ಕಾಮನ ಬಿಲ್ಲು

ಕಾಮನ ಬಿಲ್ಲು

ಗೀಚಿದೆ ಕವನ

ಭೂಮಿಯು ಓದುತ ನಲಿಯಲು

ಮೋಡವು ಕರಗಿ

ಜಾರಿದೆ ಇಳೆಗೆ

ಹೂಗಳ ಆಸೆಯ ತಣಿಸಲು

ಯಾವುದೋ ಹಾಡನು

ಹೆಕ್ಕುತ ಮೆಲ್ಲುತ

ಹಾಡಿದೆ ಹಕ್ಕಿಯು ಭರದಲಿ  

ಎಲ್ಲಿಗೋ ಸಾಗುವ 

ದಾರಿಯ ಹಿಡಿಯುತ 

ನಂಬಿಕೆ ಮೂಡಿದೆ ಮನದಲಿ 

ಬಣ್ಣದ ಸಾಲವ

ನೀಡುವ ಚಿಟ್ಟೆಯೇ 

ತಿರುಗಿ ನಾ ನಿನಗೆ ಏನ ನೀಡಲಿ?

ಅರಿವಿನ ಪಾಠವ

ಮಾಡುವ ನದಿಗಳೇ

ಕಲಿಸುವ ಗುರುಗಳು ನೀವೆನ್ನಲೇ  

ದೋಣಿಯ ಮಾಡಲು 

ಕಾಗದ ಸಾಲದೇ 

ಬಿಡಿಸಲೇ ಎಲೆಗಳೇ ನಿಮ್ಮನ್ನು  

ಏಣಿಯ ಹಾಕಿಯೂ 

ದೂರವೇ ನಿಲ್ಲುವ

ಆದರೂ ಗೆಳೆಯನೇ ಚಂದ್ರನು