ಮೊಬೈಲ್ ಪ್ರೇಯಸಿ

ದೂರದಿಂದ ಕಂಡೆ
ಅವಳ ಒಂಟಿತನವ
ಭಾರಗೊಂಡಿದ್ದ ಜೋಡಿ
ಕಣ್ಣ ಕೊಡವ

ಬೆರಳು ಸೂಚಿಸಿತ್ತು
ಚೂರು ಹೆಚ್ಚು ದುಃಖ
ಕುರುಳು ಜೋತು ಆಡಿತ್ತು
ಕಿವಿಯ ಪಕ್ಕ

ಸುತ್ತ ಕಚ್ಚಿ ಉಗಿದ
ಸಾಲು ಉಗುರ ಚೂರು
ಕಾಣುತಿತ್ತು ಸ್ಪಷ್ಟ
ಕಣೀರ ಗೀರು 

ಗಲ್ಲ, ಮೂಗು ಥೇಟು ಅಲ್ಲಿ
ಸಂಜೆ ಬಾನು
ಮೌನ ದಾಟಿ ಬಾರದಿತ್ತು
ಮಾತು ತಾನು

ತೊಟ್ಟು ಜಾರದಂತೆ ತಡೆದ
ಒಂದು ಕೈಯ್ಯಿ
ಮತ್ತೊಂದು ಮುಚ್ಚಿತ್ತು
ಕಿವಿಯ ಬಾಯಿ

ಆಚೆ ತೀರದಲ್ಲಿ ಒಂದು
ಆಪ್ತ ಕೊರಳು
ವಿರಹ ಬೇಗೆ ಕಾರಣಾಗಿ
ಮಾತು ತೊದಲು

ಫೋನು ಸಹಿತ ಬಿಕ್ಕಿತಲ್ಲಿ
ಸ್ವಲ್ಪ ದೂರ
ಬ್ಯಾಟರಿ ಖಾಲಿ ಆಯ್ತು
ಅಲ್ಲಿ ಪೂರ

ಗೆಳೆಯನ ಕ್ಷಮಿಸಿ ಆಕೆ
ಇಟ್ಟ ಶಾಪ
ಮೊಬೈಲ್ ಕಂಪನಿ ಅವರು
ಅಯ್ಯೋ ಪಾಪ !!

                   -- ರತ್ನಸುತ