Wednesday, 6 January 2016

ಕಪ್ಪೊಪ್ಪಿಗೆ

ನಿಜದ ನೆರಳು ಕಪ್ಪು
ಅಷ್ಟಾದ ಮಾತ್ರಕ್ಕೆ ಜರಿಯಬೇಡ
ಕಪ್ಪು ಪರಾವಲಂಬಿಯಲ್ಲ
ಬೆಳಕಿನ ಮೋಸದ ತುಣುಕು


ಕೋಗಿಲೆ ಕಪ್ಪಿಗೆ ಒಪ್ಪಿಗೆ
ಕಾಗೆಯದೇಕೋ ಕಡೆಗಣನೆ
ಕಪ್ಪು ಇದ್ದಿಲ ಅಟ್ಟಕ್ಕೇರಿಸಿ
ಕೆಂಡವ ಕೆನ್ನೆಗೆ ಹೋಲಿಸುವೆ


ಕಣ್ಣ ತೀಡುವ ಕಪ್ಪು ತಂಪು
ಕಪ್ಪಾದರೂ ನಾದಸ್ವರ ಇಂಪು
ಬಿಳಿ ಕರ್ಪೂರದ ಕೊನೆಯ ರೂಪ
ಮುಪ್ಪೇ ಇಲ್ಲದ ಕಪ್ಪು


ತಪ್ಪನು ಎತ್ತಿ ತೋರುವ ಕಪ್ಪು
ದೃಷ್ಟಿಗೆ ಕಪ್ಪು, ದೋಷಕೂ ಕಪ್ಪು
ಹುಟ್ಟುವ ಮುನ್ನ ರೆಪ್ಪೆಯ ಕಾವಿಗೆ
ಹತ್ತಿರವಾದ ಕೌತುಕ ಕಪ್ಪು


ಕೊಳೆಯಲು ಕಪ್ಪು, ತುಳಿಯಲು ಕಪ್ಪು
ಇಳಿಯಲು ಆಳಕೆ ಬೆಳೆವುದು ಕಪ್ಪು
ಹಣತೆಯ ಛಾಪು ತಿಳಿಯಲು ಅಲ್ಲಿ
ಮೂಡಲೇ ಬೇಕು ಸುಂದರ ಕಪ್ಪು


ನೆರಳಿನ ಆಟಕೆ ಬೆಂಬಲ ಕಪ್ಪು
ಬೆಳಕಿನ ಪಾಠಕೆ ಮುನ್ನುಡಿ ಕಪ್ಪು
ಎಲ್ಲ ತನ್ನೊಳ ಸೆಳೆದು ಕಡೆಗೆ
ಹೊರ ಚೆಲ್ಲುವು ಔದಾರ್ಯತೆ ಕಪ್ಪು


                                    - ರತ್ನಸುತ

No comments:

Post a Comment

ನನ್ನ ಕನಸು

ಪಕ್ಕದಲ್ಲೇ ನನ್ನ ಕನಸಿಗೆ ನಿದ್ದೆ ಹೊದಿಸಿ ನಾ ಎಚ್ಚರಗೊಂಡಿರುತ್ತೇನೆ ತೂಗು ತೂಕಡಿಕೆಯಲಿ, ನಡು ರಾತ್ರಿ ಮಂಪರಲಿ ... ಪೂರ್ತಿ ಮೈ ಮರೆಯದೆ, ಗೊರಕೆ ಹೊಡೆಯದೆ ಕೈ-ಕಾ...