Monday 25 April 2016

ನೂರು ಮುತ್ತಿನ ಕತೆ

ನೂರು ಮುತ್ತ ಕೊಟ್ಟ ತುಟಿಗೆ
ಸಣ್ಣ ಜೋಮು ಹಿಡಿದಿದೆ
ಕೆನ್ನೆಗೆಂಪು ನಾಚಿ ಚೂರು
ಇನ್ನೂ ಕೆಂಪಗಾಗಿದೆ
ಒಂದೂ ಮಾತನಾಡದಂತೆ
ತುಟಿಯನೇಕೆ ಕಚ್ಚಿದೆ?
ಎಲ್ಲ ಕಂಡೂ, ಏನೂ ತಿಳಿಯದಂತೆ
ಕಣ್ಣು ಮುಚ್ಚಿದೆ!!


ಹರಿದ ಬೆವರು ಒಂಟಿಯಲ್ಲ
ತ್ವರಿತವಾಗಿ ತಬ್ಬುವೆ
ಉಸಿರ ಬಿಸಿಯ ಪಿಸು ಮಾತಿಗೆ
ಕಿವಿಯನೊಡ್ಡಿ ನಿಲ್ಲುವೆ
ಎಲ್ಲ ಸ್ವಪ್ನಗಳಿಗೂ ನಿನ್ನ
ಕಿರುಪರಿಚಯ ನೀಡುವೆ
ಮಾತು ತಪ್ಪಿದಂತೆ ನಟಿಸಿ
ಮತ್ತೆ ಮತ್ತೆ ಬೇಡುವೆ


ಎಲ್ಲ ಸಂಕಟಕ್ಕೂ ಸುಂಕ
ವಿಧಿಸುವಂತೆ ಸೂಚಿಸಿ
ಸಂಕುಚಿತ ಭಾವಗಳನು
ಒಂದೊಂದೇ ಅರಳಿಸಿ
ತೋಳ ಬಂಧನದಲಿ ಒಂದು
ಕೋಟೆಯನು ನಿರ್ಮಿಸಿ
ಸಾಟಿಯಿಲ್ಲದಂತೆ ಮಥಿಸು
ಮನದಾಮೃತ ಚಿಮ್ಮಿಸಿ


ಬಿಡುವಿನಲ್ಲಿ ಏಕೆ ಹಾಗೆ
ಕಾಲ ಬೆರಳ ಗೀರುವೆ?
ಹೊತ್ತು ಉರಿದ ಕಿಚ್ಚಿನಲ್ಲಿ
ಇಡಿಯಾಗಿ ಬೇಯುವೆ
ಹತ್ತಿರಕ್ಕೆ ಬರುವೆಯಾದರೊಂದು
ಮಾತ ಹೇಳುವೆ
ಇನ್ನೂ ಸನಿಹವಾಗದೊಡಗು
ಮೌನದಲ್ಲೇ ಸೋಲುವೆ


ಸಾಗರವ ದಾಟಿಸಿಹೆ
ಸಣ್ಣ ತೊರೆಗೆ ಅಂಜಿಕೆ?
ಹಸ್ತ ವ್ಯಸ್ತವಾಗದಿರಲು
ಪಯಣಕೇಕೆ ಅಂಜಿಕೆ?
ಒಲವಿನಲ್ಲಿ ಒಲವು ಮಾತ್ರ
ನಮ್ಮ ಪಾಲ ಹೂಡಿಕೆ
ವ್ಯರ್ಥವಾಗದಿರಲಿ ಸಮಯ
ಹರೆಯದೊಂದು ಬೇಡಿಕೆ!!


