Monday, 2 September 2013

ನೆನಪಿಡು ಮರುಳೇ!!

ನಂತರದ ದಿನಗಳಿಗೆ ಅಂಜಿ
ಈ ದಿನವ ರಾಜಿ ಮಾಡಿದರೆ
ನೆನ್ನೆಗಳ ಗೋಜಲಲಿ ನಾವೆಲ್ಲಿ?
ನೆನಪುಗಳ ಬಾಗಿಲಿಗೆ ಹೂವೆಲ್ಲಿ?

ಹೆಜ್ಜೆ ಗುರುತುಗಳು ಹಿಂದೆ ಉಳಿದಿವೆ
ಮುಂದೆ ಪಯಣವ ಬೆಳೆಸೆ
ಪಯಣಕೆ ಅರ್ಥವೆಲ್ಲಿದೆ ಮರುಳೇ
ಹಿಂದಿರುಗಲು ಗುರುತ ಎಣಿಸೆ?

ಹಿತಕಾಗಿ ಜೊತೆಯಾಗಿ ನೆರಳು
ಗುರಿ ತೋರಲೇ ಚಾಚು ತೋರ್ಬೆರಳು
ನೀನೊಬ್ಬನೇ ನಿನ್ನ ವೈರಿ!!
ನೀನೇ ನಿನ್ನ ಕಾಯುವ ಗೆಳೆಯ!!

ಹೇಳಲು, ಕೇಳಲು ಆಧಾರ ಒಂದೇ 
ಆತ್ಮಸಾಕ್ಷಿಯೆಂಬ ಪಾವನ ಪೀಠ 
ನಿನ್ನಿಂದ ನೀನೇ ದೂರಾದರೆ 
ಯಾರು ತಪ್ಪಿಸಬಲ್ಲರು ಹುಡುಕಾಟ?

ಆಟಕೊಂದು ಗೊಂಬೆ, ನೀನೆ ಸೃಷ್ಟಿಸು 
ಹೆಸರಿಟ್ಟು ಕರೆ, ಕಣ್ಣೀರ ಒರೆಸು 
ಅಷ್ಟರಲ್ಲೇ ಉಳಿ, ನಿರಾಸೆ ಪಡದಿರು 
ಪ್ರತಿಸ್ಪಂದನೆಗೆ ಹಂಬಲಿಸಿ ಮರುಗದಿರು 

ಎಣಿಕೆ ಬೇಸರವ ತಂದು ಸಾಕನಿಸಬಹುದು 
ಉಸಿರು ಆಯಾಸದಲಿ ತೂಕಡಿಸಬಹುದು 
ನಿನಗೆಂದೇ ಒಂದು ಲಕ್ಷ್ಯವಿದೆ ನೆನಪಿಡು 
ನಾಳೆ ಉಳಿವಿಗೆ ಇಂದು ಅಳಿಯದ ಗುರುತಿಡು 

                                            --ರತ್ನಸುತ

1 comment:

  1. ವೈರಿಯಾದರೂ ಅದೇ ಗೆಳೆಯನಾದರೂ ಅದೇ - ಬಹಳ ಬುದ್ದಿವಂತಿಕೆಯಿಂದ ಸಂಭಾಳಿಸಬೇಕು ನಿಜ.
    ನಾವು ಮರೆತಿರುವ ಸತ್ಯ "ಹಿಂದಿರುಗಲು ಗುರುತ ಎಣಿಸೆ"

    ReplyDelete

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು ನೀನಿರದೆ ಈ ಗತಿ ಸಿದ್ಧಿಸಿತು ಜೀವಕೆ ಹಾಡುಹಗಲಲ್ಲಿ ನೀ ಆವರಿಸಿಕೊಂಡಿರುವೆ ಕನಸೊಂದು ಬೀಳುತಿದೆ ಗೊತ್ತಿದ್ದೂ ಬಾವಿಗೆ ಬ...