Sunday 3 March 2019

ಕತೆಯೊಂದ ಹೇಳುವೆ ಎದೆಗೊರಗು

ಕತೆಯೊಂದ ಹೇಳುವೆ ಎದೆಗೊರಗು
ಮಾತಿಗೆ ಕಾಯದಿರು ಕಿವಿಗೊಡು ಉಸಿರಿಗೆ
ಬಿಡಿಸಿ ಹೇಳುವುದು ಸಮಯಕನುಸಾರ
ಭಾವಕನುಸಾರ, ಮೋಹಕನುಸಾರ


ಭಯ ಹುಟ್ಟಿಸುವುದು ಹಾಗೆ
ಹಿಂದೆಯೇ ನೇವರಿಸುವ ಕತೆಯೊಂದು
ಅಳು ತರಿಸುವುದು ಸಹಜವಾಗಿ
ಜೊತೆಗೆ ಸಾಂತ್ವನದ ಜೋಳಿಗೆ ಹಿಡಿದು



ಎಷ್ಟೋ ಕೊನೆಗಳು ಕೊನರುವವು
ನಾವಾಗೇ ಮುಟ್ಟಿದರೆ ತಾನೆ ಕೊನೆ
ಯಾವ ಕತೆಗೂ ನೀ ಕೊಡಲೊಲ್ಲೆ ಹೆಸರ
ಉಸಿರಲ್ಲೇ ಹೇಳು ನಿನ್ನದಾವುದು?



ತೂಕಡಿಕೆ ತರಿಸಿದ ಜೋಗುಳದ ಕತೆಯ
ಕದ್ದು ನಿನ್ನ ನೆನಪ ಸಂಚಿಗಿಳಿಸಿಕೊಂಡೆ
ಉನ್ಮಾದ ಲೇಪಿಸಿದ ತುಂಟ ಕತೆಯೊದಕ್ಕೆ
ಎದೆ ಪರಚಿ ಗಾಯವನೇ ಮಾಡಿಬಿಟ್ಟೆ



ಹೀಗೇ ಒಂದಾದಮೇಲೊಂದು ಉರುಳುರುಳಿ
ಹಗಲುಗಳು ಓಡಿ, ಇರುಳುಗಳು ಕೂಡಿ
ದೀಪ ಬೆಳಗಿಕೊಂಡು ಸಾಲು ಸಂಚಿಕೆಗಳು
ಮುಗಿಯಿತೆನ್ನುವ ಹೊತ್ತಿಗೆ ಏನೂ ನೆನಪಿಲ್ಲ



ನೆನಪಿರುವುದಿಷ್ಟೇ
ನಾ ನಿನಗೆ ಒಲಿದಿದ್ದು
ನೀ ನನಗೆ ಒರಗಿದ್ದು
ಮತ್ತು ನಾವೊಂದು ಸುಂದರ ಕತೆಯಾಗಿದ್ದು...

No comments:

Post a Comment

ಅತಿ ಮಧುರ ಅನುರಾಗ

ಅತಿ ಮಧುರ ಅನುರಾಗ  ನಿನ್ನೊಲವ ಮಳೆ ಹನಿಗೆ  ಮಿಂದಿರಲು ಮನಸಿದು     ನಿಂತು ನಿಂತು ಬೀಸಿದಂತೆ  ಸಂಜೆ ತಂಪು ಗಾಳಿ  ಅಂಕೆ ಮೀರಿ ಬರುವ ಮಾತು  ಹಾಕಬೇಕೇ ಬೇಲಿ  ಜೊತೆ ಇರಲು ...