ಶಿಲ್ಪ-ಶಿಲ್ಪಿ ಸ್ಟೋರಿ

ವರ್ಷಗಟ್ಲೇ ಕೆತ್ತಿದ್ ಶಿಲೆಗೆ
ಕೊನೆ ಸ್ಪರ್ಶ ಕೊಡೋ ಹೊತ್ನಲ್ಲಿ
ಮೂಗು ಮುರ್ದ ಶಿಲ್ಪಿ

ತಟ್ಟಿದ್ ಸುತ್ಗೇ ತಲೆ
ಮೊಟ್ಕಿದ್ ಉಳಿ ಅಂಚು
ಬಿಕ್ಕಿದ್ ಶಿಲ್ಪಿ ಮನ್ಸು

ರಾಜ ಖಡ್ಗ ಕೈಗೆತ್ಕೊಂಡ
ಶಿಲ್ಪಿ ಭಯಕೆ ಊರು ಬಿಟ್ಟ
ಶಿಲೆಗೆ ಸಿಕ್ತು ಕುರೂಪಿ ಪಟ್ಟ

ಸುತ್ಲೂ ಎಲ್ಲೂ ಸಿಗ್ಲಿಲ್ವಂತೆ
ಮುರ್ಕೊಂಡ್ಚೂರಾಗ್ ಬಿದ್ದ ಮೂಗು
ಹುಡ್ಕಾಡಿದ್ರೂ ಕೊನೆವರ್ಗೂ

ಶಿಲೆಗ್ ಸಿಕ್ತು ಅರ್ಮನೆ ಮೂಲೆ
ಜೇಡ ಕಟ್ಟಿದ್ ಗೂಡಿನ್ ಮಾಲೆ
ಕೆಡ್ಕಾಗಿದ್ದು ನೋಡು ಅಲ್ಲೇ!!

ಅರ್ಮನೆಗೆ ಬೆಂಕಿ ಬಿತ್ತು
ರಾಜಾ, ರಾಣಿ, ಮಕ್ಳು ಸತ್ರು
ಊರ್ಗೂರೇ ಬೊಬ್ಬೆ ಇಟ್ರು

ಶಿಲ್ಪಿ ಕಾಡಾನೆ ಕೈಲ್ಸತ್ತ
ಮಂತ್ರಿ ರಾಜ್ಯಾನೇ ಮಾರ್ಬಿಟ್ಟ
ಮೂಗಿಲ್ದ್ ಶಿಲೆನ್ಹಂಗೇ ಬಿಟ್ಟ

ಗೈಡು ಹೇಳಿದ್ ಸ್ಟೋರಿ ಇದು
ಗಮ್ನಾ ಇಟ್ಟು ಕೇಳಿ ಮತ್ತೆ
"ಮೂಗೆಲ್ಲಿ?" ಅಂತ ಕೇಳ್ಬಾರ್ದು !!

                       --ರತ್ನಸುತ