ಗುಡ್ಡ, ಗಾಳಿ, ಸ್ತಬ್ಧ ನೀಲಿ
ಮೋಡಗಳೆದುರಾಗಲಿ
ಗಡಿಯಾರದ ಮುಳ್ಳು ತಾ
ಕೊನೆ ಕ್ಷಣಗಳ ಎಣಿಸಲಿ
ಹಂತ ಹಂತವಾಗಿ ಸ್ವಂತವಾದ
ಉಸಿರು ನಿಲ್ಲಲಿ
ಮನದಿ ಹೊತ್ತಿಸಿಟ್ಟ ಹಣತೆ
ಚಿರವಾಗಿ ಬೆಳಗಲಿ!!


                       - ರತ್ನಸುತ

Monday 18 April 2016

ಬಾ ಹೋಗುವ

ಇರುಳ ಸೇರಿ ನಡೆವ ಖುಷಿಗೆ
ಹಗಲು ಕಂಡು ನಾಚಿ ಬಿಡಲಿ
ಎದೆಯ ಸಣ್ಣ ಮಾತಿನೊಳಗೂ
ಉದಯಗೊಂಡ ಪ್ರೀತಿಯಿರಲಿ
ಬರಲಿ ಮತ್ತೆ ಅದೇ ಮಳೆಯು
ತರಲಿ ಒಂದು ಸಣ್ಣ ಜ್ವರವ
ಎಂದೂ ಸೋಲದಂಥ ವಾದ-
-ದೊಡನೆ ನಾವು ಸೋಲುತಿರುವ


ಹೆಜ್ಜೆಗೊಂದು ಎಲೆಯ ಹೆಕ್ಕಿ
ಎಣಿಸಿಯಿಟ್ಟರೆಷ್ಟು ಸೊಗಸು
ಇಟ್ಟ ಲೆಕ್ಕವೆಲ್ಲವನ್ನೂ
ಬಿಟ್ಟುಗೊಡಲು ಪ್ರೀತಿ ಬೇಕು
ತುದಿಯೇ ಕಾಣದಂಥ ಪಯಣ
ನಂಬಿಕೆಯೊಂದೇ ಜೊತೆಗೆ
ಮಾತಿನೊಡನೆ ಮಧುರ ಮೌನ
ರಮ್ಯವಾಗಲೆಮ್ಮ ಕಥೆಗೆ


ಕೆಟ್ಟು ಸತ್ತ ಗಡಿಯಾರದ
ಮುಳ್ಳಿಗಿಲ್ಲ ದಣಿದ ಭಾವ
ಬರಿದು ಆಕಾಶವಾದರಿಲ್ಲ
ನೀಲಿಗೆ ಅಭಾವ
ಕಣ್ಣು ಎಷ್ಟೇ ಹಿಂಗಿದರೂ
ಖುಷಿಗೆ ಜಿನುಗುವಂತೆ ಪ್ರೀತಿ
ಮಣ್ಣು ಸವಕಲಾದರೂ
ಬೇರ ತನ್ನೊಳಿರಿಸಿದಂತೆ


ಕವಲಿನಲ್ಲಿ ಬೇರಾಗುವ
ಒಂದು ತಿರುವು ಸಿಗಲಿ
ಒಂಟಿಯೆಂದು ಚಂದಿರನೂ
ನಮ್ಮ ನೋಡಿ ನಗಲಿ
ಸದ್ದಾದರೆ ತಿರುಗಬೇಡ
ಬೆನ್ನ ಹಿಂದೆ ನಾನಿಲ್ಲ
ಎದುರುಗೊಂಡರೆ ತಬ್ಬು
ಅನುಮತಿಗಳು ಬೇಕಿಲ್ಲ


ಎಂಟಾಣೆ ಕನಸಿನಲ್ಲಿ
ಕಳೆದಂತೆ ಕೈ ಹಿಡಿದು
ನನ್ನ ದಾಟಿ ನೀ
ನಿನ್ನ ದಾಟಿ ನಾ ನಡೆದು
ಹಗಲಾಗುವಲ್ಲಿಗೆ ಬೆಳಕಾಗುವ
ಹದಿನಾಲ್ಕು ವಿದ್ಯೆಗಳಿಗೂ ಸಮನಾಗುವ
ಬಾ ಹೋಗುವ,
ಬಾ ಹೋಗುವ!!


