ನೆನಪಿನಂಗಳ ಸುತ್ತಿ ಬರುವೆ ಇರುಳೇ ತಾಳು
ತುಂಬು ಬೆಳದಿಂಗಳಲಿ ಮಿಂದ ಮರುಳೇ ತಾಳು
ಇನ್ನೂ ಬರೆಯದೆ
ಬಾಕಿ
ಉಳಿದ ಪುಟಗಳೆಷ್ಟೋ
ಆಗಲೇ ದಣಿವೆಂದು ಕುಣಿವ ಬೆರಳೇ ತಾಳು
ಭಾರವಾಗಿದೆ ಭುವಿಯ ಒಡಲು ದುಃಖವ ಹೊತ್ತು
ಕರಗಲೀಗ ಸಮಯವಲ್ಲ ಮುಗಿಲೇ ತಾಳು
ಸುಪ್ತವಾಗಿಹ ಸತ್ಯ ಸುಳ್ಳಿನುಡುಗೆಯ ಬಿಚ್ಚಿ
ನಿನ್ನನನುಸರಿಸುವಂತಿದೆ ಬೆತ್ತಲೇ ತಾಳು
ಎಲ್ಲ ಗೀಚಿ ಕೊನೆಗೆ ಹೆಸರಷ್ಟೇ ಉಳಿದಿದೆ
ಒಮ್ಮೆಗೆಲ್ಲವ ನುಂಗಲಾಯ್ತು ಕಡಲೇ ತಾಳು
ಈಗಷ್ಟೇ ಮರು ಪಯಣ ಬೆಳೆಸೋ ಮನಸಾಗಿದೆ
ಮುನ್ನ ನಿನ್ನ ದಾಟಿ ಬಿಡುವೆ ಹೊಸಲೇ ತಾಳು
No comments:
Post a Comment