ಮೋಹದ ಮಳೆಯಲಿ ನೆನೆಯಲು ನಿನ್ನ ನೆನಪಾಗುವುದು
ಮಾಸದ ಗಾಯದ ಗುರುತಲೂ ನಿನ್ನ ನೆನಪಾಗುವುದು
ಅಂಗೈಯ್ಯೇರಿದ ಕಪ್ಪು ಇರುವೆ ದಿಕ್ಕು ಹುಡುಕುತ
ತೋಳೆಡೆ ಪಯಣ ಬೆಳೆಸಲು ನಿನ್ನ ನೆನಪಾಗುವುದು
ಮಧುವನು ಹೀರುತ ಹಾರುವ ಚಿಟ್ಟೆ ಎದುರಾಗುತಲೇ
ಕೆನ್ನೆಯ ಹಾಗೆ ತಾಕಲು ನಿನ್ನ ನೆನಪಾಗುವುದು
ಏನೂ ಮಾತನಾಡದೆ ಬಿಂಬಿಸಿ ನಿಂತ ಕೊಳವು
ಉದುರಿದೆಲೆಗೆ ಚೆದುರಲು ನಿನ್ನ ನೆನಪಾಗುವುದು
ಬಹಳ ಹೊತ್ತು ಉರಿದು ಕಾದು ಆರಿದ ದೀಪ
ಕತ್ತಲ ನೀರವ ಆಲಿಸಲು ನಿನ್ನ ನೆನಪಾಗುವುದು
ಕಸಿ ಮಾಡಿ ಹೊಸ ಬಣ್ಣ ತಾಳಿದ ಹೂವಿನ ಬಳ್ಳಿ
ಅಸಲಿ ಬಣ್ಣವ ಅರಸಲು ನಿನ್ನ ನೆನಪಾಗುವುದು
ಹಾಡು ಹುಟ್ಟಿ ಹಳೆಯದಾದರೂ ಎಂದೋ ಒಮ್ಮೆ
ಥಟ್ಟನೆ ಗುನುಗಿಗೆ ದಕ್ಕಲು ನಿನ್ನ ನೆನಪಾಗುವುದು
ಪದಗಳು ಮೂಡದ ಹೊತ್ತಲಿ ಕವಿತೆಯ ಬರೆಯಲು ಕೂತು
ಖಾಲಿ ಉಳಿವುದೇ ಹಿತವೆನಿಸಲು ನಿನ್ನ ನೆನಪಾಗುವುದು..
ಹಾಡು
******
No comments:
Post a Comment