Tuesday, 15 July 2014

ಗಿರ್ಕಿ

ಎದುರು ಮನೆಯ ಸಾವು
ನೆರೆ ಮನೆಯ ಹಸುಗೂಸ
ಬಿಡುವಿರದ ಅಳಲು;
ಗೌಡರ ಸೊಸೆಯ
ಬಸುರನ್ನ ಬಯಲಿಗೆಳೆದ
ಬಂಜೆ ಕೊರವಂಜಿ!!

ಸಾಲದ ದಿನಸಿಯ
ಬೆಲ್ಲದ ಅಚ್ಚಿಗೆ ಬೆಚ್ಚಗೆ
ಮೆತ್ತಿ ಸತ್ತ ಇರುವೆ;
ಹಾಲು ಗಲ್ಲದ ಮೇಲೆ
ಕೆಂಪು ದೀಪದ ಚುಕ್ಕಿ
ಕೀವುಗಟ್ಟಿದ ಮೊಡವೆ!!

ಕವಳ ಕಾಳಿನ ಚೀಲ
ಕೊರಳ ಜಪ ಮಾಲೆ
ಹಣೆಯ ತ್ರಿಪಟ್ಟಿ;
ಒಡಲಿನ ಬೆವರು
ಮಣ್ಣಿನ ಹಸಿರು
ಅಂಗೈಯ್ಯ ಒರಟು ಕಲೆ!!

ಶಾಲೆ, ಮಂದಿರ-
ಮಸೀದಿಯ ಗಂಟೆ,
ಸ್ಪೀಕರ್ ಗದ್ದಲ;
ರಸ್ತೆ ರಸ್ತೆಗಳ
ಸಿಗ್ನಲ್ ದೀಪಗಳಡಿಯಲಿ
ಹಸಿವ ಕೂಗು!!

ಏಕ ದಿನ ಪ್ರವಾಸಿ ತಾಣ
ನಾಲ್ಕು ಮಂದಿಯ ಕೂಡಿ
ಹಿಂದಿರುಗದ ಮನಸು;
ಬಾಣಂತಿ ಕೋಣೆಯಲಿ
ತೊಟ್ಟಿಲ ಸಿಂಗಾರ
ಕೆನ್ನೀರ ಆರತಿ!!

ಮೌನದ ತೀರ
ಪಿಸುಗುಡುವ ತಂಗಾಳಿ
ಶಂಖ ನಾದ;
ದುಃಖ ಲವಣ
ಖುಷಿಯ ಅಲೆಯು
ಜೀವ ಕಡಲು!!

             -- ರತ್ನಸುತ

1 comment:

  1. ಮನಸಿನ ಗಿರ್ಕಿಗಳು ತುಂಬ ಮಿಡಿತ ಹುಟ್ಟಿಸುವಂತೆ ಬರೆದು ಕೊಟ್ಟಿದ್ದೀರ.

    ReplyDelete

ನನ್ನ ಕನಸು

ಪಕ್ಕದಲ್ಲೇ ನನ್ನ ಕನಸಿಗೆ ನಿದ್ದೆ ಹೊದಿಸಿ ನಾ ಎಚ್ಚರಗೊಂಡಿರುತ್ತೇನೆ ತೂಗು ತೂಕಡಿಕೆಯಲಿ, ನಡು ರಾತ್ರಿ ಮಂಪರಲಿ ... ಪೂರ್ತಿ ಮೈ ಮರೆಯದೆ, ಗೊರಕೆ ಹೊಡೆಯದೆ ಕೈ-ಕಾ...