Thursday, 29 August 2013

ಕಣ್ಮುಂದೆ ದಾರಿ ಬೆನ್ಹಿಂದೆ ನೆನಪು

ಬೆಳಕು ಕತ್ತಲೆಯೊಳಗೆ ಮುಚ್ಚಿ ಮರೆಯಾಗಿದೆ 
ಪುಟ್ಟ ಕೂಸಿಗೆ ಕಣ್ಣ ಮುಚ್ಚಾಲೆ 
ಕನಸು ಬೀಳದೆ ಎಲ್ಲೋ ಕೊಚ್ಚಿ ಕಳೆದೋಗಿದೆ 
ಬರೆಯಬೇಕೇ ಒಂದು ಕರೆಯೋಲೆ ??
ಮನಬಿಚ್ಚಿ ಕೂಗಿ ಕರೆದಾಗಲೂ 
ಮನಸಿಟ್ಟು ಕೂತು ಬರೆದಾಗಲೂ 
ಸಿಗಲಿಲ್ಲ ಬೆಳಕು
ಬರಲಿಲ್ಲ ಕನಸು 

ಕಾಮನ ಬಿಲ್ಲಿಗೆ ಏಳು ಬಣ್ಣದ ಸಾಲು 
ಕೊಡಬಾರದೇ ಒಂದು ಸಾಲವಾಗಿ 
ಮುಗಿಲಿನ ಬೇಲಿಗೆ ಜಾರದ ಹನಿಗಳು 
ಬೇಕಾಗಿವೆ ಚೂರು ಬಹಳವಾಗಿ 
ಕನ್ನಡಿಯಲೊಂದು ನಗು ಮುಖವು ಬೇಕು 
ಎಲ್ಲಿ ಸಿಗಬಹುದು ಮಾಯಾ ದರ್ಪಣ 
ದಾರಿಯೂ ಒಂದು ಗುರಿ ಮುಟ್ಟಬೇಕು 
ಪಯಣ ಬೆಳೆಸಲು ಇಲ್ಲದ ಕಾರಣ 

ಸಾಗರ ದಾಟುವ ಛಲವಿದೆ ಆದರೆ 
ಕೊಡದಾಗಿವೆ ಅಲೆ ಬೆಂಬಲವನು 
ಮಂದಿರ ಕಟ್ಟುವ ಬಲವಿದೆ ಆದರೆ 
ಅಲ್ಲಗಳೆದಿದೆ ಮನ ಹಂಬಲವನು 
ಹೆಸರಾಗಲೆಂದೇ ಉಸಿರಾಟವಾಡಿ 
ಮಣ್ಣಾಗಬೇಕೆ ಬಡ ದೇಹ ??
ಕೊನೆ ಗಳಿಗೆಯಲ್ಲೂ ಕೊನೆಗಾಣಲಿಲ್ಲ 
ಇನ್ನೂ ಜೀವಂತ ವ್ಯಾಮೋಹ !!

                             --ರತ್ನಸುತ 

1 comment:

  1. ವ್ಯಾಮೋಹ ಜೀವಂತವಾಗಿದ್ದರೇನೇ ಪಯಣಕೂ ಇಂಧನ ಗೆಳೆಯ!

    ReplyDelete

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು ನೀನಿರದೆ ಈ ಗತಿ ಸಿದ್ಧಿಸಿತು ಜೀವಕೆ ಹಾಡುಹಗಲಲ್ಲಿ ನೀ ಆವರಿಸಿಕೊಂಡಿರುವೆ ಕನಸೊಂದು ಬೀಳುತಿದೆ ಗೊತ್ತಿದ್ದೂ ಬಾವಿಗೆ ಬ...