ಮಳೆಗ್ ಬಳೆ ತೊಡ್ಸಿ !!

ಮಳೆ ಸುರ್ದು ಒಲೆ ಸುಟ್ಟು
ಗಂಜಿ ಬೆಂದು ತಳ ಹಿಡ್ದು
ಮಡ್ಕೆ ಮಣ್ಣು ಕಪ್ಪು ಹೆಂಚು 
ಹೊಗೆ ಕಿಂಡಿ ಮಸಿ ಬಣ್ಣ 
ಮುಗಿವಲ್ತು ಮಗಿ ಆಟ 
ಮನೆ ಮ್ಯಾಗೆ ಆಲಿಕಲ್ಲು 
ಖಾರ ಹೆಚ್ಚಿ ಮುರಿ ಮೆಣ್ಸು 
ನಾಲ್ಗೆಗ್ ಉಪ್ಪಿನ್ಕಾಯಿ ಕನ್ಸು 
 
ಹಿತ್ಲ ಕೋಣೆ ಪಕ್ಕ ಕೊಟ್ಗೆ 
ದನ ಕರ್ಗೋಳ್ ಪೀಕ್ಲಾಟ 
ಗದ್ದೆ ದಾರಿ ಹವಾಯ್ ಚಪ್ಲಿ 
ಎರ್ಚು ಹಾರಿ ಬಟ್ಟೆ ಕೆಸ್ರು 
ಹಗ್ಗದ್ ಮ್ಯಾಲೆ ಬಟ್ಟೆ ನೆಂದೋ 
ಬಿತ್ತ ಬೀಜ ನಡುಗಿ ನೊಂದೋ 
ಕತ್ಲು ಕತ್ಲು ಸುತ್ತ ಮುತ್ಲೂ 
ಹೆಂಡ್ರು ದೀಪ ಯಾಕೋ ಮರ್ತ್ಲು 
 
ಉಪ್ಪರ್ಗೆ ತೊಟ್ ತೊಟ್ಟಿಟ್ಟು 
ಪಾತ್ರೆ ಪಗಡೆ ಬಾಯಿಗ್ ಕೊಟ್ಟು 
ತಣ್ವು ತಟ್ಟಿ ಗ್ವಾಡೆ ಬಿರ್ಕು 
ಬಾಗ್ಲು ಹಿಗ್ಗಿ ಹೊಸ್ಲು ತಡ್ದು 
ಹಟ್ಟಿ ಮುಂದೆ ರೊಟ್ಟಿ ತುಂಡು 
ಮಗಿ ಮರ್ತು ಬಿಟ್ಬಂದಾದೋ 
ಹಸ್ದು ಬೀದಿ ನಾಯಿ ಮೂಗು 
ಮೂಸಿ ಕಣ್ಣಿಗ್ ಸಿಕ್ಕೊಂಡಾದೋ 
 
ಸೌದೆ ಆರಿ, ಗಂಜಿ ಕಪ್ಪು 
ಎಣ್ಣೆ ಮುಗ್ದು ದೀಪ ಕಪ್ಪು 
ಮಗಿ ಆಡ್ತಾ ನಿದ್ದೆಗ್ ಜಾರಿ
ಮನೆ ತುಂಬ ನೆರ್ಳಿನ್ ದಾರಿ 
ನೀರಿನ್ ಮಡ್ಕೆ,ತಂಪು ಮಜ್ಗೆ 
ನೆಂಜ್ಕೊಳಾಕೆ ಈರುಳ್ಳಿ ಜೊತ್ಗೆ 
ಹಸಿ ಮಯ್ಯೀನ್ ಒಸಿ ತಡ್ವಿ 
ಕಿಸಕ್ಕಂತ ನಗು ಸದ್ದು 

ಎಲ್ಲಿನ್ ಜಾತ್ರೆ ಅಲ್ಲಿಗ್ ಬಿಟ್ಟು 
ಬೆಳ್ಕು ಕಾಣೋವರ್ಗೂ ಮರ್ತು 
ಲೋಕ ಎಂಬೋದೈತೆ ಒಂದು 
ನಮ್ಗ್ಯಾಕಮ್ಮಿ ಅದ್ರ ಕೊರ್ಗು 
ಮಗಿ ಅತ್ರೆ ಸೆರ್ಗು ಬಿಡ್ತೀನ್ 
ಸೆರ್ಗು ಬಿಟ್ರೆ ಮಗಿ ಕೊಡ್ತೀನ್ 
ಹಸ್ವು ಬಾಯಾರ್ಕೆ ತೀರ್ಸು 
ಮಳೆ ಕೈಗೆ ಬಳೆ ತೊಡ್ಸು..... 

                      -- ರತ್ನಸುತ