Sunday, 27 July 2014

ಮೌನವ ಕೆದಕುತ್ತ

ಕಣ್ಣ ಸಪ್ಪಳವನ್ನೂ ಆಲಿಸುವ ಮೌನ
ಕಣ್ಣೀರ ಸಾಂತ್ವನದ ಸ್ನೇಹಿತ;
ಪಿಸುಗುಡುವ ಮನಸಿಗೆ ಆಪ್ತ,
ಏಕಾಂಗಿ ತಲ್ಲಣಗಳ ಮೋಹಿತ!!

ಮೌನ ಮಾತಾದಾಗ ತಿಳಿ-
ಭೂಕಂಪನಗಳು ಎದೆಯಿಂದೆದೆಗೆ
ರಿಂಗಣಿಸುವಾಗ ನಿಟ್ಟುಸಿರು;
ಎದೆಗೊಟ್ಟವರ ಪಾಲಿಗೇದುಸಿರು!!

ಮುದ್ದು ಮಾತಿಗೊಮ್ಮೊಮ್ಮೆ
ಹದ್ದು ಮೀರುವ ಹಸುಗೂಸು,
ಇನ್ಕೆಲವೊಮ್ಮೆ ಮೀರಿದ ಹಠದಲ್ಲಿ
ಮುನಿವ ಪ್ರಳಯಾಂತಕ!!

ತನ್ನೊಳಗೇ ಲಾವಾ ರಸವ ಅದುಮಿಟ್ಟು 
ಸ್ಪೋಟಿಸದ ಮೌನ ಪರ್ವತ;
ಮನಸೂ ಕೆಲವೊಮ್ಮೆ ಹೀಗೇ
ಮಾತು ತಪ್ಪಿ ಮೌನ ಮುರಿದರೆ
ಅಸಹನೀಯ ನೋವ ಉಣಬಡಿಸುವುದು!!

ನಿರಾಕಾರ ಮೌನವನು ತಡೆವುದೂ,
ಹಿಡಿವುದೂ ಹುಂಬತನ,
ಹೆಜ್ಜೆಗೆಜ್ಜೆಗೊಟ್ಟು ಅನುಸರಿಸಿ ಸಾಗುವುದು
ತಕ್ಕ ಮಟ್ಟಿಗೆ ಜಾಣತನ!!

ಮೌನ ಒಮ್ಮೊಮ್ಮೆ ಪದವಿರದ ಕವನ,
ಮಂತ್ರವಿರದ ಹವನ
ರಾಗವಿರದ ಗಾನ;
ಹೆದ್ದಾರಿಯ ದಾಟ ಹೊರಟು
ಖುದ್ದು ಸಾವಿಗೀಡಾಗುವ ಶ್ವಾನ,
ನಿರಾಧಾರ ನೆನಪುಗಳ ಗರ್ಭವನು
ತುಂಬುವ ಭ್ರೂಣ!!

                               -- ರತ್ನಸುತ

1 comment:

  1. ಮೌನವೆಂಬುದು ಮಾತಿಗಿಂತಲೂ ಎಲ್ಲ ರೀತಿಯಲೂ ಪರಿಣಾಮಕಾರಿ ನಿಜ.

    ReplyDelete

ನನ್ನ ಕನಸು

ಪಕ್ಕದಲ್ಲೇ ನನ್ನ ಕನಸಿಗೆ ನಿದ್ದೆ ಹೊದಿಸಿ ನಾ ಎಚ್ಚರಗೊಂಡಿರುತ್ತೇನೆ ತೂಗು ತೂಕಡಿಕೆಯಲಿ, ನಡು ರಾತ್ರಿ ಮಂಪರಲಿ ... ಪೂರ್ತಿ ಮೈ ಮರೆಯದೆ, ಗೊರಕೆ ಹೊಡೆಯದೆ ಕೈ-ಕಾ...