ಕಣ್ಣ ಹೊರಗಿನ ಕನಸುಗಳು

ಗುರುತಿನ ಚೀಟಿ ಮರೆತು ಬಂದ
ರಾತ್ರಿ ಪಾಳಿ ಕನಸುಗಳಿಗೆ
ಕಣ್ಣು ನಿಷೇಧ ಹೇರಿತ್ತು;
ಎಲ್ಲವೂ ಬಾಗಿಲಲ್ಲೇ ಕುಳಿತು
ಅಲ್ಲೇ ತುಸು ತೂಕಡಿಸಿ
ಸ್ಥಿತಿ ಪ್ರಜ್ಞೆ ಮರೆತು, ಮೈ ಹರಡಿಕೊಂಡು
ಕಣ್ಸುತ್ತಾಗಿ ಕಾಡುತ್ತಿವೆ!!

ರಾತ್ರಿಯೆಲ್ಲ ಬಿಡದ ಮಳೆ
ಇಳೆಯನ್ನೆಲ್ಲ ತಬ್ಬಿ ಹಸಿಯಾಗಿಸಿದರೂ
ದಣಿದ ನಾಲೆಗೆಗೆ ಎಲ್ಲವೂ ಅಪ್ರಸ್ತುತ;
ಕನಸಲ್ಲಿ ಮಾತಾಡಿಕೊಂಡದ್ದೆಲ್ಲ
ಕತ್ತಲಲ್ಲಿ ಲೀನವಾಗಿ ಹೋದದ್ದು
ಮಳೆ ನೀರು ಕೋಡಿಯಾಗಿ ಕೊಚ್ಚಿಹೋದದ್ದು
ಗೌಪ್ಯ ಸ್ಥಳಕ್ಕೆ!!

ಮಂಪರುಗಣ್ಣ ತೆರೆದಾಗ
ಕನಸಿನ ಆ ಕೊನೆಯ ಚಿತ್ರಣ
ಕಣ್ಮುಂದೆ ಅರಳಿ, ಉದುರಿ ಬೀಳುತ್ತೆ
ಇದ್ದ ಗೊಂದಲಕ್ಕೆ ಮತ್ತೊಂದ ಸೇರಿಸಿ;
ಈಗ ಮತ್ತೆ ಎಲ್ಲವನ್ನೂ ಮರುಕಳಿಸುವ
ಪ್ರಯತ್ನ ಸಾಗಿದೆಯಾದರೂ
ಎಲ್ಲವೂ ಅಸ್ಪಷ್ಟವಾಗಿವೆ, ಕಷ್ಟವಾಗಿವೆ!!

ಕನಸ ಪಾತ್ರಧಾರಿಗಳ ಹೆಸರು
ಅಲ್ಲಲ್ಲಿ ಬಿಡಿ ಅಕ್ಷರಗಳಾಗಿ ಹೊಳೆಯುತ್ತವೆ;
ಜೋಡಿಸುತ್ತ ಕೂತರೆ ಕೆಲಸ ಸಾಗದು
ಮನಸಿಗೆ ಬಂದ ಹೆಸರಿಟ್ಟರೆ
ಪಾತ್ರಗಳು ಮುಂದಕ್ಕೇ ಸಾಗದೆ ನಿರ್ಲಿಪ್ತವಾಗುತ್ತವೆ;

ಕಣ್ಣು ತುಂಬಿ ಬಂದಾಗಲೆಲ್ಲ
ಹೊರಗೆ ಕಾದ ಕನಸುಗಳು ಎಚ್ಚೆತ್ತು
ಒಳಗೆ ಹೊಕ್ಕವೋ ಎಂಬಂತೆ
ದಿಢೀರ್ ತಲಣದ ಕ್ಷಣ;
ಹಿಂದೆಯೇ ನೀಳ ಮೌನ!!

ಹಾಸಿಗೆ ಎಲ್ಲವನ್ನೂ ಹೇಳಲಾಗದೆ
ನಿಸ್ಸಹಾಯಕವಾಗಿ ಚಾಚಿತ್ತು
ಅಂತೆಯೇ ತಲೆ ದಿಂಬೂ ಸಹ;
ಕನಸುಗಳ ಸರತಿಯಲ್ಲಿ
ಕಣ್ಣು ಪೊರೆಗಟ್ಟುವ ಮುನ್ನ
ಕರಗುವ ಉಮ್ಮಸ್ಸಿನಲ್ಲಿದೆ!!

                                             -- ರತ್ನಸುತ