ಕಣ್ಣು ಮಂಜಾಗಿದೆ

ಕಣ್ಣು ಮಂಜಾಗಿದೆ ಇನ್ನೂ ಚೂರು ಸನಿಹ ಬಾ
ಕಾಣಬೇಕು ನಿನ್ನ ಮುಖ ಕಣ್ಗಳ ಸಾಂತ್ವಾನಕೆ
ಆಗಲೇ ಮಿಂದಾಗಿದೆ ಇನ್ನಷ್ಟು ಮುಳುಗಲಾರೆ
ದೀಪ ಹಚ್ಚಿಕೊಂಡರೂ ದಿಗಿಲು ಅಂಧಕಾರಕೆ
...

ಕಾಡುಗಿಚ್ಚ ನಡುವೆ ಹೆಚ್ಚು ಮಾತುಗಳು ಮೂಡವು
ಬಿಕ್ಕಳಿಕೆಗೆ ಸಿಕ್ಕಿ ಒಡೆದ ಹಾಡು ಅರ್ಥವಾಗದು
ಸದ್ದಿನಲ್ಲಿ ಆದ ನೋವು ಹಾಗೇ ಉಳಿಯಿತಾದರೆ
ಮೌನವನ್ನೂ ಲಘುವಾಗಿ ಪರಿಗಣಿಸಬಾರದು


ಗೋಡೆ ತುಂಬ ಗೀಟು ಎಳೆದು ಲೆಕ್ಕೆವಿಟ್ಟೆ ಏತಕೆ?
ಆದ ಜಗಳ ಲೆಕ್ಕ ಮೀರಲೆಂಬುದೆನ್ನ ಕೋರಿಕೆ
ಮೇರು ತುದಿಯ ತಲುಪಿ ಆಯ್ತು ಜಾರೋ ಬಂಡಿ ಆಟದಿ
ಜಾರಿ ನೆಲವ ಮುಟ್ಟಲೇಕೆ ನಿಮಿಷಕೊಂದು ಪೀಠಿಕೆ?


ಹೂವ ಕಿತ್ತು ಕಟ್ಟಿ ಇಡುವೆ ಸಂಜೆಗೊಂದು ನೆಪವನು
ಯಾವ ಬಾಗಿಲಿಂದ ಹೊತ್ತು ತರುವೆ ಹೇಳು ನಗುವನು
ಸುಳ್ಳಿಗೊಂದು ಸುಳ್ಳು ಸೇರಿ ಬೆಲ್ಲದಚ್ಚು ಕರಗಿತು
ತೇಲೋ ಮೋಡವನ್ನು ತಬ್ಬಿ ತೊಲಗಿ ಬಿಡಲಿ ಚಂದ್ರನು


ತಾಳು ಒಂದು ಪ್ರಶ್ನೆಯಿದೆ ಹೇಳಿ ಹೋಗು ಉತ್ತರ
ಸಾಲು ಸಾಲು ಗೋಜಲನ್ನು ಬಿಡಿಸಿಕೊಂಡು ಕೂರುವ
ನನ್ನ ಕೈ ಎಂದೂ ಮುಂದು ನಿನ್ನ ಬೆವರ ತೀಡಲು
ನಿನ್ನ ಮೇಲೆ ನನಗೆ ಅಧಿಕಾರದಲ್ಲೂ ಗೌರವ!!