ಹಳೆಯ ಕಂತುಗಳು ನೀಗಿದಂತೆ
ಮನದಿ ಸಣ್ಣ ನೀರವತೆ
ರೆಪ್ಪೆ ಕದಲಿದರೆ ಕಂಬನಿ
ಕಣ್ಣ ಚೌಕಟ್ಟಿನಾಚೆ ಪಸೆ
ಅದರುವ ಬೆರಳುಗಳ ಹಿಡಿ ಮಾಡಿ
ಸುತ್ತ ತಲೆಯೆತ್ತಿದ ಗೋಡೆಗೆ
ಒಂದು ಜೋರಾದ ಗುದ್ದು
ಆಚೆ ಯಾರೋ ಅರಚಿದ ಸದ್ದು
ನನ್ನದೇ ದನಿಯಲ್ಲಿ
ಹಲ್ಲು ಕಚ್ಚಿ, ಹಸಿವ ನುಂಗಿ
ಉದರಕ್ಕೆ ಅದರದ್ದೇ ರುಚಿಯ ಕೊಟ್ಟು
ಬದಿಗೆ ಸುಟ್ಟ ಬಯಕೆಗಳ
ಕಾವು ನೀಡಿದಂತೆ ಉರಿ
ತಗ್ಗುವುದನ್ನೂ ಸಂಭ್ರಮಿಸುವ
ಔಚಿತ್ಯ ಹೃದಯಕೆ
ಎಲ್ಲ ಭಾರಗಳ ಇಳಿಸಿ
ನಾನೇ ಇಲ್ಲವಾದಾಗ
ಹೇರಿಕೊಳ್ಳುತ್ತಿದ್ದಂತೆ
ಮತ್ತೆ ಭಾರವಾದೆ
ಹೊರುವುದೂ ಜೀವನದ ಭಾಗ
ಬಿಟ್ಟು ಹೊರಡುವುದಷ್ಟೇ ಅಲ್ಲ
ಯಾರಿಂದಲೋ ಗುರುತಿಸಲ್ಪಡುವ
ಅಸಲಿಗೆ ನನ್ನದಲ್ಲದ ಪ್ರಭೆ
ನನ್ನನ್ನೂ ಸಹ ಮರೆಮಾಚುವ
ಸೂಕ್ಷ್ಮ ಅರಿವಿಗೆ ಬರುವುದರೊಳಗೇ
ಭ್ರಮೆಯಿಂದ ಹೊರ ಬರಬೇಕು
No comments:
Post a Comment