ನಾನಲ್ಲ್ಲದ ನಾನು

ವಾಚಾಳಿ ಸಾಲುಗಳು
ನನ್ನವಾಗಿರಬಹುದು
ನಾನೇನು ಪ್ರಖ್ಯಾತ ಕವಿಯಲ್ಲ;
ಬರಿ ಬೊಗಳುವ ದಾಸ 
ನಾನಾಗಿರಬಹುದು
ಆದರೆ ದಿಕ್ಕೆಟ್ಟ ಪಾಡಲ್ಲ!!

ನನಗಂತ ಯಾವೊಂದೂ
ಸ್ವಂತಿಕೆ ಇರದಿರಲು
ನಾನಿದ್ದೂ ಇಲ್ಲವಾದವನಲ್ಲ;
ನನ್ನ ಹೆಸರು ಎಲ್ಲೂ
ಪ್ರಚಲಿತವಾಗಿಲ್ಲ
ಹಾಗಂತ ಆಗಂತುಕ ಅಲ್ಲ!!

ಉಪ್ಪರಿಗೆ ಮೇಲಿಂದ
ಪರಪಂಚ ಕಂಡವನು
ಎವರಸ್ಟಿಗಾಸೆ ಪಟ್ಟವನಲ್ಲ;
ಇದ್ದಂತೆಯೇ ಖುಷಿ
ಹೊಂದಿದವ ನಾನೆಂದೂ
ದಿ ಬೆಸ್ಟು ಆಗುವ ಮನಸಿಲ್ಲ!!

ಮನೆ ಮಟ್ಟಿಗೆ ಚೂರು
ಒಳ್ಳೆ ಹುಡುಗ ನಾನು
ಹೆಸರಿಟ್ಟು ಆಡಿಕೊಂಡವರಿಲ್ಲ;
ಈ ಬೀದಿಯ ಬದಿಗೆ
ನನ್ನಂಥವನೊಬ್ಬ
ಇರುವಂಥ ಮಾಹಿತಿ ದೊರೆತಿಲ್ಲ!!

ಚಟವುಂಟು ನೂರೆಂಟು
ಹಠ ಗೆಲ್ಲಿಸುವ ಗುಟ್ಟು
ಬಿಟ್ಟುಗೊಡುವ ವಿದ್ಯೆ ಕಲಿತಿಲ್ಲ;
ಎಳೆಸಾದ ತಲೆಯೊಳಗೆ
ಸೊಗಸಾದ ಕನಸುಗಳು
ಈಡೇರಿಸೋ ಶಕ್ತಿ ನನಗಿಲ್ಲ!!

ನಾನಲ್ಲ ಹಿತವನು
ಅಹಿತಕರನೂ ಅಲ್ಲ
ಸ್ವಾವಲಂಬನೆ ಬಿಟ್ಟು ಬೇರಿಲ್ಲ;
ಇರದುದ್ದಕೆ ಅತ್ತು
ಇದ್ದುದ್ದಕೆ ಬೀಗಿ
ಸಮತೋಲನವ ಎಂದೂ ತಪ್ಪಿಲ್ಲ!!

ನನ್ನವರು ನೂರಾರು
ಅದರಾಚೆ ಇನ್ನೂರು
ಮತ್ತಾರು ಇದ್ದಾರೋ ಗೊತ್ತಿಲ್ಲ;
ಹೀಗೇ ಇರಬೇಕು
ಅಂದುಕೊಂಡವರಾರೂ
ಈ ತನಕ ಬಾಳಲ್ಲಿ ಸಿಕ್ಕಿಲ್ಲ!!

                        -- ರತ್ನಸುತ

Comments

  1. ಹೌದಲ್ಲವೇ ಹೀಗೇ ಇರಬೇಕು ಎಂದುಕೊಂಡವರು ಸಿಗರು ನಮಗೆ ಸಲೀಸಾಗಿ.

    ReplyDelete

Post a Comment

Popular posts from this blog

ಜೋಡಿ ಪದ

"ಪಾಸ್ವರ್ಡ್" - RESET ಆಗ್ತಿರ್ಲಿ ಆಗಾಗ!!!

ಗರುಡ ಪ್ರಯತ್ನ ೩