ಬಿಡುಗಡೆಗೆ ಕಾದಿರುವೆ ಬಂಧನವು ಸಾಕಾಗಿ

ಬಿಡುಗಡೆಗೆ ಕಾದಿರುವೆ ಬಂಧನವು ಸಾಕಾಗಿ

ನೀಡಲಾದರೆ ಅದುವೇ ಮುಯ್ಯಿ ನನಗೆ

ಬೇಡಿಕೆ ಏನಿಲ್ಲ ನಿನ್ನೆಲ್ಲ ನೆನಪನ್ನು

ಅಳಿಸಿಬಿಡು ಸಿಕ್ಕಂತೆ ಜೋರು ಮಳೆಗೆ

ನಿನ್ನ ಎರಡಂತಸ್ತು ಎಟುಕಲಾರದು ನೋಡು

ನಾನು ತಳಪಾಯದಲಿ ಹೂತ ಬೇರು

ಆ ಮೊದಲ ಪರಿಚಯವ ಮರೆತು ಹೇಳು

ನಿನ್ನ ಮುಗಿದ ಅಧ್ಯಾಯದಲಿ ನಾನು ಯಾರು?

ನೀ ಸುಟ್ಟ ಹಾಳೆಗಳ ಘಾಟು ತಟ್ಟದೆ ಇರಲಿ

ಎಚ್ಚರಗೊಳ್ಳುವುದು ಸತ್ತ ಸತ್ವ

ಗಾಯಗೊಂಡ ಬೆರಳು ಏನ ಬರೆದರೂ ಸಹಿತ

ಮೂಡಿ ಬರುವುದು ಅಲ್ಲಿ ಒಂದು ತತ್ವ

ಇಟ್ಟ ಹೆಜ್ಜೆಯ ಹಾಗೆ ಹಿಂದಿಡದಿರು 

ಮತ್ತೆ ತಪ್ಪುವುದು ಈ ದೂರದ ಮಾಪನ

ಹತ್ತಿರವಾಗುವ ಪ್ರಯತ್ನಗಳ ಕೊಲ್ಲೋಣ

ಒಪ್ಪಂದ ಮುರಿದರೆ ವ್ಯಥೆ ಉಲ್ಬಣ

ಈ ಮೂರು ದಿನಗಳ ಹೀಗೆ ಕಳೆದುಬಿಡುವ 

ಗುರುತುಗಳ ಮರೆಸೋಕೆ ನೆನ್ನೆಯನು ವ್ಯಯಿಸಿ 

ನೆನ್ನೆಯ ನಷ್ಟಕ್ಕೆ ಪರಿಹಾರವಿಂದು 

ಇಂದಿನ ಅತೃಪ್ತಿಗೆ ಹೆಚ್ಚುವರಿ ನಾಳೆ