ಅವಳ ಗುಂಗಲ್ಲಿ

ಅವಳು ನೂರು ಪ್ರಶ್ನೆಗಳಿಗೆ
ಪ್ರಶ್ನಾತೀತ ಉತ್ತರ 
ಅರ್ಥ ಆಗುತಾಳೆ ಥೇಟು 
ಆಲ್ಜೀಬ್ರಾ ಥರ 

ಅವಳು ಮತ್ತು ಅವಳ ಮಾತು 
ಅದ್ಭುತಕ್ಕೆ ಹೋಲಿಕೆ 
ಪ್ರೀತಿ ತೋರೋ ವಿಷಯದಲ್ಲಿ 
ಒಂದು ಚಂದ ಪೀಠಿಕೆ 

ಅವಳ ಒಂದು ಕಣ್ಣ ಹನಿಗೆ 
ಪ್ರಳಯವಾಗಿಸೋ ಕಲೆ 
ತೀರ್ಪು ನೀಡುತಾಳೆ ಆಕೆ 
ಇನ್ನೂ ಯೋಚಿಸುತ್ತಲೇ 

ಅವಳ ಮೌನ ಸೂಚಕಕ್ಕೆ
ನಾನು ಬಸವನಾದೆನು 
ಖುಷಿಯ ಮೇರು ಶಿಖರವನ್ನು 
ಇನ್ನೂ ಏರುತಿರುವೇನು 

ಅವಳ ಮುಂದೆ ಸುಳ್ಳು ಒಂದು 
ಮೂಗು ಮುರಿದ ಕೆತ್ತನೆ 
ಹಿಡಿಯುತಾಳೆ ನನ್ನ ಅಸಲಿ 
ಮಾತನು ಗಬಕ್ಕನೆ 

ಅವಳ ಜೊತೆಗೆ ವಾದದಲ್ಲಿ 
ಸೋತ ದಿನವೇ ಸುಂದರ 
ಗೆಲುವು ಪಡೆದರೇನು ಬಂತು 
ಇರುಳುಗಳೇ ಭೀಕರ 

ಅವಳ ಮೈಯ್ಯ ಸುತ್ತುವರೆದ 
ಬಳ್ಳಿ ನಾನು ಕಂಡಿರಾ?
ನಾನು ಬೇರೆ, ಆಕೆ ಬೇರೆ 
ಬೇರು ಒಂದೇ ಬಲ್ಲಿರಾ?

ಅವಳ ಕುರಿತು ಬರೆದುಕೊಂಡ 
ದಿನಗಳೆಲ್ಲ ಹುಣ್ಣಿಮೆ 
ಅಕ್ಷರಕ್ಕೆ ಎಡೆಯ ಮಾಡಿ ಕೊಟ್ಟ 
ಹಾಳೆ ರೇಶಿಮೆ 

ಅವಳು ನನ್ನ ಬಾಳಿನರ್ಥ 
ನನ್ನ ನಾಳೆ ಕನ್ನಡಿ 
ಬಿಡಿಸಿ ಹೇಳುತಾಳೆ ನಿತ್ಯ 
ಅರ್ಥಬರಿತ ನಾಣ್ನುಡಿ 

                    -- ರತ್ನಸುತ