ಕಣ್ಣಿನ ಗುರಿಗೆ ನಾ ಸರಿಯಾಗಿ ಸಿಗದೇ ಹೋಗಬಹುದು

ಕಣ್ಣಿನ ಗುರಿಗೆ ನಾ ಸರಿಯಾಗಿ ಸಿಗದೇ ಹೋಗಬಹುದು 

ಹಾಗಾಗಿಯೇ ಗುರಿಯ ಆಚೀಚೆ ಪ್ರತ್ಯಕ್ಷನಾಗುತ್ತೇನೆ 

ಎಂಥ ಗುರಿಕಾರರಾದರೂ ಗುರಿ ತಪ್ಪಿದಲ್ಲೂ ಸಂಭ್ರಮಿಸುತ್ತಾರೆ, ಕಾರಣ

ಆ ಕೇಂದ್ರ ಭಾಗವಿದೆಯಲ್ಲ, ಅದು ಹಂಬಲವಷ್ಟೇ 

ಬಾಣ ನೆಟ್ಟಲ್ಲೇ ಗುರಿಯಿಟ್ಟೆವೆಂಬುದು ನಂತರದ ಸಮಜಾಯಿಷಿ 

ಇಗೋ ಹಣೆಗೆ ಗುರಿಯಿಡು, ಎದೆಗೆ ನಾಟಬಹುದು 

ಬೇಡ, ಇನ್ನು ಮುಂದಕ್ಕೆ ಗುರಿಯಿಡುವಾಟ ಬೇಡ 

ಕೈಚಾಚು ದೂರದಲ್ಲಿ ಬಂದು ನಿಲ್ಲುತ್ತೇನೆ 

ಹೃದಯವಂತೂ ನಿನಗಾಗಿ ಅಂಗೈಯ್ಯಲ್ಲೇ ಕಾದಿದೆ

ದೋಚುವುದೇನು ಕಷ್ಟದ ಕೆಲಸವಲ್ಲ 

ಬದಲಿ ಹೃದಯ ಅನ್ನುವುದಿದೆ ನೋಡು, ಆ ಅದೇ 

ಏನೋ ತಕರಾರು ತೆಗೆವಂತಿದೆ, ಚೂರು ವಿಚಾರಿಸು 

ಕಾವ್ಯೋನ್ಮಾದ ಹೆಚ್ಚು ಕಾಲ ಬಾಳದು 

ನಶೆ ಇಳಿವುದಕ್ಕೆ ಮೊದಲೇ ಮತ್ತೆ ಓದುತ್ತೇನೆ 

ರೂಪಕಗಳು ಹೊಂದದೆ ಹೋಗಬಹುದೇನೋ?

ಅಲ್ಲಲ್ಲೇ ತಿದ್ದಿ ಮರು ಓದಿಗೆ ಸಜ್ಜಾಗುತ್ತೇನೆ 

ಅಥವಾ ರಾಗಬದ್ಧವಾಗಿ ಹಾಡಿ 

ಎದೆ ಮುಟ್ಟಿಸುವ ಯತ್ನ ಮಾಡಿದಾಗ 

ಮುಟ್ಟಿದೆನೆಂದು ಆರೋಪಿಸಿ ಜಗಳವಾಡು 

ಬೆನ್ನು ಬೆನ್ನಿಗೆ ಎಷ್ಟೇ ಬಿನ್ನಹ ಹಾಕಿದರೂ 

ಕಣ್ಣು ನಡೆಸುವ ಚಿಂತನೆ ಮಾತಿಗೂ ಮೀರಿದ್ದು 

ಹಾಗಾಗಿ ಎದುರು-ಬದುರು ಕೂತರೆ ಅನುಕೂಲ;

ಹೇಳಲಾಗದವುಗಳ ನೀನೇ ಗ್ರಹಿಸಿಬಿಡು 

ನನಗೊಪ್ಪುವ ಪ್ರತಿಕ್ರಿಯೆ ಸಿಕ್ಕಿತೆಂದು ನಾ ಹಿಗ್ಗುವೆ 

ಇವಿಷ್ಟೇ ಅಲ್ಲದೆ ಸಲ್ಲಾಪಕ್ಕೆ ಆಸ್ಪದವೂ, ಆಸ್ವಾದವೂ... 

ಈ ವಿಲಕ್ಷಣ ರಾತ್ರಿಗಳು ಕತೆ ಕಟ್ಟುತ್ತಿವೆ 

ನಮ್ಮ ಕುರಿತು ಊಹಾಪೋಹಗಳು ಹಬ್ಬುತ್ತಿವೆ 

ಇದಕ್ಕೆ ನಾವಲ್ಲದೆ ಬೇರಾರೂ ಕಾರಣರಲ್ಲ;

ಹೊಣೆ ಹೊರಲು ನಾ ತಯಾರಿದ್ದೇನೆ 

ಬಯಸಿ ಬಯಸಿ ಕತ್ತಲಾದಾಗ 

ಬೆಳಕಿಗಾಗಿ ತಪಗೈಯ್ಯುವುದು ಮೂರ್ಖತನ 

ತಾರೆಗಳು ಕೊಂಕಾಡಿದರೂ ಮೆರುಗು 

ವದಂತಿಗಳು ನಮ್ಮನ್ನು ಮತ್ತಷ್ಟು ಗಟ್ಟಿಯಾಗಿಸಿವೆ...