ಎಲ್ಲೆ ಮೀರುವ ಪುಳಕ ನೀ ಎದುರು ಬಂದರೆ
ಮಲ್ಲೆ ಮಾಲೆಯೊಡನೆ ಕಾಯುವೆ ನೀ ಮರಳಿ ಬಂದರೆ
ಕತ್ತಲು ಮೂಡುವವರೆಗೆ ಕಾಯಲಾರೆ ಮಗ್ನನಾಗಲು
ಇದ್ದಲ್ಲಿಯೇ ನಿರತನಾಗುವೆ ಕಾಡುವ ಕನಸೊಂದು ಬಂದರೆ
ಮರಳ ಗೂಡನ್ನು ಕಟ್ಟುವೆನು ಕೈಯ್ಯಾರೆ ಕೆಡವುತ್ತಲೇ
ಅರಮನೆಯೊಂದ ಕಟ್ಟಲೂ ಬಹುದು ಕರೆಯೊಂದು ಬಂದರೆ
ದುಗುಡಕ್ಕೂ ದುಪ್ಪಟ್ಟು ಖುಷಿ ಮಾರುವ ಸಂತೆಯಲಿ
ಹರಿಬಿಡುವೆ ತಡೆಯದಂತೆ ಕಣ್ತುಂಬಿ ಬಂದರೆ
ಮರಣವದು ಎಲ್ಲೋ ಅಡಗಿಹುದು ಹೇಡಿಯಂತೆ
ಬದುಕಿ ಬಿಡುವೆ ಈ ಮಧ್ಯೆ ಬದುಕು ಎದುರು ಬಂದರೆ..
No comments:
Post a Comment