                             - ರತ್ನಸುತ

Wednesday 13 April 2016

ತಾಯಿಯ ಜನನ


ಮುದ್ದು ಮೊಗದ ರಾಜಕುಮಾರಿ
ಈಗಷ್ಟೇ ರಥ ಬೀದಿಯ ಸುತ್ತಿ
ಕೆನ್ನೆ ಕೆಂಪಾಗಿಸಿಕೊಂಡು ಇಳಿದಂತೆ
ಎದೆಗಿಟ್ಟಳು ಗುರುತ!!



ಚಾಮರಕ್ಕೆ ತಲೆದೂಗಿ ಪಕಳೆ
ನವಿರಾಗಿ ಪಟ-ಪಟ ಕದಲಿದಂತೆ
ಬೆರಳುಗಳ ನಡುವಲ್ಲಿ ಸೂರ್ಯರು
ಒಬ್ಬೊಬ್ಬರಾಗಿ ಉದಯಿಸಿದಂತೆ
ನವ ಮುಂಜಾವಿನ ಸ್ಪರ್ಶದ
ಹರಳನ್ನು ಕೆನ್ನೆಗೊತ್ತಿಕೊಂಡಂತೆ
ಆಹ್!! ಹಸ್ತವ ಸವರಿದಲ್ಲಿ
ಆತ್ಮದ ಅಹಂಭಾವಕ್ಕೆ ಕಿಚ್ಚು!!



ಶಾಸನಗಳ ಹೊರಡಿಸುವ ನಾಲಗೆಗೆ
ಮೊದಲ ಜಿನುಗಿನ ಪರಿಚಯ
ಹಿಗ್ಗಿ-ಹಿಗ್ಗಿದಂತೆಲ್ಲ ಮುಗ್ಗರಿಸುವ
ರೆಪ್ಪೆ ಚಿಪ್ಪಿನೊಳಗೆ ಶುದ್ಧ ನಿಶೆ
ಅಲ್ಲಿ ಕನಸಿನ ತಕರಾರುಗಳಿಲ್ಲ
ಲೋಕದ ಪರಿವೇ ಇಲ್ಲ.
ಹಸಿವಿಗೊಂದು ಅಳುವಿನ ಮನವಿ
ನಂತರ ನಿದ್ದೆಯೇ ಸವಿ!!



ಶಾಂತ ಸರೋವರದಲ್ಲಿ
ಹಾರಿ ಬಿದ್ದ ಪುಟ್ಟ ಹೂವಿನ ಸದ್ದು
ಹೂವಿನದ್ದೋ? ನೀರಿನದ್ದೋ?
ಒಟ್ಟಾರೆ ಅರಳುವುದು ನೀರೊಡಲು.
ತರಂಗದಂತೆ ನಗು
ಮೂಡಿದಷ್ಟೇ ಶಾಂತವಾಗಿ
ಮತ್ತದೇ ಮೌನ
ಹೂವೋ? ತುಟಿಯೋ ಉಳಿದದ್ದು?!!



ಜನಿಸಿದಳು ತಾಯಿ
ತಾಯಿ ತಾ ತಾಯಿಯ ಪೊರೆದಂತೆ
ತಾಯ್ತನವ ಸವಿದ ತಾಯಿ!!

                                  
                               - ರತ್ನಸುತ

Monday 4 April 2016

ಕಟ್ಟದ ಕವಿತೆ

ಒಂದು ಕವಿತೆ ನೋಡಿದೆ
ನೋಡಿದೆನಷ್ಟೇ ಓದಲಿಲ್ಲ
ಓದದೆಯೇ ಮನ ಮುಟ್ಟಿತು
ಎದೆಯ ಬಡಿತವ ಎಚ್ಚರಿಸಿತು
ಬದುಕಲೊಂದು ಕಾರಣವ
ಮೌನ ಸಂಭ್ರಮದಲ್ಲಿ ಮುಳುಗಿಸಿತು
ಕವಿತೆಯದ್ದು ಇನ್ನೂ ಕಟ್ಟುವ ಹಂತ
ಆಗಲೇ ಇಷ್ಟವಾಗಿಹೋಗಿತ್ತು



