Sunday, 17 August 2014

ಒಂದು ಸುತ್ತು ಬಣ್ಣನೆ

ಕಣ್ಣಾಚೆ ನೀನು ಇರಬೇಡ ಇನ್ನು ನನ್ನೊಳಗೆ ಬೆರೆಯೆ ಬಾರೆ;
ಹೃದಯಕ್ಕೆ ನಿನ್ನ ಹೆಸರಿಟ್ಟ ಮೇಲೆ ನಾವಲ್ಲ ಬೇರೆ ಬೇರೆ!!

ಮೇಲಿಂದ ಮೇಲೆ ಹರಿಯುತ್ತ ಬಂದೆ ಓ ನನ್ನ ಪ್ರೇಮ ಧಾರೆ;
ನೀ ಬಿದ್ದ ಕಡೆಗೆ ನಾನಾದೆ ಗುಂಡಿ ಮತ್ತೊಮ್ಮೆ ತುಂಬು ಬಾರೆ!!

ಕನಸಲ್ಲಿ ನಿನ್ನ ತದ್ರೂಪು ತೊಟ್ಟು ಮಿನುಗಿತ್ತು ಒಂಟಿ ತಾರೆ;
ಏಕಾಂತ ಚಟವ ಬಿಡಿಸಿದ್ದು ನೀನೇ ಮನಮೋಹಕಾಂತ ನೀರೆ!!

ನೇಕಾರ ಸೋತು ಕುಲ ಕಸುಬು ಬಿಟ್ಟ ನಿನ್ನನ್ನು ಕಂಡ ಮೇಲೆ;
ನೇಯೋದು ಅಷ್ಟು ಕಷ್ಟಕರ ಕಾರ್ಯ ನಿನಗೊಪ್ಪುವಂತ ಸೀರೆ!!

ತಣ್ತುಂಬಿ ಬಂದು ಹಿಡಿತಕ್ಕೆ ಸಿಗದ ಆನಂದಭರಿತ ನೀರೇ;
ಮಾತೆಲ್ಲ ಮೀರಿ ಮನೆ ಮಾಡಿಕೊಂಡೆ ಸವಿ ಮೌನ ನಿನ್ನ ಉರೇ?!!

ತಿಳಿದಷ್ಟೂ ನಾನು ತಿಳಿಗೇಡಿಯಾದೆ ಬಿಡಿಸೇಳು ನೀನು ಯಾರೇ?!!
ದಿನ ರಾತ್ರಿ ನನ್ನ ಎದೆಯೆಂಬ ಬೀದಿ ಮೇಲರಿದ ಹೂವ ತೇರೇ?!!

-- ರತ್ನಸುತ

1 comment:

  1. ರಸಿಕ ಕಾವ್ಯವನ್ನು ಆಲಿಸುವ ಆ ಹೃದಯವೂ ಬರಸೆಳೆದಪ್ಪುವುದು ಬಲು ಬೇಗ...

    ReplyDelete

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು ನೀನಿರದೆ ಈ ಗತಿ ಸಿದ್ಧಿಸಿತು ಜೀವಕೆ ಹಾಡುಹಗಲಲ್ಲಿ ನೀ ಆವರಿಸಿಕೊಂಡಿರುವೆ ಕನಸೊಂದು ಬೀಳುತಿದೆ ಗೊತ್ತಿದ್ದೂ ಬಾವಿಗೆ ಬ...