ಪ್ರೀತಿಯಲಿ ಈವರೆಗೆ

ಕಣ್ಣಲ್ಲಿ ಧೂಳು ಬೀಳೋಕೂ ಮುನ್ನ
ನೀನೊಮ್ಮೆ ನೋಡು ನನ್ನ
ಮಡಿಲಲ್ಲೇ ಇದ್ದು ಕೊನೆ ಮಾತನಾಡಿ
ನಾ ಬಿಡುವೆ ಪ್ರಾಣವನ್ನ

ಉಸಿರಲ್ಲಿ ಕೂತು ನಿನ್ನಂತರಂಗ
ನಾ ನೋಡಿ ಬರುವ ಆಸೆ
ಮಂಜಂತೆ ಕರಗಿ ನೀರಾಗಿ ಬಿಡುವೆ
ನೀನೊಮ್ಮೆ ನಗುವ ಸೂಸೆ

ಅಲ್ಲಲ್ಲಿ ನೀನು ಬಿಡುವಂಥ ಗುರುತೇ
ನನಗೊಂದು ದಾರಿ ದಿಕ್ಕು
ಹೆಚ್ಚೇನು ಬೇಡ ಈ ಬಾಳಿಗೊಂದು
ಸಿಹಿ ನೆನಪ ನೀಡು ಸಾಕು

ಅಂಗೈಯ್ಯ ಮೇಲೆ ಧ್ಯಾನಕ್ಕೆ ಕೂತು
ನಾ ಕಣ್ಣು ಮುಚ್ಚುವಾಗ
ಮೈ ಶಾಖವನ್ನು ಅನುಭವಿಸಬೇಕು
ನೀ ನಡುಗಿ ಬೆಚ್ಚುವಾಗ

ತಪ್ಪಾಗುವಂತೆ ನಡೆದಾಗ ಒಮ್ಮೆ
ನೀ ತೋರು ಚೂರು ಮುನಿಸು
ನೀ ಸೋಕಿದಾಗ ಬರಡಾದವೆಲ್ಲ
ತಂತಾನೆ ಹಸಿರುಗನಸು

ಕಾದಾಟದಲ್ಲಿ ಸೋತಲ್ಲೂ ಸೊಗಸು
ವಿಸ್ಮಯವೇ ಪ್ರೇಮ ಯುದ್ಧ
ಇರಿದಿರಿದ ನಿನ್ನ ಹೆಚ್ಚೆಚ್ಚು ಬಯಸಿ
ನಾ ಅಮರ ಪ್ರೇಮ ಯೋಧ!!

                            -- ರತ್ನಸುತ