Thursday, 1 October 2015

ಗೋಣಿಚೀಲ


ಅಟ್ಟದ ಮೇಲೆತ್ತಿಟ್ಟ
ಪತ್ತೆ ಹಚ್ಚದ
ಅದೆಷ್ಟೋ ಗೋಣಿಚೀಲಗಳು
ತಾತ ಮುತ್ತಾತಂದರು ಕೂಡಿಟ್ಟ ಆಸ್ತಿಯೇ?


ಒಂದೊಂದನ್ನೇ ಕಳಚುತ್ತ ಕೂತೆ,
ಒಂದಷ್ಟು ನಾರುವ ಜಮೀನು ಪತ್ರಗಳಲ್ಲಿ
ಹೆಬ್ಬೆಟ್ಟಿನ ಅಚ್ಚುಗಳು
ಖರೀದಿಯ ಪುರಾವೆಗಳಾಗಿದ್ದವು


ಅಲ್ಲಿಯವರೆಗೆ ಮುಚ್ಚಿಟ್ಟ ಮೂಗು
ಕಣ್ಣು, ಬಾಯಿ ಬಿಟ್ಟು ನೋಡತೊಡಗಿತು,
ನಾನು ಆಗರ್ಭ ಶ್ರೀಮಂತ!!


ಅಲ್ಲೇ ಪಕ್ಕದಲ್ಲಿ ದಬ್ಬಳದಲ್ಲಿ ಹೊಲಿದ
ಗಾಣಿಗೆ ಚೀಲದ ಒಳಗೆ
ಕೊಳೆತು ನಾರುತ್ತಿದ್ದ
ಬೆವರಲ್ಲಿ ಓರಣವಾಗಿದ್ದ ಮಾಂಸದಂತಿದ್ದ
ಪಾಪದ ಸರಕು ಭಯ ಹುಟ್ಟಿಸಿತು


ಧಡ ಧಡನೆ ನಾಲ್ಕು ಹೆಜ್ಜೆ ಹಿಂದಿಟ್ಟು
ಕೈಲಿದ್ದ ಜಮೀನು ಪತ್ರಗಳನ್ನ ಎದೆಗೊತ್ತಿ
ಅಸಡ್ಡೆಯಿಂದ ಮುಖ ಕಿವುಚಿಕೊಂಡೆ,
ಪಾಪಗಳೆಲ್ಲ ನಕ್ಕವು!!


ನಗು ನನ್ನ ಬೆವರಿಳಿಸಿ
ತಲೆಮಾರಿನ ಆಸ್ತಿ ಪತ್ರಕ್ಕೆ ಅಂಟಿಕೊಂಡಾಗ
ನಾ ಅದರ ವಾರಸುದಾನೆಂಬ ನಂಬಿಕೆ ಹುಟ್ಟಿತು,
ಪಾಪಗಳೆಲ್ಲ ಅಲ್ಲೇ ಕಳೆತವು


ಅಪ್ಪ ಬೇಡವಾಗಿಸಿಕೊಂಡ
ನಾನೂ ಬಿಟ್ಟು ಬಂದ
ಇನ್ನೂ ತುಂಬಿಲ್ಲದ್ದು
ತುಂಬಿಸಿಕೊಳ್ಳುತ್ತಲೇ ಇದೆ
ನನ್ನ ಮುಂದಿನ ಪೀಳಿಗೆಯ ನಿರ್ಲಕ್ಷ್ಯಕ್ಕಾಗಿ!!


                                               -- ರತ್ನಸುತ

No comments:

Post a Comment

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು ನೀನಿರದೆ ಈ ಗತಿ ಸಿದ್ಧಿಸಿತು ಜೀವಕೆ ಹಾಡುಹಗಲಲ್ಲಿ ನೀ ಆವರಿಸಿಕೊಂಡಿರುವೆ ಕನಸೊಂದು ಬೀಳುತಿದೆ ಗೊತ್ತಿದ್ದೂ ಬಾವಿಗೆ ಬ...