ನೆನಪಿನ ಬುಗುರಿ !!

ಬುಗುರಿಯ ಕೊಂಡರೆ 
ಮೊಳೆಗಳು ಉಚಿತ 
ಬುಡಕೊಂದಾದರೆ, ತಲೆಗೊಂದು
ಸುತ್ತಿಗೆ ಹಿಡುವುದ
ಕಲಿತದು ಆಗಲೇ 
ಗುರಿಯ ತಪ್ಪಿ ಬಡಿದಂದು 

ಚಾಟಿಗೆ ಸಾಲದ 
ಕಾಸಲಿ ತಿಂದ
ಬೋಟಿ, ಚಿಕ್ಕಿ, ನಿಪ್ಪಟ್ಟು 
ಲಾಡಿ ಸುತ್ತಿ 
ಬೀಸಿದರಾಯ್ತು 
ಬುಗುರಿ ತಿರುಗಿತು ಸಕ್ಕತ್ತು 

ತಕ-ತಕ ಕುಣಿದರೆ 
ಬಡಿ-ಬಡಿ ಬುಡಕೆ 
ನೇರಕೆ ತಾ ತಿರುಗುವ ತನಕ 
ಸವಾಲು ಸಿಕ್ಕರೆ 
ಆಟಕೆ ಸೆಡ್ಡು 
ಯಾರದ್ದು ಉಳಿವುದು ಕಡೆ ತನಕ 

ಚಾಟಿಯ ಕೊನೆಗೆ 
ಬಿಗಿದ ಗಂಟು 
ಬೀಸಿಗೆ ಸಿಗಲು ಬಿಗಿ ಹಿಡಿತ
ಬೀಸಲು ಬಾರದೆ 
ಕಲಿಸುವ ಪಾಠದಿ 
ಬುಗುರಿಯೂ ಕಲಿಯದು ಕಾಗುಣಿತ 

ನೆಲವ ತಾಕದೆ 
ಅಂಗೈ ಹಿಡಿಯಲು 
ಪಟ್ಟ ಪರಿಶ್ರಮಗಳು ಎಷ್ಟೋ 
ಕಲಿತ ಆ ದಿನ
ಖುಷಿಯ ಎಲ್ಲೆ 
ಸವಿದಂತಾಯಿತು ಒಬ್ಬಟ್ಟು 

ಗೆದ್ದ ಆಟಕೆ 
ತಳ ಮೊಳೆ ಸೀಳಿತು 
ಸೋತ ಬುಗುರಿಗಳ ತಲೆಯ 
ಸೋತಂದಿನ ಆ 
ತಳಮಳ ಕೇಳಿ 
ಗುನ್ನ ಇಟ್ಟವ ನನ್ನ ಗೆಳೆಯ 

ಬಗೆ ಬಗೆ ಬಣ್ಣ 
ತಿರುಗುವ ವೇಳೆ 
ಕಲೆತು ಆಯಿತು ಮತ್ತೇನೋ
ಚಾಟಿಯ ಕೊಳ್ಳಲು 
ಕಾಸು ಸಿಕ್ಕರೆ 
ತಿಂಡಿ ಕೊಳ್ವುದ ಮರೆತೇನು 

ಅಟ್ಟದ ಮೇಲೆ 
ಜೇಡನ ಗೂಡು 
ಧೂಳು ಹೊದ್ದು ಮಲಗಿತ್ತು 
ಬುಗುರಿ ತಲೆಯ
ಗುರುತುಗಳೆಲ್ಲ 
ಒಂದೊಂದು ಕಥೆಯ ಸಾರಿತ್ತು ... 

                     -- ರತ್ನಸುತ