Monday 9 November 2015

ಪಾಕಶಾಲೆ


ಮಣ್ಣಿನ ಕುಡಿಕೆಯ ತಣ್ಣನೆ ನೀರು
ಒಲೆಯಲಿ ಕುದಿಸಿದ ಮೆಣಸಿನ ಸಾರು
ದುಂಡಗೆ ತೊಳೆಸಿದ ರಾಗಿ ಮುದ್ದೆ
ಕಾವಿರಿಸಲು ಉರಿಸಿದ ಓಣ ಸೌದೆ


ಸಗಣಿ, ಗಂಜಲ ಸಾರಿಸಿ ಮೊರದಲಿ
ಕಲ್ಲು, ಕಡ್ಡಿಯ ಹೆಕ್ಕುವ ಸರದಿ
ಉಕ್ಕಿ ಬಂತು ಹಾಲಿನ ಪಾತ್ರೆ
ಮಾಳಿಗೆ ಬೆಕ್ಕಿಗೆ ತಲುಪಿತು ವರದಿ


ಚಿಮಣಿಯ ಗೋಡೆಯ ನೆರಳಿನ ಆಟ
ಬಿಳಿ ಸುಣ್ಣಕೆ ಕರಿ ಮಬ್ಬಿನ ಪಾಠ
ಕೆಮ್ಮಣ್ಣಿನ ರಂಗೋಲಿಯ ಹೊಸಲು
ಉದುರಿದ ಚಕ್ಕೆಗೆ ಇಟ್ಟಿಗೆ ಬಯಲು


ಮಜ್ಜಿಗೆ ಕಡಿದ ಬೆಣ್ಣೆಯ ಕೋಲು
ಚಿಲಕಕೆ ಸಿಕ್ಕಿದ ಸೀರೆಯ ನೂಲು
ಇರುವೆಯ ಸಾಲಲಿ ಸವೆದ ಬಣ್ಣ
ರುಬ್ಬೋ ಕಲ್ಲಿಗೂ ಇರುವುದು ಪ್ರಾಣ


ಬೀದಿ ನಾಯಿ ಕಾಯುತಲಿತ್ತು
ರಾತ್ರಿಯ ತಂಗಲು ನೋಯುತಲಿತ್ತು
ಹಸಿದ ಹೊಟ್ಟೆಗೆ ನಾಲ್ಕು ತುತ್ತು
ಮಿಕ್ಕಿದ್ದೆಲ್ಲವೂ ಅನ್ಯರ ಸ್ವತ್ತು


ಅಡುಗೆ ಮನೆಯಲಿ ಹೊಗೆಯೋ ಹೊಗೆ
ಮೂಗನು ಬಿಗಿಸಿ, ಕಣ್ಣನು ತುಂಬಿಸಿ
ಸೆರಗೋ ಹಣೆಯನು ಒತ್ತುತಲಿತ್ತು
ಘಮಲೋ ಎಲ್ಲವ ಮೀರಿಸುತಿತ್ತು!!


                                  - ರತ್ನಸುತ

No comments:

Post a Comment

ಅತಿ ಮಧುರ ಅನುರಾಗ

ಅತಿ ಮಧುರ ಅನುರಾಗ  ನಿನ್ನೊಲವ ಮಳೆ ಹನಿಗೆ  ಮಿಂದಿರಲು ಮನಸಿದು     ನಿಂತು ನಿಂತು ಬೀಸಿದಂತೆ  ಸಂಜೆ ತಂಪು ಗಾಳಿ  ಅಂಕೆ ಮೀರಿ ಬರುವ ಮಾತು  ಹಾಕಬೇಕೇ ಬೇಲಿ  ಜೊತೆ ಇರಲು ...