Monday, 5 October 2015

ಕಣ್ಣ ಹನಿಯೊಂದಿಗೆ


ಕಣ್ಣಲ್ಲಿ ಹನಿಯೊಂದು ಗೀಚಿಟ್ಟ ಕವನಕ್ಕೆ
ನೀ ಬಂದು ಹೊರಳಿ ಓದುವ ಕಾತರ
ನಿನ್ನ ಹೊರತು ಬೇರೆ ಯಾರಿಗೇ ಕಂಡರೂ
ಉರುಳಿ ಬಿಟ್ಟ ಜಾಡಿಗೂ ಬೇಸರ



ಇಷ್ಟು ಸಾಲದು ಎಂದು ಇನ್ನಷ್ಟು ನೋಯುವೆನು
ನಿನ್ನ ಓಲೈಕೆಯನು ಎದುರು ನೋಡಿ
ಕಷ್ಟ ನಷ್ಟಗಳೆಲ್ಲ ಲೆಕ್ಕವೆನಿಸೋದಿಲ್ಲ
ಎಣಿಸಿ ಕೂರುವ ವೇಳೆ ನಿನ್ನ ಕೂಡಿ



ಒಮ್ಮೆ ವಾಲುವೆ ಭುಜಕೆ ಕಣ್ಣೀರ ನೆಪವೊಡ್ಡಿ
ಕೆನ್ನೆ ಪೂರಾ ಸುಕ್ಕುಗಟ್ಟುವಂತೆ
ಅಲ್ಲೇ ಒಂದು ಸಣ್ಣ ನಿದ್ದೆಗೆ ಜಾರುವೆನು
ಚಂದ ಕನಸೊಂದು ಬಿಗಿದಪ್ಪುವಂತೆ



ಭಾಷೆಯಾಚೆಗೆ ಒಂದು ಸಂಭಾಷಣೆ ಇರಲಿ
ನವರಸಗಳ ಪರಿಚಯ ಆಗಲಿ
ಸರಸಗಳಿಗೊಂದು ಹಣೆಪಟ್ಟಿ ಬಿಗಿದಿರಿಸುವ
ವಿರಸಗಳಿಗಾವ ಗುರುತಿಲ್ಲದಿರಲಿ



ಒರೆಸು ಬಾ ಕಣ್ಣೀರ ಮಗುವಂತೆ ಪ್ರಶ್ನಿಸುತ
ಕೊಟ್ಟ ಉತ್ತರವನ್ನು ಒಪ್ಪದಂತೆ
ಜಾರಿದ ಪ್ರತಿಯೊಂದು ಹನಿಯ ಲೆಕ್ಕಕೆ ನೀಡು
ಸಿಹಿ ಮುತ್ತಿನ ಕೊಡುಗೆ ತಪ್ಪದಂತೆ

                                             
                                          -- ರತ್ನಸುತ

No comments:

Post a Comment

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು ನೀನಿರದೆ ಈ ಗತಿ ಸಿದ್ಧಿಸಿತು ಜೀವಕೆ ಹಾಡುಹಗಲಲ್ಲಿ ನೀ ಆವರಿಸಿಕೊಂಡಿರುವೆ ಕನಸೊಂದು ಬೀಳುತಿದೆ ಗೊತ್ತಿದ್ದೂ ಬಾವಿಗೆ ಬ...