ನಿನ್ನ ಕಣ್ಣೊಳಗೆ ಎಡವಿ ಬಿದ್ದು ಉಸಿರು ಕಟ್ಟುತಿದೆ ನೋಡು
ಹೃದಯ ಭಾಗದಲಿ ಗಾಯವೊಂದು ಹೆಪ್ಪುಗಟ್ಟುತಿದೆ ನೋಡು
ನಿನ್ನ ತುಟಿ ಪರಮಾದ್ಭುತ ಮಧುವ ಹೀರಿದ ಬೆನ್ನಲ್ಲೇ
ನನ್ನ ತುಟಿಯ ಬೆರೆತುಕೊಳ್ಳಲು ಹೇಗೆ ತೊದಲುತಿದೆ ನೋಡು
ಮ್ಮೂರುಗಳ ಮಧ್ಯೆ ಕಟ್ಟಿದ ಸೇತುವೆ ಶಿಥಿಲಗೊಳ್ಳುತ್ತಿದೆ
ಎರಡೂ ಅಂಚಲಿ ಗುರುತಿಗೊಂದು ಬೇಲಿ ಹಬ್ಬುತಿದೆ ನೋಡು
ಬರೆದ ಪತ್ರಗಳನ್ನು ದೋಣಿ ಮಾಡಿ ತೇಲಿ ಬಿಟ್ಟಿರುವೆ
ನಿನ್ನ ಮನೆಯಂಗಳವ ದಾಟಿ ಮುಂದೆ ಸಾಗುತಿವೆ ನೋಡು
ಮಾತು ಹುಟ್ಟುವ ಜಾಗದಲ್ಲಿ ಮೌನಕ್ಕೆ ಸಮಾಧಿ ಕಟ್ಟಿದ್ದೆವು
ಉತ್ಖನನ ಮಾಡಿದಲ್ಲಿ ಅತೃಪ್ತ ಆತ್ಮವೊಂದು ಅರಚುತಿದೆ ನೋಡು
ಬೇರು ಸಹಿತ ಕಿತ್ತೆಸೆದರೂ ಕನಸೊಂದು ಬಣ್ಣದ ಅಂಗಿ ತೊಟ್ಟಿದೆ
ಈತನಕ ಬಳಸಿಕೊಂಡಿದ್ದಕ್ಕೆ ಪ್ರತಿಯಾಗಿ ರಸೀದಿ ಕೇಳುತಿದೆ ನೋಡು
ನೋಟದ ನಡುವೆ ಗುಲಾಬಿ ತೋಟದ ವಿಶಾಲ ಬಯಲು
ಅಷ್ಟೂ ಗಿಡಗಳು ಹೂವಿಲ್ಲದೆ ಬಣಗುಡುತ ಹೇಗೆ ಕಾಣುತಿವೆ ನೋಡು!
No comments:
Post a Comment