ದೇವರ ಹೆಸರಲ್ಲಿ ದೀಪ ಹಚ್ಚಿ

ದೇವರ ಹೆಸರಲ್ಲಿ ದೀಪ ಹಚ್ಚಿ

ಅದೇ ಉರಿಯಿಂದ ಪಂಜು ಹೊತ್ತಿಸಿ 

ಪಲ್ಲಕ್ಕಿ ಕಟ್ಟಿ ಊರೂರು ಸಾಗಿ ಬಂದು 

ಸಾವರಿಸಿಕೊಳ್ಳುತಿದೆ ದಾರಿ  

ಮೆಟ್ಟಿಲ ಬುಡದಲ್ಲಿ ಮೆಟ್ಟುಗಳ ಬಿಟ್ಟ

ಪಲ್ಲಕ್ಕಿ ಹೊತ್ತವರ ಗಮನವೆಲ್ಲ 

ನೆರೆದವರು ಮೆಟ್ಟಿದ ಹೋಲುವ ಮೆಟ್ಟು 

ತನ್ನದೇನೋ ಎಂಬ ಚಿಂತೆಯಲ್ಲಿ 

ಮೈ ಮುರಿವುದಕ್ಕೆ ಬಿಡುವೆಲ್ಲಿ 

ದೇವರ ಕೋಣೆಯಲೂ ವಿವಿಕ್ತತೆಯಿಲ್ಲ 

ಧೂಪಕ್ಕೆ ಸೀನಿದರೆ ಮುಡಿ ಹೂ ಜಾರಿ 

ಎಡಕ್ಕೆ ಕೆಡುಕು, ಬಲಕ್ಕೆ ಒಳಿತು 

ಅಭಿಷೇಕದ ಬಂಕೆ ಮೇಲೆ ವಸ್ತ್ರಾಭರಣ 

ವಜ್ರ ವೈಡೂರ್ಯಭರಿತ ಕಿರೀಟ  

ಸೋತ ಕೈಯ್ಯಲಿ ಮಾಯಾ ಅಸ್ತ್ರ 

ಜಗದ ಹರಕೆಗೆ ಬಿರಿದ ಹಸ್ತ 

ಹಸಿದು ಎದುರಿಟ್ಟ ಫಲ ಸೇವಿರದೆ 

ಎದುರಾದವರ ಕಂಬನಿ ಕಥೆ ಕೇಳುವ 

ಉತ್ಸವದ ಮೂರ್ತಿ ಈಗಷ್ಟೇ ಬಂದಿಳಿದನು 

ಗೋಡೆಯ ಆಚೆಗಿನ ವರದಿ ಒಪ್ಪಿಸುವ 

ತೂಗು ದೀಪದ ಮೇಲೆ ತೂಗುವ ಜೇನ್ನೊಣ 

ಹಾಡುವುದು ಮೆಚ್ಚಿಸಲು ದೇವರನ್ನು 

ನಿದ್ದೆಯಿಂದೆಚ್ಚರಿಸೆ ಕಟ್ಟಿದರೋ ಏನೋ 

ಎಲ್ಲರಿಗೂ ಎಟಕುವ ಘಂಟೆಯನ್ನು 

ಆಭರಣ ಪೆಟ್ಟಿಗೆ, ದ್ವಾರಕಿಟ್ಟರು ಬೀಗ

ಗರ್ಭಗುಡಿಯಲ್ಲೀಗ ನಿರ್ಲಿಪ್ತ ಮೌನ

ಹುಂಡಿ ಕಾಣಿಕೆ ಲೆಕ್ಕ ಕೇಳುವವನವನಲ್ಲ 

ಶಾಂತ ಚಿತ್ತಕೆ ಸಿಗದ ದೇವರಿಲ್ಲ...