ಕಟ್ಟು ಬಾ ಸೇತುವೆಯ ಮೌನಗಳ ನಡುವೆ

ಕಟ್ಟು ಬಾ ಸೇತುವೆಯ ಮೌನಗಳ ನಡುವೆ
ಆಡದ ಮಾತುಗಳು ಅರ್ಥವಾಗಿ ಸಾಯಲಿ
ಕಣ್ಣು ಬೆಸೆದರಷ್ಟೇ ಸಾಲದು ಸಂಭಾಷಣೆಗೆ
ದೃಷ್ಟಿಯೂ ಕೂಡಬೇಕು ಕಂಬನಿಗಳ ನಡುವಲಿ

ನೀಡು ನನಗೆ ನಿನ್ನ ಸದಾ ಸುಖಿಸೋ ಆ ನೋವನು
ಒಮ್ಮೆ ನನ್ನ ಹೃದಯದಲ್ಲೂ ನೆತ್ತರನ್ನು ಹರಿಸಲಿ
ತೋರು ಆ ನಿನ್ನ ಕನಸಿನೂರಿನಾಚೆ ಹೊಳೆಯನು
ಅಡ್ಡ ದಾರಿ ಹಿಡಿದ ಪಾದ ಪಾಪಗಳ ತೊಳೆಯಲಿ


ಬಿಗಿದಿಡು ಹಸ್ತವನ್ನು ನನ್ನ ಪ್ರಾಣ ಅಡಗಿಸಿಟ್ಟು
ಹುಡುಕಾಡಿ ನಿನ್ನನ್ನು ನಾ ಸೇರುವ ತನಕ
ಕೊಡೆಯನ್ನು ಇರಿಸಿಕೊಂಡ ಆ ನಿನ್ನ ನಂಬುಗೆಗೆ
ಅಚ್ಚರಿಯ ಹಂಗಾಮಿ ಮಳೆಯಾಗೋ ತವಕ


ಬರೆದು ಹೋಗು ಬೆನ್ನ ಮೇಲೆ ನಿನ್ನೆಲ್ಲ ಬಯಕೆಗಳ
ಬೆಂಬಿಡದೆ ಕಾಡುವಷ್ಟು ಕಟುವಾಗೇ ಇರಲಿ
ನಿನ್ನ ನೆನೆಪ ಸಾಂಗತ್ಯ ಇದ್ದರಷ್ಟೇ ಸಾಕು ಬಿಡು
ಏಕಾಂತಕೆ ಬಿಡುವು ಸಿಕ್ಕು ದೂರ ತೊಲಗಿ ಬಿಡಲಿ


ಬಾ ಚಾಚು ತೋಳುಗಳ, ಸಡಿಲಾಗಿಸಿ ಕೋಪವ
ತಬ್ಬಿಕೋ ಬೆಂದ ಜೀವ ನಿನ್ನ ಶಾಖ ಪಡೆಯಲಿ
ಗುಂಡಿಗೆ ಗುಂಡಿಗೆಗೆ ಮುತ್ತು ಕೊಟ್ಟು ಮೆರೆಯುವಾಗ
ಸಣ್ಣಗೆ ಮಂದಹಾಸ ಈರ್ವರಲ್ಲೂ ಮೂಡಲಿ...