ಗಝಲ್ (ಏಕೆ ಮಾಗಿದ ಎಲೆ ಉದುರುವುದು ಈ ಪರಿ)

ಏಕೆ ಮಾಗಿದ ಎಲೆ ಉದುರುವುದು ಈ ಪರಿ 

ಮಾತು ಮುಗಿಸಿದ ಮನ ಮರುಗುವುದು ಈ ಪರಿ 

ಸಂತೆಯಲಿ ಸಿಗುವ ಮುಖ ಏಕಾಂತದಲಿ ಸಿಗದೆ  

ಕನಸಿನಲೂ ಹಿಂಜರಿದು ಕಾಡುವುದು ಈ ಪರಿ 

ಹಿಡಿತಕ್ಕೆ ಕೈಯ್ಯೊಡ್ಡಿ, ಉಂಗುರಕೆ ಬೆರಳೊಡ್ಡಿ

ಬದುಕಿಗೆ ಸಿಗದಂತೆ ಓಡುವುದು ಈ ಪರಿ 

ಕಣ್ಣು ಕಣ್ಣಿನ ನಡುವೆ ಸೇತುವೆಯ ಕಟ್ಟಿಯೂ 

ದಾಟಿ ಬರದೆ ದೂರ ಉಳಿವುದು ಈ ಪರಿ 

ತವಕದಿಂದೆರಗಿದರೂ ನಿರ್ಭಾವ ಸ್ಥಿತಿ ತಲುಪಿ 

ಮಿಡಿಯದ ಎದೆ ನೀರವತೆ ಇದು ಈ ಪರಿ 

ನೀಲಿ ಆಗಸದಲ್ಲಿ ಬಿಳಿ ಶಾಯಿಯ ಬರಹ 

ಮುಗಿವಷ್ಟರಲ್ಲಿ ಇರುಳು ಕವಿದು ಈ ಪರಿ 

ಹಗುರಾಗಲು ಉಸಿರ ಹಂಗು ತೊರೆದ ಒಡಲು 

ನಿಟ್ಟುಸಿರನಿಡಲು ಪರಿತಪಿಸಿಹುದು ಈ ಪರಿ 

ವಿರಹದಲಿ ವಿಹರಿಸಲು ಮುರಿದ ಹಡಗಲಿ ಕೂತು 

ರುದ್ರ ಅಲೆಗಳು ಸಂವಹಿಸುವುದು ಈ ಪರಿ