ಹಿಂಗಾರು ಹನಿಯೇ!!

ಇಂದೇಕೋ ಸುಂದರ ಕನಸೊಂದು
ಕಣ್ಣೆವೆಯಲ್ಲಿ ಜೋತಾಡಿದಂತನಿಸುತಿದೆ
ನಿದ್ದೆಯನ್ನ ಹಾಸಿಗೆಗೇ ಹೊರೆಸಿ ಬಂದಾಗಿದೆ
ಅದರ ನೆರಳಷ್ಟೇ ಈ ಹಾಳು ಮಂಪರು

ಹೆಲ್ಮೆಟ್ಟಿನ ಗಾಜುರಕ್ಷೆಗೆ ಅಂಟಂಟಿ
ಒಂದರ ಬಾಲ ಹಿಡಿದಂತೆ ಮತ್ತೊಂದು
ಮಂಜು ಆಕಾರ ಪಡೆಯುತ್ತಿದ್ದಾಗ
ದಾರಿಗಳೆಲ್ಲ ಮೈ ಮುರಿದು ಬರಮಾಡಿಕೊಂಡವು

ರವಿ ಇನ್ನೂ ಹಲ್ಲುಜ್ಜಿಲ್ಲೆಂಬಂತೆ
ತುಟಿಯ ಜಗ್ಗಿಸದೆ ನಗುತ್ತಿದ್ದಾನೆ
ಮುಖಕ್ಕೆ ಬಡಿಸಿಕೊಂಡ ಸಾಲು ಸಾಲು ಪೊರೆಯ
ಪೊರೆದಂತೆಯೇ ಶಾಂತನಾಗಿ ಉಳಿದು

ಬಿಸಿ ಕಾಫಿ ಲೋಟಕ್ಕೇನೋ ಅವಸರ
ಹೀಗೆ ಸುರಿದು, ಹಾಗೆ ತಿರುಗಿ ನೋಡುವಷ್ಟರಲ್ಲಿ
ಶಾಖವನ್ನೆಲ್ಲ ನುಂಗಿ ತಣ್ಣಗಾಗಿಸುತ್ತೆ,
ಅಧರದೊಳಗೆ ಇನ್ನೂ ಅದರಿತು ನಾಲಗೆ

ಮೋಡಗಳು ತಬ್ಬಿಕೊಂಡಂತೆ ಆಗಸವ
ಎಲ್ಲೂ ಚೂರು ಬಿಟ್ಟುಗೊಡದ ಹಠ
ಹೂಗಳಿನ್ನೂ ಹಸಿಯಾಗಿವೆ ಅಂತೆಯೇ ತಳಿರು
ಆದರೂ ತುಂತುರಿಗೆ ಮೈಯ್ಯೊಡ್ಡುವ ಚಟ

ಆಕಳಿಕೆಯಾಚೆಗಿನ ಕೆಲಸಕ್ಕೆ ಮನಸೇ ಇಲ್ಲ
ಹೊರಗೆ ಮಳೆ, ಬಸಿರಾಗಿಸಿ ಗರಿಕೆಯ
ಇದ್ದಲ್ಲಿ ತೂಕಡಿಕೆ
ಹಿಡಿದಿಡಲಾಗದೆ ಜಾರಿಸಿ ಗೊರಕೆಯ!!

                                       - ರತ್ನಸುತ