Tuesday, 3 November 2015

ಇಷ್ಟೇ ಸಾಕು


ಕರೆದಾಗ ನೀ ತಿರುಗಿ ನೋಡದಿರೆ ಅದು ಘಾಸಿ
ನೀಗಿಸುವ ನಗುವಾಗು ಅಷ್ಟೇ ಸಾಕು
ಬರೆವಾಗ ನೀ ಒರಗಿ ಇರಲೇಬೇಕೆಂದಲ್ಲ
ಮೂಡುವ ಪದವಾಗು ಅಷ್ಟೇ ಸಾಕು


ನೀ ಎದುರು ಬಂದಾಗ ಬೆದರುವೆ ಭಯದಲ್ಲಿ
ಚೆದುರು ಮೌನವ ಮಾತು ಮೂಡುವಂತೆ
ನಿದಿರೆ ದೂರಾದಾಗ ನವಿರು ಕನಸಾಗಿ ಬಾ
ನಿಶೆಗಿಷ್ಟು ನಶೆಯಿರಲಿ ಅಷ್ಟೇ ಸಾಕು


ದೇವರಲಿ ಕೈ ಮುಗಿದ ನನ್ನಾಸೆಗಳನೊಮ್ಮೆ
ನೀ ದಾಟುವ ಮುನ್ನ ಸೋಕಿ ಹೋಗು
ಹಸಿವಿನಲಿ ಹಿಡಿ ಮುದ್ದೆ ತಿನಿಸದಿದ್ದರೂ ಸಹಿತ
ನೆನಪನ್ನೇ ಎದೆಗಿರಿಸು ಅಷ್ಟೇ ಸಾಕು


ಮೊದಲಾಗುವ ಮೊದಲು ನೀ ನನ್ನ ಮೊದಲಾಗು
ಹಗಲಿರುಳು ದಿನವುರುಳಿ ಏನಾದರೂ
ಬದಲಾಗುವ ಸಮಯ ಎಲ್ಲ ಬದಲಾಗುವುದು
ನಮ್ಮೊಲವು ಸ್ಥಿರವಾದರಷ್ಟೇ ಸಾಕು


ಹಣ್ಣಾದ ಹೃದಯದಲಿ ಇನ್ನಾರ ಧ್ಯಾನಿಸಲಿ
ನಿನ್ನ ವಿನಹ ಎಲ್ಲ ಗೊಡ್ಡು ಸಪ್ಪೆ
ಮಣ್ಣಾಗುವ ಮುನ್ನ ನೀ ನನ್ನವಳು ಎಂಬ
ಭಾವ ಚೇತನವಿರಲಿ ಅಷ್ಟೇ ಸಾಕು!!


                                           - ರತ್ನಸುತ

No comments:

Post a Comment

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು ನೀನಿರದೆ ಈ ಗತಿ ಸಿದ್ಧಿಸಿತು ಜೀವಕೆ ಹಾಡುಹಗಲಲ್ಲಿ ನೀ ಆವರಿಸಿಕೊಂಡಿರುವೆ ಕನಸೊಂದು ಬೀಳುತಿದೆ ಗೊತ್ತಿದ್ದೂ ಬಾವಿಗೆ ಬ...