೊಬ್ಬರ ಉದ್ಧಾರ
ಒಬ್ಬರ ಸ್ವತ್ತು
ಮತ್ತೊಬ್ಬರ ಅಧಿಕಾರ
ಬಂದೇ ಬರುವುದು ಕಾಲ
ಕಾದು ಕೂರುವುದು ಕೇಡು
ಬಿಗಿದ ಕೈಗಳೊಡನೆ ಪಡೆವ
ಆತ್ಮಬಲ ಅಪಾರ

ಒಬ್ಬರ ಹಾಡು
ಮತ್ತೊಬ್ಬರ ರೋಮಾಂಚನ
ಒಬ್ಬರ ಗೂಡು
ಮತ್ತೊಬ್ಬರ ಆಮಂತ್ರಣ
ಒಬ್ಬ ಮತ್ತೊಬ್ಬನೊಡನೆ
ಒಬ್ಬನಾಗಲೇ ಬೇಕು
ಕೂಡಿ ಬಿಡಿಸಿದಾಗ ವರ್ಣಮಯ
ಬಾಳ ಚಿತ್ರಣ .........

                         
                          --ರತ್ನಸುತ





at

2 comments:

  1. Badarinath Palavalli5 June 2013 at 19:23

    ಬದುಕಿನ ವೈಪರೀತ್ಯಗಳು ಚೆನ್ನಾಗಿ ಒಡಮೂಡಿದೆ, ಇಡೀ ಕವನದಲ್ಲಿ...

    ನಿಮ್ಮ ಮಾತು ಸರಿ,
    "ಒಬ್ಬರ ಸೊತ್ತು
    ಮತ್ತೊಬ್ಬರ ಅಧಿಕಾರ"

    ReplyDelete
    Replies
    1. Bharath M Venkataswamy6 June 2013 at 07:41

      ಧನ್ಯವಾದಗಳು ಬದರಿ ಸರ್ :)

      Delete

Subscribe to: Post Comments (Atom)

ಹೃದಯವ ನೀಡಲೇ

ಹೃದಯವ ನೀಡಲೇ ಹೇಳದ ಮಾತಿವೆ ನೂರಾರು ಆಲಿಸು ಈಗಲೇ ಪಾಲಿಸಿ ನಿನ್ನಯ ನೆರಳನು ಹೃದಯವ ನೀಡಲೇ ಹೊಂಗನಸ ಅಂಗಳದಿ ಅರಳಿರುವ ಚಂದಿರ ನೀ  ಯಾರಿರದ ತೀರದಲಿ ಅಲೆಗಳಲೂ ನಿನ್ನ ದನಿ  ...

  • ಮೋಸಗಾರನ ಮೋಸದ ಕವನ!!
    ನಿದ್ದೆಯಿಂದ ಎದ್ದ ನಾನು  ಬಿಸಿ ಲೋಟ ಕಾಫಿ ಕಂಡು  ಬಾಯಿ ತೊಳೆಯದೇ ಕುಡಿದೆ  ಅಲ್ಲಿಗೆ ಹಲ್ಲಿಗೆ ಮೋಸ  ಜಳಕದ ಇರಾದೆ ಇರದೆ  ಬೊಗಸೆ ನೀರ ಮುಖಕೆ ಚೆಲ್ಲಿ  ಮೆತ್ತ...
  • ದೂರದಲ್ಲಿ ಯಾರೋ ನನ್ನ ಕೂಗಿದಂತಿದೆ
    ದೂರದಲ್ಲಿ ಯಾರೋ ನನ್ನ ಕೂಗಿದಂತಿದೆ  ಹತ್ತಿರದಲ್ಲಿ ಬಂದು ಕೂತುಕೊಂಡ ಹಾಗಿದೆ  ಯಾವ ಮಾತಿಲ್ಲದೆ, ಮೌನವೇ ಸಾಗಿದೆ  ಹೋಗಿ ಬಂದು ನಿಲ್ಲಲಿಲ್ಲ  ಎಚ್ಚರಿಸಿ ಕೇಳಲಿಲ್ಲ ನನ್ನಂತ...
  • ಬರುವೆ ನಿನಗಾಗಿ
    ಬರುವೆ ನಿನಗಾಗಿ  ಇರುವೆ ಜೊತೆಯಾಗಿ  ಪ್ರತಿ ಗಳಿಗೆ ಬೇಕಿದೆ ನಿನ್ನಾಸರೇ  ನೀನದೇ ಈ ಹಾಡು  ಹಿಡಿದು ಹೊಸ ಜಾಡು  ನಾ ಹಾಡುವೆನು ಕೂಡಿ ಬಾ ನೀ ಆದರೆ  ಬೆರೆತ ಮನದಲ್ಲಿ  ಪುಟಿ...