ಶೀರ್ಷಿಕೆ ಇರದ ಕವಿತೆ
ತೋರಿಕೆ ಬಯಸದ ಕವಿತೆ
ತನ್ನಿಡಿ ಆಕಾರವೇ ಜೀವ ಕೋಶ
ತಾ ಚಲಿಸುತ, ನಾ ವಿಚಲಿತ
ಕಣ್ಣು ತುಂಬಿತು ಕವಿತೆ
ಹೊಮ್ಮಿ ಬಂದುದ ಮರೆತೆ
ಪ್ರೀತಿಯ ಕಾರ್ಯರೂಪ
ಅದುವೇ ನಿಜದ ಕಾವ್ಯ ರೂಪ



"ಕವಿತೆ ನಾವು ಕಟ್ಟುವುದಲ್ಲ
ತಾನಾಗೇ ಹುಟ್ಟುವುದು"
ಎಷ್ಟು ನಾಜೂಕಾಗಿ ವಿವರಿಸಿ
ಅಸ್ಮಿತೆಯ ಪ್ರಹರಿಸಿತು ಕವಿತೆ
ಕಟ್ಟುವ ಕೆಲಸ ಕೊಟ್ಟು
ಈಗ ಹುಟ್ಟುವೆ ಇಗೋ ಎಂದು
ಕವಿತೆ ಜನ್ಮ ತಾಳುತ್ತಿದೆ
ಕವಿತೆ ಜನ್ಮ ನೀಡಿತ್ತಿದೆ



ಸದ್ದು ಮಾಡುವ ಕವಿತೆ
ಕದ್ದು ಕೇಳುವ ಕವಿತೆ
ಕವಿತೆ, ಕವಿತೆ, ಕವಿತೆ
ಎಲ್ಲೆಲ್ಲೂ ಕವಿದಂತೆ ಕವಿತೆ



ಮೊದಲುಗಳ ಹಿಂದಿಕ್ಕಿ ಮೊದಲಾಗಿ
ಹಗಲಿರುಳು ಕಾಯಿಸುವ ಕವಿತೆ
ಕಣ್ಣೆದುರಿದ್ದೂ ಕೈಗೆಟುಕದ ತಿನಿಸು
ಹಠದಲ್ಲೇ ತಟವಾಗಿ ಕುಳಿತೆ



ಮುಂಬರುವ ಪ್ರಶ್ನೆಗಳ ಉತ್ತರ
ಮಂಪರಿಗೆ ಜೋಗುಳದ ಇಂಚರ
ತಿಳಿನೀರ ಕೊಳದೊಳಗ ಚಂದಿರ
ವರದಂತೆ ಅವತರಿಸೋ ಮಂದಿರ,
ಕವಿತೆ ಸಾಧ್ಯವಾಗಿಸಬಲ್ಲದು
ಎಲ್ಲವನ್ನೂ
ಕವಿತೆ ಕವಿಯಾಗಿಸಬಲ್ಲದು
ನೋಟವನ್ನೂ!!

                        
                            - ರತ್ನಸುತ

ಅತಿ ಮಧುರ ಅನುರಾಗ

ಅತಿ ಮಧುರ ಅನುರಾಗ  ನಿನ್ನೊಲವ ಮಳೆ ಹನಿಗೆ  ಮಿಂದಿರಲು ಮನಸಿದು     ನಿಂತು ನಿಂತು ಬೀಸಿದಂತೆ  ಸಂಜೆ ತಂಪು ಗಾಳಿ  ಅಂಕೆ ಮೀರಿ ಬರುವ ಮಾತು  ಹಾಕಬೇಕೇ ಬೇಲಿ  ಜೊತೆ ಇರಲು ...