ಗಝಲ್ (ಅವರಂತಾಗಬೇಕೆಂದು ಕೆಲ ಫೋಟೋಗಳನ್ನು ನೇತು ಹಾಕಿದ್ದೇನೆ)

ಅವರಂತಾಗಬೇಕೆಂದು ಕೆಲ ಫೋಟೋಗಳನ್ನು ನೇತು ಹಾಕಿದ್ದೇನೆ

ಇವರಂತಾಗಬಾರದೆಂದು ಕೆಲ ಫೋಟೋಗಳನ್ನು ನೇತು ಹಾಕಿದ್ದೇನೆ

ತಂಗಾಳಿ ಶೀತಲತೆ ಹೆಚ್ಚಿಸಿ ಎಲ್ಲ ನಡುಗಿ ಸಾಯುವಾಗ

ಹೊಲ ಕಾಯುವ ಬೆರ್ಚಪ್ಪನಿಗೆ ನನ್ನ ಮದುವೆ ಕೋಟು ಹಾಕಿದ್ದೇನೆ

ಇರುವೆಗಳು ನನ್ನ ಮನೆಯ ಉಪ್ಪು ತಿಂದು ಸಕ್ಕರೆ ಕದಿಯುತ್ತಿವೆ

ಹೊಸಕಿ ಹಾಕುವ ಬದಲು ವಿಷದ ಗೀಟು ಹಾಕಿದ್ದೇನೆ

ಮರದ ಟೊಂಗೆಗೆ ಕಾಲು ಕಟ್ಟಿ, ತಲೆ ಕೆಳಗೆ ಮಾಡಿ

ಎಟುಕದಾಸೆಗಳ ಉಸಿರಿಗೆ ಮೆಣಸಿನ ಘಾಟು ಹಾಕಿದ್ದೇನೆ

ಹಠವನ್ನೇ ರೂಢಿ ಮಾಡಿಕೊಂಡು ಕೊಬ್ಬಿದ ಕನ್ನಡಿಗೆ

ಅಚ್ಚು ಉಳಿಯುವ ಹಾಗೆ ನಾಲ್ಕು ಏಟು ಹಾಕಿದ್ದೇನೆ

ಬಾಗಿಲಲ್ಲಿ ಹೆಸರು, ಬಿರುದು, ಶಾಲು-ಸನ್ಮಾನಗಳ

ಸಂಕೇತಗಳನ್ನೆಲ್ಲ ವಿನಮ್ರವಾಗಿ ಕಿತ್ತು ಹಾಕಿದ್ದೇನೆ

ನೆನಪಾಗಿ ಕಾಡುವ ಕ್ಷಣಗಳ, ಗಡಿಯಾರದ ಮುಳ್ಳಿಂದ ಚುಚ್ಚಿ

ಕೊಂದು ಸಂಚಿಗಳಲ್ಲಿ ತುಂಬಿ ಗಂಟು ಹಾಕಿದ್ದೇನೆ