ದೃಷ್ಟಿ ತಾಕದಿರಲಿ ದೇವರೇ
ನಮ್ಮ ಮನೆಯ, ಈ ಮಗುವ
ಈ ನಗುವ, ಮೊಗದ ಸಿರಿಗೆ ಮನಸೋತು
ದೃಷ್ಟಿ ತಾಕದಿರಲಿ ದೇವರೇ !
ಒಂಬತ್ತು ಮಾಸಗಳ ಗರ್ಭದ ಗುಡಿಯನು
ನಮಿಸಿ ಈ ಜಗವ ಕಾಣಲು ಬಂದಿಹನು
ಕಣ್ಣಿಗೆ ಧೂಳು ಬೀಳುವ ಮುನ್ನ
ರೆಪ್ಪೆಯ ಹಾಗೆ ಕಾಯುವೆ ಇವನ
ಎಲ್ಲ ಸುಖವ ನೀಡುತ
ಸುಖಿಸಿದವನು ನಾನು
ಅಪ್ಪ ಎಂದ ಕೂಡಲೇ
ಕುಣಿಯುವವನು ನಾನು
ನನ್ನ ಮಗುವೇ ನನ್ನ ಸರ್ವಸ್ವವು...
ದೃಷ್ಟಿ ತಾಕದಿರಲಿ ದೇವರೇ !
ತಾರೀಫು ಮಾಡುತಲೇ ತರಲೆ ಮಾಡುವ
ತೂಕಡಿಕೆ ಬರಲು ಮಡಿಲಿಗೆ ಜಾರುವ
ಮುಂಗೋಪದಲ್ಲೂ ತುಂಬಿದ ಚಂದ್ರ
ಆಟಾಡುವಲ್ಲಿ ಸೋಲಿಸೋ ಮಿತ್ರ
ನಾನು ಎಂಬ ಅಹಮಿಗೆ
ಅಂತ್ಯ ಹಾಡೋ ಶೂರ
ಏನೇ ಇರಲಿ ಹೇಳುವ
ಸಂಕೋಚವಿರದೆ ನೇರ
ನನ್ನ ಮಗುವೇ ನನ್ನ ಆದರ್ಶವು...
ದೃಷ್ಟಿ ತಾಕದಿರಲಿ ದೇವರೇ !
No comments:
Post a Comment